ROMA 3 - Allah Wene Fano Wene Hupla Inane

¹ A'nogo meneat he, it afuni ekhe nen he, ”It Yahudi mene fano,” iluk ili'lagwi andi, nenahalok ili'lagwi anggegep? Nen, inagap inenggalimo mene andi nenahalok palharek anggegep.

² Andi re, yi mene ti mene faget mondogat fano nek. Wene andi ebe furogo yagahisak. Ekhe re, Allah nen he, ”An nane it elok fisogo logogun,” iluk, irat yagaisikhi lagaikhe.

³ Mene re, it afuni Yahudi mene it fena wene andi hologo logolik inobabut humbunhogo hilingitarek lek andi nen ninggi'nogo hilinglasigin anggegep? It inobabut Allah ane hologo logolik humbunhogo logou lek andi nen he, Allah obabut humbunhogo hilingiterek mene andi lek a'luk obakhe nene hilingisigin anggegep?

⁴ Mondok lego. Afuni inebe lombok inane ineranen kagalogo ugu halok he, Allah ane eberogoat enek ikherek, iluk wene lisu palogo fikhi logolik he, mel isukwa: ”Hat Allah hane eberogoat enek ugunem eberogoat enek hilinglagarek. Afuni nen mabenet hobagauwogeluk ugunem he, hat he, maben agik lek. Homame nek agendego,” iluk lisu palogo fesukwa andi.

⁵ Menere, nit afuni nen he, ninobabut weak hilingitorek andiba nen he, Allah obabut higithogo hilingiterek iluk enegat hilinglagu halok, ninggi'nogo ugun. Afuni nen agarek hak ekhe ik. At Allah a'mage lagaluk weagerinaferek andi weak nogo?

⁶ Mondok lego. At Allah obabut weak logoilepma re, yi afuni ti afuni kweangma mene yoma, inobabut palogo nen wene inoba figik, kotik, ninggi'nogo ilep?

⁷ Mene re, hat ekhe nen ikhi logolik he: ”An nane nen pelalogo igirek oba, Allah ane eberogoat, iluk, enegat mondok ari'logo andi. A'nogo enegat agunem he, it afuni ekhe nen Allah ebe fogerari'lagwi andi. Halok he, an nobabut palogo re, at Allah nen, At weak hilingiri'logo, iluk wene nenahalok noba fagain,” iluk elok ugun nogo?

⁸ It afuni ekhe nen he, ”Paulus lagen mel ili'lagwi: Nit weak hilingitunem wurep oba Allah fogerasuageluk, weak hilingiti logouwok,” iluk, ineranenat kagalogo ninabok pali'lagwi andi. Afuni a'nogo agarek mene andi re, Allah nen wene inoba fou hagat fagain o.

Afuni inobabut higithogo hilingiti'lek weak enek hilingitarek wene

⁹ Halok he, nit Yahudi mene nek he, fano agu kwelek, it endakwe mene nong asugun ugun nogo? Mondok lego. Afuni Yahudi mene inom, Yunani mene inom, mondogat lambukhogo weak mene awe a'ma logolik weak hilingitarek enek iluk attak yagahisigi andi.

¹⁰ Allah nen a'nogoat isikhemo, lisu palogo fikhi logolik, mel isukwa: ”Afuni inobabut higit hilingitarek mene ekhe lego. Misigat halok ekhe legaro.

¹¹ Nen, afuni wene futfili'lagwi mene ekhe legaro. An Allah nebe furogo inelu asuogeluk hera'nabi'lagwi mene ekhe legaro.

¹² Inebe mondogat an noba higithogo wagi'lek, kwe kwanirogo arat nong agaikhasik alomat lagaikha. Inobabut fano hilingiri'lagwi mene ekhe legat. Misigat halok ekhe legaro.

¹³ Afuni inebe warek fisagarek oba nen, amben wuliferek hak, it inane amben weak mene wulafik, inameli handogalse'ma re, afuni lalinafik, kisu aigen libilinafunem wa'lagaikharek hak, it inambeba weagerinafik, ili'lagwi andi.

¹⁴ Inane puk wea'ma re, homan fisili'lagwi mene inendawimo peterek logolik ugu mondok werek.

¹⁵ Afuni inebe inoasuogeluk halok he, ineisok a'ne weak lili'lagwi.

¹⁶ Afuni o yi awi ti awi inebe weagerinafik, inendawimo weaget fisigik, ilik lili'lagwi andi.

¹⁷ Afuni ekhe inom fano lambukhogo logou re, inonggoro.

¹⁸ An Allah agaukhogo yaganetarek mondok legaro,” iluk isikhemo wene lisu palogo fesukwa.

