ROMA 4 - Allah Wene Fano Wene Hupla Inane

At Abraham endawinggen Allah oba himbiret fesikhemo, wene oba mene korogo wokhasikhesik emberek hunogo fesikhe wene

¹ Halok he, nit afuni Yahudi mene nen ninomba Abraham obabut hilingiti lagaikhe mene faget abok ninggi'nogo ugun.

² At onggwaregen fano ekhe hilingitikheba, Allah nen, ”Wene hoba mene korogo wokhigirik, hambotkwe nemberek hunogo hobagagi o,” iluk yaga'lepma re, onggwaregen fogerakhelebo. Mene re, Allah eilhanem fogerakha elo'lek welagaikhe andi.

³ Allah ane lisu palogo fesukwa andiba ninggi'nogo isukwa nogo. Mel isukwa lek nogo? Abraham endawinggen Allah oba himbiret fesikhemo re, at Allah nen he: ”Hat hobabut higithogo hilingiti lagen hak, hendawinggen noba eberogoat himbiret fegenma, wene hoba mene korogo wokhigirik, hambotkwe nemberek hunogo hobagagi andi aro,” iluk yagatikhemo, lisu palogo fesukwa.

⁴ Afuni nen yi yabu ti yabu hilingitunem, inenggi onggo wogisagarek andi re, ap yonggo fagarek mene nen inobabut fano nen weat wogisagarek fuk. We, inenggi onggo wogisa hagat wogisagarek andi.

⁵ A'nogo meneat he, afuni ekhe nen Allah endawimo fanorogo yi mene ti mene hilingiti'lek logoligat, inendawimo nen he, ”It afuni ekhe nen Allah ebe inendawimo sebelfikhi lagaikha meneat he, aren he, it wene inoba mene elok korogo legetfisaluk hobuk inambotkwe at inom hunogo fisikherek,” iluk inendawinggen at oba himbiret fugunem he, aren he: ”Hinobabut higithogo hilingiti logou hak, hinendawinggen an noba himbiret fegepma wene hinoba mene korogo wokhigirik, hinambotkwe ninom hunogo hinobagagi andi aro,” iluk yagaisikheregat.

⁶ At Allah nen a'nogo hilinginaferek iluk, at Daud en mel isikhe: ”Afuni nen he, Allah endawimo fanorogo ekhe hilingiti'le'maat he, wene inoba mene korogo wokhaluk, inom inambotkwe hunogo fisikherek, iluk, inendawimo inagaiyek anggoago,” iluk isikhesik lisu mel iluk palogo fesikhe:

⁷ ”It afuni komore'lek weak hilingitarek mene Allah nen sebelogo herakfisigik, weak hilingitarek mene lek hilingisogo fisigik, ikhe mene halok inendawimo inagaiyek hikhi logouwago.

⁸ Nen, it afuni ekhe weak hilingitarek mene faget, nineisena Allah Enupogoren weak hilingiterek mene a'nogo leget fesikhesik wene inoba figi'lek mene halok, inendawimo inagaiyek anggoago,” iluk isikhemo lisu palogo fesukwama werek.

⁹ ”Inendawimo inagaiyek anggoago,” iluk isikhe andi re, it afuni inagap inenggalimo mene palek mene faget enek isikhe a? Athe, it inagap inenggalimo mene pale'lek mene faget inomat isikhe a. Attak wene yi'nogo ogo anggigi: Abraham endawinggen Allah oba himbiret fesikhemo re, aren he: ”Hat hobabut higithogo hilingiti lagen hak, hendawinggen noba himbiret fegenma re, wene hoba mene korogo wokhigirik, hambotkwe nemberek hunogo hobagagi andi aro,” iluk yagatikhe.

¹⁰ A'nogo yagatikhe andi re, at Abraham ebe ninggi'nogo were'ma. Agap enggalimo mene palek oba a? Athe, pale'lek oba a. Andi re, agap enggalimo mene palek oba lek. Oan pale'lek oba aro.

¹¹ Agap enggalimo mene a'nogo oan pale'lek logolik endawinggen Allah oba himbiret fesikhemo re, at Allah nen he, ”Wene hoba mene korogo wokhigirik, hambotkwe nemberek hunogo hobagagi,” iluk yagatikhe. A'nogo yagatikhemo inendawinggen wenggelogo logouwageluk, ”Hagap henggalimo mene palan,” iluk yagatikhemo palasikhemo re, enegat agaikhe andi. Andi nen he, afuni inagap inenggalimo mene a'nogo pale'lek logolik, inendawinggen Allah oba himbiret fagarek mene halok mondogat he, ineisena Abraham aro. It a'nogo inendawinggen eberogoat Allah oba himbiret fugunem aren he: ”Hinobabut higithogo hilingiti logou hak hinendawinggen noba himbiret fegepma, wene hinoba mene korogo wokhigirik hinambotkwe ninom hunogo hinobagagi andiaro,” iluk yagaisikheregat andi.

¹² Ninomba Abraham andi agap enggalimo mene a'nogo pale'lek logolik, endawinggen Allah oba himbiret fesikhe hak, nit ninagap ninenggalimo mene a'nogo nek palek halok, Abraham ninomba ugun elo'lego. Athe, Abraham obabut waganogo ninendawinggen Allah oba himbiret fogo mene halok, Abraham ninomba ugun aro.

