ROMA 5 - Allah Wene Fano Wene Hupla Inane

”At Allah nen hobuk ninambotkwe hunogo ninobagaikhemo welago,” iluk yagaisasikhe wene

¹ Yogondak he, nit ninendawinggen Allah oba himbiret fesugu andi nen, wene ninoba mene korogo wokhaluk ninom ninambotkwe hunogo ninobagaikhemo, ninoe Enupogot Yesus Kristus nen hilingitikhe andiba Allah ninom lambulogo fano liokhogo welago.

² Nit ninendawinggen Yesus oba himbiret fesugu andibaat, at Allah obabut fano nen fanotninaferek mene andi awe a'ma ninobagaikhe andiba himbiret fuluk welago. Logolik, Allah fogeratu mondok welagaikharek andi hak, nit a'nogoat fogetninabigin o, iluk ninendawimo ninagaiyegeti lago.

³ Andi faget enek ninendawimo ninagaiyek hikhi lago fuk. Yi enggin ti enggin hogorek andiba, ninendawinggen wurik agarek andi nen he, a'nogo weagetninafu kwelek, ninendawimo ninagaiyek hikhi lago aro.

⁴ Ninendawinggen wurik agaresik wurep oba re, Allah nen ninobabut palogo fano ikherek. A'nogo ikherek oba, hobuk eberogoat fano asigin, iluk ninendawimo ninagaiyek hikhi lago.

⁵ Fano asigin iluk ninendawimo ninagaiyek hikhi lago andiba, Allah nen Areagun wo'nisasikhemo ninendawimo logolik, i hinatarek hak, Allah nen endawitninaferek mene andi ninendawimo peterogo ninobagaikherek andiba ninailo lekhogo welago.

⁶ Nit he, Allah ebe herakfisaluk yatma'at asi lagagusik, ninebe lebelek were'ma, at Allah nen he, ”It a'nogo werek andi faget, Kristus yi sambul wa'lasigin,” iluk anggasikheba higithogoat At ebe watukwama wa'lagaikhe andi.

⁷ Ap ekhe nen he, ”An nebe at obabut higit mene andi faget, obali'mo wa'lasigin,” iluk igin he, enggin aro. A'nogo meneat he, ap ekhe ailo lek mene nen he: ”An nebe ap obabut fano mene andi faget obali'mo wa'lasigin,” iluk anggagain o.

⁸ A'nogo meneat he, at Allah ninebe endawi nen hilingiterek andi enegat asuageluk, nit weak hilingitu were'ma, Kristus ebe wo'nisasikhemo ninobali'mo wa'lagaikhe andi.

⁹ At Kristus amep wulagaisogo wa'lagaikhe andiba, wene ninoba mene korogo wokhaluk Allah ninom hobuk ninambotkwe hunogo ninobagasikhe andi nen he, hobuk Allah a'mage ninoba fugunem telninabigin lek nogo? Telninabigin aro.

¹⁰ Nit attak he, Allah ninom weim palek were'ma re, hobuk at amlogo wa'laga logolik, Allah ninom lambukhogo ninobagaikhemo welago. A'nogo were'ma, at ebe eluk logolik he, telninabigin lek nogo? Attak telninabu lek mene telninafikhesik he, yogondak ninom hundik logolik telninabigin aro.

¹¹ Mene re, andi nek fuk. Ninoe Enupogot Yesus Kristus hilingitikhe andiba, Allah ninom hobuk ninambotkwe hunogo ninobagasikhemo ninom fano welago andi nen he, ninendawimo ninagaiyek hikhi lago.

Adam en weak hilingitikhemo re, Kristus nen fano hilingitikhe wene

¹² Wene andi re, mel hangge. Ap misigat mene weak hilingitikhemo re, weak ero at oba nen afuni mondogat weak ninoba agaikhe. A'nogo ninoba agaikhemo re, ninebe mondogat weak hilingirik wagunem, wurep oba re, ninebe mondogat wa'larik wagorek andi.

