ROMA 2 - Allah Wene Fano Wene Hupla Inane

At Allah nen afuni mondogat wene inoba figik, kotik, ikherek wene

¹ Andi halok he, hit nerugwi nagaila'lak yi. Wene it ekhe nek inoba fikhi logolik he, hit hinonggwarek hinoba nonggologoin elo'lego. Wene a'nogo wene it ekhe inoba fikhi logoligat he, hiren it hinom higirat hilingiti lagep yoma ri! Hinonggwaregen wene hinoba mondok fakhikhi lagebo.

² Afuni inobabut a'nogo hilingitarek mene halok, Allah nen wene inoba higithogoat fikherek, iluk ninelu o.

³ Hit nerugwi nagaila'lak yi. Hiren, it ekhe weak hilingitunem wene inoba fikhi logolik he, hinonggwarek ogore, it hilingiri'lagwi hagat hinom higirat hilingiti lagep yi ri! Hit hinendawimo nen he, ”Allah nen wene ninoba figi'lek herakninobagagin,” iluk anggikhi lageba? Wene hinoba fagain aro.

⁴ ”At Allah obabut fano mondok, enago lioksek,” iluk, hinendawimo sebelfikhi lageba? Hit hinendawimo nen he, ”Allah obabut fano nen nit weak hilingiti lago mene herakfisaluk ninobabut hebelasuageluk, ninendawimo kagalherek,” iluk hinonggot nogo? Hinelu aro.

^5-6 Inane hologo hinobabut hebelhi'lek yi ri! O wurep oba Allah a'mage lagambik he, afuni inebe lombok inobabut hilingitarek higithogoat, weinamat wene inoba figik, kotik, igin andi sambul, hit wene hinoba fouwageluk hinonggwaregen wene hinoba fakhugu mondok welagep yi ri!

⁷ At Allah nen he, it afuni fena nen inebe fogerinafarek mene inom, agaugwerinafarek mene inom, fili agarek lek mene inom, eise asuogeluk inafe morogo logolik inobabut higit hilingitarek mene halok, inebe ineluk mondok logouwageluk hilinginabigin.

⁸ A'nogo meneat he, it afuni fena nen inonggwarek faget enek hilingiti logolik, ebe wene ugunem inesanggo hologo hilingiti'lek herakfisaluk, weak wene nek inesanggo hologo hilingitarek mene andi, Allah a'ma kwe het-pet imbik wene hokhorogo inoba fagain o.

^9-11 At Allah re, afuni inagap oba nek eilenggen isaluk, ekhe elokhoma fisigik, ekhe ambotma fisigik, ikherek lek andi nen he, it afuni ekhe inobabut weak hilingitu mondok welagaikharek mene inebe lombok he, heinet warogo yi enggin ti enggin hoageluk hilinginabigin. Meneat he, it afuni ekhe inobabut fano hilingitu welagaikharek mene, inebe lombok he, inebe fogerinafarek mene inom, agaugwerinafarek mene inom, inendawinggen hambukhogo welagaikharek mene inom, wogisagain. A'nogo hilinginabigin andi re, attak it afuni Yahudi mene, hobuk it afuni Yunani mene inunggulenu lombok ekhe inomat, higithogo nek hilinginabigin o.

¹² It afuni endakwe mene wene Allah nen komotninafikhe wene a'nogo inonggot logolik weak hilingitare'ma andi nen he, wene andi inonggot logoligat nong asugun o. Meneat he, it afuni Yahudi mene wene andi inelu logolik weak hilingitare'ma andi nen he, wene andiba inanema waganogo wene inoba fagain o.

¹³ Wene Allah nen komotninafikhe wene a'nogo inelu andiba, wene inoba mene korogo wokhikherek fuk. We, wene ebe komotninafikhe mene higithogo hilingitarek mene halok, wene inoba mene korogo wokhikherego.

¹⁴ It afuni endakwe mene wene Allah nen komotninafikhe wene a'nogo inonggot meneat he, wene ebe isikhe mene higithogo hilingitarek andi nen, inonggwarek inendawimo wene komotninafikhe wene andi hanggeat werego.

^15-16 Wene andi inendawinggen oba lisu palek hangge werek iluk, it inobabut hilingitarek meneba enegat werek. A'nogo were'ma andi nen he, hobuk o wurep oba Allah nen Yesus Kristus ayonggo fugunem, aren afuni inendawimo yi wene ti wene hinago welagarek mene andi mondogat fakhogo wene inoba figik, kotik, ugunem, it inonggwarek inendawimo menenei ebeti logolik, ”An eberogoat weak hilingitimo,” iluk wene inoba fakhigik, ”Lek, an fano hilingitimo,” iluk wene inoba korigik, ugun o, iluk wene fano weneba isikhemo, an nen yagahisasigi anggigi.

