ROMA 7 - Allah Wene Fano Wene Hupla Inane

Aben hemi woginafarek andi inoba lirogo isikhe wene

¹ Nerugwi nagaila'lak. Allah nen he, ”Yi'nogo hilingi'no, ti'nogo hilingi'no,” iluk komotninafikhe wene andi, afuni inebe ineluk logolik hologo higithogo hilingitu lek halok wene inoba agarek. Mene re, inebe wa'lagu halok, wene inoba agarek lek iluk hinonggot nogo? Lego. Hinelu meneat yagahisikhi lagi o.

² It hemi inaguni waganek mene re, inaguni inebe ineluk werek kwelek, wene Allah nen komotninafikhe wene andiba, inom hele homago hak fano welagi'lek halok, wene inoba asigin. Mene re, inaguni wa'lagunem enek he, hele homago hangge andi fikhalaga halok, wene inoba asigin lek.

³ He ekhe nen he, agun eluk werek kwelegat he, ap ekhe wanhe halok, afuni nen he, ”Pailagat wanhe o,” iluk abok weak ugun o. Mene re, agun ebe wa'laga halok he, wene Allah nen komotninafikhe wene andiba hele homago hak welagaikha a'nogo, arat fikhalaga iluk, ap ekhe elok wanugun aro. Wanhunem he, ”Pailak wanhe,” ugun lego.

⁴ Andi hak he, nerugwi nagaila'lak. Hit attak he, hemi inaguni inom hele homago hangge welagaikharek ogo andi hak, wene Allah nen komotninafikhe wene a'nogoba homago were'ma, at Kristus ebe watukwama wa'lagaikhe andi, hinomat wa'laga logolik, hele hangge homago welagagip mene andi arat fikhalagaikhe andi. Andi nen he, hemi inaguni wa'lagunem ekhe elok woginabugun andi hak, hit Allah faget fano hilingiti logouwageluk, at Yesus wa'lagaikhemo Allah nen eluget fesikhe mene a'nogo nen wokhinafikhemo welagebo.

⁵ Attak he, nit ninobabut he, afuni inobabut ninetogat welagagu. A'nogo logolik, wene Allah nen komotninafikhe wene a'nogo werek kwelek ninoba aigage lagagunem he, ninenggi nineisok ninebe mondogaren weak hilingitunem wurep oba re, mondok wa'laga lagagu andi.

⁶ Attak he, wene Allah nen komotninafikhe wene a'nogoba hele warek hak welagagu mene, Kristus wa'laga logolik nit ninomat wa'lagagu andiba, Allah nen hele fikhalninafikhemo welago. Yogondak he, Allah amingmingengge logolik, wene aren komotninafikhe wene lisu palek mene nineilenggen enek kwelakhikhi logolik, hilingiti lagagu andi hak he, hilingiti lago lek. We, Allah Areagun en ninobabut ket mene hilingninafu kwelek, hilingiti lago.

Wene Allah nen komotninafikhe wene andiba, weak hilingitarek mene enegat agaikhe wene

⁷ Andi halok he, niren ninggi'nogo ugun. Wene Allah nen komotninafikhe wene andi weak ugun nogo? Mondok lego. Mene re, wene a'nogo komotninafi'lek logoilepma re, weak hilingitarek andi ninggi'nogo heat, nonggorat logoile o. Allah nen wene komotninafikhe wene andiba ikhi logolik he, ”Afuni ekhe inagarek mene, Namolo e, iluk hinendawimo anggagubo,” iluk igi'lek logoilepma re, afuni ekhe inagarek mene, namolo e, anggigirek andi nonggorat logoile o.

⁸ Andi nenat, wene Allah nen komotninafikhe wene andiba, weak mene nen he, an weak hilingisuageluk, ”Yi mene ti mene afuni inagarek mene, hendawimo nen, hamolo anggano,” iluk nendawimo kagalhi lagaikhe. Wene Allah nen komotninafi'le'ma andem he, weak hilingisugun iluk he, ninonggot welagagu.

⁹ An attak he, wene Allah nen komotninafikhe wene andi nonggot logolik he, neluk fano welagi hangge welagagi. Mene re, wene komotninafikhe wene a'nogo nelu agagisik oba nen he, weak hilingitarek andi mene omame agaikhemo,

¹⁰ an he, warek hangge hilinglagagi, Allah nen he neluk logouwageluk komotnafikhe meneat he, wene andiba re warek hangge welagagi andi.