Afuni inendawinggen Allah oba eberogo himbiret fugunem, aren abok isikhe mene ebe wanharek wene

¹³ At Allah nen he, Abraham mel yagatikhe: ”Kweangma o yi awi ti awi mondogat he, hat inom, haren tagongge mene inom, hinom eisewerek asugun o,” iluk abok yagaisasikhe. A'nogo yagaisasikhe andi re, wene aren komotninafikhe wene a'nogo hologo higithogo hilingiti lagaukwaba yagaisasikhe fuk. Lego. We, at endawinggen Allah oba himbiret fesikhemo, at Allah nen he, ”Wene hoba mene korogo wokhigirik, hambotkwe nemberek hunogo hobagagi,” iluk yagatikhe andiba kweang abok yagaisasikhe andi.

¹⁴ Afuni wene Allah nen komotninafikhe wene andi inesanggo hologo higithogo hilingitarek mene nek Allah nen abok isikhe mene andi eisewerek aga logoilepma re, ninendawinggen Allahba we tulemat himbiret fikhi logoilo. Nen, abok yagaisasikhe mene andi lek a'lebaro.

¹⁵ Wene Allah nen komotninafikhe mene andiba re, Allah a'mage ninoba fikherek. Meneat he, wene komotninabilep le'ma re, wene sebelogo weak hilingiri'lagwi, iluk ilep legaro.

¹⁶ Halok he, Allah obabut fano nen weat wo'nisikherek, iluk uageluk he, ninendawinggen at oba himbiret fugunem abok isikhe mene andi wo'nisikherek. Nit aren tagongge mene wene Allah nen komotninafikhe wene andi hologo higithogo hilingiti logolik, ninendawinggen Allah oba eberogoat himbiret fogorek mene halok enek wo'nisikherek fuk. We, Abraham it ekhe ninom mondogat nineisena atma re, it andi at Abraham endawinggen Allah oba himbiret fesikhe andi hak, inendawinggen Allah oba himbiret fagarek mene halok wogisikheregaro.

¹⁷ Wene andi faget Allah nen Abraham mel yagatikhe: ”Yi afuni ti afuni inunggulenu hokhorogoat ineisena re, hat menhobagagi o,” iluk yagatikhemo lisu palogo fesukwa. A'nogo yagatikhemo re, at Abraham endawimo nen he, ”At Allah re, afuni warek mene inelugerinafik, nen, yi mene ti mene lek mene aneba weregetfigik, ikherek mene nen abok yaganete andi eberogoat yaganete o,” iluk endawinggen oba himbiret fesikhe andi.

¹⁸ At Abraham en he, ”An nen tagongge mene a'nogo hilinglasugun,” iluk endawimo anggagain mondok le'maat he, ”Eberogoat hilinglasigin,” iluk endawinggen Allah oba himbiret fuluk mondok hilingiti lagaikhe andiba, Allah nen he, ”Haren tagongge mene mondok hokhorogo yi'nogo hilinglasugun o,” iluk abok yagatikhe higithogoat, yi afuni ti afuni inunggulenu hokhorogoat ineisena Abraham at agaikhe andi.

¹⁹ Ap Abraham onggwaregen he, ”An nebe 100 tahun hangge welagari'mo re, nomame legagasik, nagainafuri taginabigin mondok elo'legagi. Nen, nagwe Sara ebe re, abiliat,” iluk elu welagaikhe meneat he, endawinggen Allah oba himbiret fesikhe mene andi, endawimo pugagi'lek himbirik mondogat welagaikhe.

²⁰ Abraham endawinggen Allah oba a'nogo himbirik mondok logolik, ”Allah nen abok yaganetikhe a'nogo, eberogoat hilinglasigin a? Legasigin a,” iluk menenei ebeti'lek welagaikhe. A'nogo endawinggen Allahba himbiret fuluk welagaikhe andiba omamet fugunem Allah fogerati lagaikhe.

²¹ A'nogo fogerati logolik, ”Allah re, yi mene ti mene hilingisigin elok enek a'nogo nen abok yaganetikhe andi, ebe asigin aro,” iluk menenei katokhogoat welagaikhe.

²² A'nogo hilingiti lagaikhe andiba, Allah nen he, ”Hobabut higithogo hilingiti lagen hak, hendawinggen noba himbiret fegenma, wene hoba mene korogo wokhigirik hambotkwe nemberek hunogo hobagagi andi aro,” iluk yagatikhe.

²³ At Allah nen, ”Wene hoba mene korogo wokhigirik hambotkwe nemberek hunogo hobagagi o,” iluk yagatikhemo re, lisu palogo fesukwama werek andi re, at Abraham faget enek fuk.

²⁴ Nit faget inomat yaganisasikhe o. Halok, nit ogo re, ninendawinggen nineisena Allah ninoe Enupogot Yesus wa'lagaikhesi'mo nen eluget fesikhe mene a'nogo oba himbiret fogorek andi nen, aren he, ”Hinobabut higithogo hilingiti lagep hak, hinendawinggen noba himbiret fegepma, wene hinoba mene korogo wokhigirik hinambotkwe ninom hunogo hinobagagi andi aro,” iluk yaganisikheregat.

²⁵ At Allah nen he, nit at ane sebelogo herakfisaluk weak hilingiti lago andi nen he, Yesus ebe afuni nen wasuageluk pelakfei wagaikhemo ebe watukwama re, hobuk, ”Wene hit hinoba mene korogo wokhigi,” iluk, At ninom ninambotkwe hunogo ninobagaigeluk eluget fesikhe andi.