”Afuni Yahudi eberogo mene sani,” iluk yagaisasikhe wene

¹⁷ A'nogo meneat he, hiren he, ”Nit ninebe Yahudi eberogo mene,” iluk ikhi logolik, hinendawinggen wene Allah nen komotninafikhe wene a'nogoba himbirik logolik, ”Allah andi nit nineisena o,” iluk fogerakhikhi lagep yoma ri!

¹⁸ Hiren, ”Allah endawimo nen he: Yi'nogo hilingisuak ti'nogo hilingisuak, iluk endawimo anggikherek mene andi ninelumo re, yi fano, yi weak, iluk Allah nen komotninafikhe wene fut fembigen higithogo hilingisugun,” iluk futfikhi lagep andi.

¹⁹ Hiren he, ”Afuni ineilenggen mum mene niren ninenggi fagaisogo elok woginarek logoin. Nen, ninebe esage ibilik hilingi'mo re, afuni o mum oba welagaikharek mene andi elok selegerinabugun.

²⁰ Nen, wene Allah nen komotninafikhe wene a'nogo niren fisogo welagoresi'mo re, yi wene ti wene ninelu logolik wene eberogoat mene nek yagaisogorek andi nen he, afuni inendawinggen mum mene yagaisigik, yenggerugwi mene wene yagaisigik, elok ugun o,” iluk ikhi lagep andi.

²¹ A'nogo it afuni ekhe yagaisikhi logoligat he, hinonggwarek yanggulikhi lagep lek yoma ri! Hiren ikhi logolik he, ”Yogot wanhubo,” iluk it ekhe yagaisikhi logoligat he, hit hinonggwarek yogot wanhi lagep yoma ri!

²² ”Hemi pailak fakfisagubo,” iluk yagaisikhi logoligat he, hit hinonggwarek pailak fakfisikhi lagep yoma ri! ”Tugwi kembu re ninabit,” iluk ikhi logoligat he, yi mene ti mene tugwi kembu aiba were'ma hinenggi abisak wanhi lagep yoma ri!

²³ ”Wene Allah nen komotninafikhe wene at Musa nen yaganisasikhe wene a'nogo an nelu o,” iluk ikhi logoligat he, wene andi herakfisaluk weak hilingitunem, it ekhe nen Allah enu ikhi logolik abok weak ili'lagwi andi, hiren Allah enu weagetfikhi lagep yoma ri!

²⁴ Hit hilingiti lagep andi faget, Allah ane lisu yi'nogo palek werek: ”Hit hinobabut a'nogo hilingisugun oba it afuni endakwe mene nen, Allah enu ikhi logolik, abok weak ikhi logogun o,” iluk isikhemo wene lisu palogo fesukwa hagat hilingiti lagebo.

²⁵ Hit he, wene Allah nen komotninafikhe wene a'nogo hologo hilingiti lagep halok he, hinagap hinenggalimo mene palhi lagep andi re, fano mondok ugun. Meneat he, wene andi hologo hilingiti'lek halok he, hinagap hinenggalimo mene palhi lagep andi alemarogo palhi lagep andi nen he, palek lek mene hak welagebo.

²⁶ Nen, it afuni ekhe inagap inenggalimo mene palek lek logolik, wene Allah nen komotninafikhe wene a'nogo hologo hilingitu halok he, at Allah nen he, inagap inenggalimo mene palek lek meneat he, palek mene hangge igin lek nogo? Palek mene hanggeat igin o.

²⁷ Nen, hit Yahudi mene, wene Allah nen komotninafikhe wene a'nogo hit eise logolik, hinagap hinenggalimo mene palhi lagep meneat he, wene andi hologo hilingiti'lek, sebelogo herakfisaluk weak hilingiti lagep andi nen, afuni ekhe inagap inenggalimo mene palek lek meneat he, wene Allah nen komotninafikhe wene andi higithogo hilingiri'lagwi andi nen he, iren wene hit hinoba fogoin o.

²⁸ Afuni Yahudi eberogoat mene andi ebe re, weinam mene andi fuk. Nen, inagap inenggalimo mene palharek andi ebe re, inagap inenggalimo mene palek andi legaro.

²⁹ Afuni Yahudi eberogoat mene re, ”An nebe Yahudi mene nagap nenggalimo mene palek welagi,” iluk suesinggaba lisu palogo fagarek andi faget fuk. Lego. We, inagap palek ebe mene re, inagap inenggalimo mene palu hak, Allah Areagun en inendawinggenma mene horogo wulaferek andi aro. Afuni inendawinggen a'nogo horek werek halok he, afuni ekhe nen fogerinafarek lek. We, at Allah nenat fogerinaferego.