ROMA 6 - Allah Wene Fano Wene Hupla Inane

Kristus ninom wa'lagagusik ninomat nineluk logogun wene

¹ Andi halok he, niren ninggi'nogo ugun. Allah obabut fano andi nen, hokhorogo endawitninafi logouwageluk he, niren weak hilingitu mondok logogun nogo?

² Mondok elo'lego. Nit weak hilingiti lagagu andi faget he, arat wa'lagagusigat he, hobuk weak hilingiti logogun nogo? Elo'lego.

³ Nit Kristus Yesus ninom hunesuogeluk ima pisugu mene halok at ebe wa'lagaikhe hagat, ima pelakninafunem ninom hundigat wa'lagagu, iluk hinonggot nogo?

⁴ Ima pelakninafi logolik he, at ebe warek salhukwa hak, nit at ninom hundigat were'ma warogo ninobagasukwa. Nen, at Kristus wa'lagaikhesi'mo nen, Eisena omame hokho fogeratarek mene a'nogo nen eluget fesikhe hak, nit yogondak ninelugetninafemo ninobabut ket mene hilingiti logouwogo.

⁵ At wa'lagaikhe hak, nit ninom hundigat logolik wa'lagagu halok he, at eluk agaikhe hak, nit andi hagat nineluk logogun.

⁶ Nit ninobabut ninetogat logolik weak hilingiti lagagu mene andi herakfisoageluk he, Yesus eba menfuluk ninomat ninoatukwa andi nen, nit ninobabut attak mene andi amingmingengge logogun lego, iluk ninelu.

⁷ Afuni weak hilingi'luk wa'lagunem he, wene inoba mene legagarek.

⁸ ”Nit he, Kristus ninom hundigat wa'lagagu halok, ninom hundigat nineluk logogun o,” iluk ninendawinggen at oba himbirik welago.

⁹ At Kristus arat wa'lagaikhemo Allah nen eluget fesikhemo andi nen he, hobuk wa'lasigin lek, iluk ninelu o. Halok he, wa'lagaikharek ero andi nen hobuk Yesus ebe awe a'ma fagain mondok elo'lego.

¹⁰ At Kristus wa'lagaikhe andi re, weak hilingitarek andi faget misigam fagerat wa'lagaikhe andi araro. Hobuk eluk agaikhesik eluk welagarek andi, Allah fagerat eluk welagarego.

¹¹ Andi hagat he, hit hinendawimo nen he, ”Weak hilingiti logogun mene faget waregat logolik, Kristus Yesus ninom hundik logolik he, Allah fagerat nineluk logogun,” iluk hinendawimo anggikhi logoino o.

¹² Ninebe wa'lagorek mene yi were'ma, weak hilingitarek mene andi omame asinogo nen he, awe a'ma kuluk logogubo. Weak hilingisuageluk hinendawimo kagali waga halok he, weak mene andi ane hinesanggo holhubo.

¹³ Hinenggi hineisok hinebeba welagarek mene ekhe inom mondogat he, weak mene asikhe arige hak a'luk he, weak hilingiti logouwageluk, at wogeti logogup. Hinebe warek hangge were'ma Allah nen hinelugethinafikhemo hineluk logolik hilingisugun higithogoat, hinebe abirenggeat Allah wogo'ni o. Hinenggi hineisok hinebeba welagarek mene inom ekhe mondogat he, at asikhe arige hak a'luk he, higit hilingiti logouwageluk Allah wogo'ni o.

¹⁴ Hit he, wene Allah nen komotninafikhe wene a'nogo oba himbirik welagep lek. We, Allah obabut fano nen endawitninaferek mene andi oba himbirik welagep andi nen he, weak mene awe a'ma logogun lego.

Ap pire mene inamingmingengge a'luk logogun lek wene

¹⁵ Halok he, wene andi wurep oba re, ninggi'nogo ugun? Nit ninebe wene Allah nen komotninafikhe wene a'nogoba himbirik welago lek. We, Allah obabut fano nen endawitninaferek andi oba himbirik welago andi nen he, weak hilingiti logogun nogo? Mondok lego.

¹⁶ Hit he, ap ekhe amingmingengge a'luk he, ane holek logouwogeluk, awe a'ma kuluk logolik, at ane holhi lagep halok he, at amingmingengge meneat welago iluk hinonggot nogo? Weak hilingitarek mene andi awe a'ma kuluk he, wurep oba wa'lagaikharek andi. Meneat he, at Allah ane hologo logolik he, at awe a'ma kugunem, wurep oba aren wene ninoba mene korogo wokhaluk at ninom hobuk ninambotkwe hunogo ninobagaikherek andi.

¹⁷ Hit attak he, weak hilingitarek andi awe a'ma kuluk were'ma, hobuk, wene yagahisugunem, wene andi hinendawinggen oba wanhigip andi nen he, Allah hai wasuogo.

¹⁸ Hit he, weak hilingitarek andi mene nen fethinarek were'ma, Allah nen hele fikhalogo hinobagaluk, at faget higithogo hilingiti logouwageluk, awe a'ma hinobagasikhemo welagep.

¹⁹ Hit hinobabut he, wene yagahisigi andi futfogoin elo'lek hangge andi nen, futfobagaigen iluk he, afuni inamingmingengge logolik hilingitarek mene inoba lirogo yagahisikhi lagi andi. Hit attak he, hinenggi hineisok hinebeba welagarek mene ekhe inom mondogat he, weak mene amingmingengge hangge woge'luk, hesanggeat hilingitik, hit komore'lek yi weak ti weak hilingitik, ikhi lagagip andi. Andi hagat he, yogondak hit hinenggi hineisok hinebeba welagarek mene ekhe inom mondogat he, Allah onggwarek faget fisaluk higithogo hilingiti logouwogeluk, at wogeti logoino o.

²⁰ Hit attak he, weak hilingitarek mene awe a'ma logolik, Allah endawimo amolo anggikherek mene higithogo hilingisu re elo'lek welagagip.

²¹ Mene re, a'nogo hilingiti lagagip andi faget, nena mene helasigip nogo. Attak hilingiti lagagip mene andi faget, yogondak hinenggali ari'logo andi. A'nogo hilingiti logolik were'ma re wurep oba re, inebe mondok wa'lagaikharek andi aro.

²² Mene re, hit weak hilingitu kwelek, weak mene nen fethinarek were'ma, Allah nen hele fikhalogo wulakhinobagasikhemo re, yogondak he at awe a'ma kuluk welagep andi. Logolik he, hinebe at faget fisaluk welagep andi mene helegebo. A'nogo logombik, wurep oba hineluk mondok logogun aro.

²³ Weak hilingitarek andi onggo re, wa'lagaikharek andi. Nen, ninoe Enupogot Yesus Kristus ninom hundik were'ma re, Allah obabut fano nen onggo legat nineluk mondok logouwageluk hilingninaferek andi.