¹¹ Allah nen komotninafikhe wene andiba re weak hilingitarek andi nendawimo kagalogo lalnafikhesik he, nebe noatikhe andi.

¹² Wene Allah nen komotninafikhe wene andi re, Allah ane aro. ”Yi'nogo hilingisugun lek, ti'nogo hilingisugun lek,” iluk komotninafikhe wene andi ebe lombok he, at ane aro. Wene andi higit fano mondok isikhe uok.

¹³ Halok he, wene andi fano mondok isikhe mene andi nen an nebe wa'lagagi nogo? Mondok lego. Weak hilingitarek andi nen aro. Weak hilingitarek andi nen, fano mene andiba warogo nobagasikhemo re, enegat agaikhe. Wene Allah nen komotninafikhe andiba athe, inobabut weak hilingitarek andi mondok weak, iluk enegat hilinglagaikhe andi.

”Nendawimo nen he, fano hilingisigin anggigirek meneat he, ebe hilingitirek lek,” isikhe wene

¹⁴ Wene komotninafikhe wene andi, Allah Areagun en yaganisasikhe iluk ninelu o. Mene re, an nobabut he, afuni inobabut hangge inetok welagi. Weak hilingitarek andi mene nen awe a'ma nobagaigeluk onggo palogo hak wo'nafikhemo welagi.

¹⁵ Andi nen he, nendawimo nen: ”Yi mene ti mene fano mene hilingi'le,” iluk namolo anggigirek mene andi, ebe hilingitirek lek. Meneat he, nabit anggigirek mene andiat hilingitirek andi nen he, an hilingiti lagi mene andi futfigi'lek welagi o.

¹⁶ An nendawimo nen namolo anggigirek mene lek. We, nabit anggigirek mene hilingiti lagi andi re, ”Wene Allah nen komotninafikhe wene andiat fano,” iluk u hagat hilingiti lagi o.

¹⁷ An nobabut a'nogo hilingiti lagi andi re, an nen hilingiti lagi fuk. We, weak hilingitarek mene nendawimo logolik hilingiri'logo.

¹⁸ Higithogo hilingisigeluk namolo anggigirek meneat he, ebe an nen hilingisigin he, elo'lego. Andi re, an nobabut he, fano mene ekhe hilingitirek fuk. We, nobabut afuni inobabut mene netogat logolik hilingiti lagi, iluk nelu o.

¹⁹ Fano mene hilingisigeluk anggigirek meneat he, ebe hilingiti lagi lek. We, weak mene hilingisigeluk anggigi'lek meneat he, andi meneat hilingiti lagi.

²⁰ Nendawimo nen namolo anggigi'lek. Nabit anggigirek mene hilingiti lagi halok he, an nebe nen hilingiti lagi lek higi. We, weak hilingitarek mene nendawimo welagarek mene andi nenat hilingiri'logo.

²¹ An nobabut hilingitirek igi andi re, ebe yi'nogo hikhi lagi. Fano hilingisigeluk ugunem he, weak hilingisu hak enek hilingnaferego.

²² An nendawimo nen he, ”Wene Allah nen komotninafikhe wene andi fano,” iluk anggigirek meneat he,

²³ nenggi neisok nebe abirenggeat he, hunogo mene hilingiti logolik, wene Allah nen komotninafikhe wene a'nogo nendawimo nen fano anggigirek mene andi sebeligeluk ikherek. Nenggi neisok nebe abirenggeat yoma weak enek hilingitirek andi nen he, nebe weak hilingisuageluk hele warogo hak nobagaikherek andi.

^24-26 An nonggwarek nendawimo re, wene Allah nen komotninafikhe wene andi hologo logogin anggigirek meneat he, nobabut afuni inobabut inetogat logolik hilingitarek mene andi nen yaganetunem ane hologo welagirek andi. A'nogo welagirek andi nen, nebe mondok noasigin andi, eigo. Sa nen telnabigin? Ninoe Enupogot Yesus Kristus hilingitikhe andiba telnabigin andi nen he, ”Neisena Allah,” iluk hai wati lagi o.