¹³ Wene Allah nen komotninafikhe wene a'nogo oan nit komore'lek werek kwelek he, afuni weak hilingiti lagaukwa. Mene re, oan komorinafi'le'ma re, Allah nen, ”It weak hilingita,” iluk wene inoba figi'lek welagaikhe.

¹⁴ Wene inoba figi'lek meneat he, ap Adam welagaikhe huli nen, pikhit Musa welagaikhe andem huli re, wa'lagaikharek ero afuni mondogat inoba omameat agaikhesik he, wa'larik wagaukwa andi. Afuni ekhe nen, at Adam Allah nen komotikhe wene sebelogo weak hilingitikhe hak, a'nogo hilingiti'le'maat he, wa'lagaikharek ero andi inoba agaikhesik he, wa'larik wagaukwaat. Nen, at Adam hilingitikhe andi re, At hobuk wagaikhe mene andi we'luk ebe hilingisigin mene faget walhogo hak hilingitikhe.

¹⁵ A'nogo meneat he, emberek inobabut misigat fuk. Ebe re, Allah obabut fano nen weat wo'nisasikhe mene andi mondok hokhoat, at Adam Allah ane sebelogo weak hilingitikhe andi emberek walhamo re, emberek higit he lego. At misik mene nen weak hilingitikheba, wurep oba re, inebe hokhorogoat wa'larik wagaikharek. Meneat he, Allah obabut fano nen Yesus Kristus weat wo'nisasikhemo, ap ebe misigat mene nen fano hilingitikheba, fano mene ero afuni hokhorogoat ninoba wialagaikhemo welago.

¹⁶ Ap misigaren Allah ane sebelogo weak hilingitikheba, Allah nen he, wene oba fesikhesik weagetfesikhe andi. A'nogo weagetfesikhemo re, hobuk afuni weak mondok hilingirik wagaukwa meneat he, at Allah obabut fano nen weat onggolek yaganisikhi logolik he, ”Wene hinoba lego,” iluk korogo wokhasikhe.

¹⁷ Ap misigaren Allah ane sebelogo weak hilingitikhesik, wa'lagaikhemo re, wa'lagaikharek ero at oba nen omame agaikhesik he, wialagaikhe andi. A'nogo meneat he, Allah obabut fano nen, Yesus Kristus weat wo'nisasikhemo, at ebe misigaren, fano hilingitikhe andi nek he, mondok esin hokho mene. A'nogo hilingiti logolik, wene ninoba mene weat korogo wokhaluk Allah ninom ninambotkwe hunogo ninobagasikhemo, at ninom hundik nineluk logolik ninomamerogo fano logogun.

¹⁸ Wene igi andi re, mel igi anggigi. Ap ekhe nen Allah ane sebelogo weak misigamat hilingitikheba, wurep oba re, afuni mondogat wene inoba fesikhesik weagetfisasikhe andi hak, ap ekhe nen Allah ane hologo higithogo misigam faget hilingitikheba, wene afuni mondogat inoba mene korogo wokhigik, inelugerinafik, isikhe.

¹⁹ Ap misigaren Allah ane hologo hilingiti'lek weak hilingitikhe andiba re, afuni inebe hokhorogoat weak hilingirik wagaikharek andi hak, ap misigaren, Allah ane hologo hilingitikhe andiba re, afuni ninebe hokhorogoat wene ninoba mene korogo wokhasikhemo Allah endawimo amolo mene hilingiti logogun andi.

²⁰ Mene re, at ekhe weak hilingitikhesik oba Allah ane sebelogo weak hilingitarek mene enggin asuageluk, Allah nen wene komotninafikhe wene hobuk wo'nisasikhe. Weak hilingitarek andi wialarik lagu kwelegat he, Allah obabut fano nen endawitninaferek andi, yi mene ti mene oba heilarogo nenggarek hak, endawitninafunem hokhorogo wialarik lagarek andi.

²¹ Weak hilingitaresik wa'lagaikharek andiba, weak hilingitarek mene omame agaikhe andi hak, ninoe Enupogoren wene ninoba mene korogo wokhaluk, Allah ninom hunogo ninobagasikhe andiba, Allah obabut fano nen endawitninaferek mene andi omame agaikhemo re, nineluk mondok logogun andi.