¹⁹ Wene Allah nen komotninafikhe wene andi, it hologo logogun mene nek yagaisasikhe, iluk nit ninelu. Allah alegaren afuni o yi awi ti awi mondogat wene inoba figik, kotik, ugunem, at ekhe nen wene oba koragain elo'lek asuageluk komotninafikhe andi.

²⁰ Wene Allah nen komotninafikhe wene andiba re, nit afuni weak hilingitorek mene fagikherek andi nen he, nit mondogaren wene aren komotninafikhe wene andi hologo logolik, at eilhanem higithogo hilingisugun elo'lego. Hologo hilingiti logoumo, aren hobuk ninom hunisogo ninobagau meneat he, elo'lego.

Afuni inendawinggen Yesus oba himbiret fugunem he, hobuk Allah inom hunogo fisikherek wene

^21-22 A'nogo meneat he, yogondak Allah nen, at ninom hunogo ninobagagin wene sele'matfikhemo werek. Andi re, komotninafikhe wene andi hologo higithogo hilingiti lagoma nen, hobuk hunogo ninobagaigeluk isikhe fuk. Athe, nit ninendawinggen Yesus Kristus oba himbiret fugunem hunogo ninobagaigeluk isikhe o. A'nogo hunogo ninobagagin iluk, abok wene aren komotninafikhe wene a'nogoba igik, at ane yagaisikhi lagaukwa mene nen igik, isukwa higithogoat hunogo ninobagaigeluk isikhe andi. Andi re, nit afuni mondogat ninendawinggen Yesus oba himbiret fogorek mene hunogo tomok lek. We, ninom higithogo hunogo ninobagaigeluk isikhe o.

²³ Nit afuni mondogat attagaren weak hilingitorek andiba, Allah ebe fogeratu mondok welagaikharek mene andi herakfisaluk ninale'ma yatma asi lagagusik welago.

²⁴ A'nogo were'ma, at weak mene nen hele warogo fetninarek were'ma, at Allah obabut fano nen Kristus Yesus nen we onggo lek hele fikhalogo telninabuageluk lakfei wagaikhe. A'nogo telninafi logolik, wene ninoba mene korogo wokhasikhesik, Allah ninom ninambotkwe hunogo ninobagasikhe andi.

^25-26 Attagat, at Allah nen he, nit afuni weak hilingitu kwelek, ninoati'lek afe morogo welagaikhesigen, yogondak at obabut higithogo hilingiterek a'nogo enegat hilinglasuageluk, Yesus lakfei wagaikhe. Wagaikhemo ebe watunem amep pisikhe andiba, nit afuni ninendawinggen at oba himbiret fogo mene halok, at ninom ninambotkwe hunogo ninobagauwageluk lakfei wagaikhe andi. Allah nen nit afuni ninendawinggen Yesus oba himbiret fogo mene halok, wene ninoba mene korogo wokhaluk at ninom ninambotkwe hunogo ninobagakhi logolik he, at higithogoat hilingiterek iluk yogondak obabut enegat hilinglaga andi.

²⁷ A'nogo hilingninaferek andi nen he, ninonggwaregen fogerakhikhi logogun nogo? Fogerakhogoin mondok legaga o. Ninggi'nogo nen nogo?. Nit ninonggwaregen wene Allah nen komotninafikhe wene higithogo hilingirikhi lago andi nen ninambotkwe hunogo ninobagasikhe nogo? Lego. Ninendawinggen at oba himbiret fugunem, arenat hunogo ninobagaikherek andi nen, fogerakhogoin elo'lego.

²⁸ Wene andi faget nit futfogoin he, yi'nogo. Niren wene Allah nen komotninafikhe wene a'nogo fisogo logolik higithogo hilingitunem, nit weak hilingitorek mene legetfisaluk, at ninom ninambotkwe hunogo ninobagaikherek fuk. We, ninendawinggen at Yesus oba himbiret fugunem, ninom hunogo ninobagaikherego.

²⁹ At Allah re, nit afuni Yahudi mene nek nineisena nogo? It endakwe mene ninomat nineisena lek nogo? Eberogoat afuni endakwe mene ninomat nineisena o.

³⁰ At Allah ebe misigat andi nen he, nit afuni ninagap ninenggalimo mene palek mene ninendawinggen at oba himbiret fugunem he, wene ninoba mene korogo wokhaluk at ninom ninambotkwe hunogo ninobagagik, nen it afuni inagap inenggalimo mene a'nogo pale'lek mene inendawinggen at oba himbiret fugunem he, a'nogoat fisigik, hilingiterego.

³¹ Halok he, ninendawinggen at Yesus oba eberogoat himbiret fikhi logolik, wene Allah nen komotninafikhe wene a'nogo sebelhi lago he a? Lego. At ane andiat legeisogo fikhi lago.