ROMA 15 - Allah Wene Fano Wene Hupla Inane

”Hinonggwarek faget hilingiti'lek, hinerugwi hinagaila'lak inendawimo fanorogo hilingiti logogun,” iluk yagaisasikhe wene

¹ Nit ekhe, ninendawinggen Allah oba wurikhogo himbirik welago mene nen, ninonggwarek faget enek ninendawimo fanorogo hilingiti'lek, we, it ekhe inendawinggen oan abolok werek mene andi, leberisikhi logogun o.

^2-3 Allah aneba wene mel iluk lisu palogo fesukwa: ”Hat Allah wenakheta mene re, an noba aga o,” iluk lisu palogo fesukwa higithogoat, at Kristus nen he, onggwarek faget endawimo agaiyek anggikhi logoigeluk hilingiti lagaikhe lek. Andi nen, nit ninebe lombogen he, ninerugwi ninagaila'lak inendawinggen Allah oba himbiret fuluk inendawinggen wurik a'luk fano asuageluk, inendawimo fanorogo hilingiti logouwogo.

⁴ Allah ane lisu palek andiba re, ninafe morogo welagik, ninendawimo fano agik, ogorek andi nen he: ”Fano asigin,” iluk Allah oba eberek logouwageluk, nirat komorogo Allah aneba fageat lisu palogo fesukwa andi.

^5-6 Hit hinendawinggen, hinane, misigat logolik, ninoe Enupogot Yesus Kristus eisena Allah andiat fogerati logobagaigen he, at Allah nen afuni inobabut inafe morogo logouwageluk hilinginafik, inendawimo fanorinafik, ikherek mene andi nenat, hit mondogat hinendawinggen misigat, at Kristus Yesus obabut hangge hilinghinabuago.

”Fano wene andi, afuni endakwe mene inesanggo holugun higirat,” iluk yagaisasikhe wene

⁷ Afuni nen at Allah fogerati logouwageluk, at Kristus nen hit hinebe wokhinafikhe hak, hit ekhe nen it ekhe woginafik, it ekhe nen hit ekhe wokhinafik, hit-hit wok-wok ikhi logoino o.

⁸ Wene andi faget ekhe yagahisak. At Kristus wagaikhesik he, it inagap inenggalimo mene palek Yahudi mene omanogo inawe a'ma kwisikhe andi. A'nogo kwisikhe andi re, Allah nen he: ”An nen yi'nogo hilinginabigin o,” iluk ninambulak abok yagaisikhi lagaikhe a'nogo eberogoat ebe agik,

⁹ nen, it afuni endakwe mene Allah nen endawirinafikhe andi nen fogeratik, uageluk, Yahudi mene inawe a'ma kwisikhe andi. Wene andi faget Allah aneba lisu yi'nogo iluk palek werek: ”Andi nen he, an it afuni endakwe mene inanggele'ma logolik, hat fogethafik, wuni wati logolik hapne wanhik, ikhi logogin o,” iluk isikhemo lisu palogo fesukwa.

¹⁰ Ekhe mel iluk lisu palek weregat: ”Hit afuni endakwe mene it Allah againafuri aren wenaginafikhe mene hinom hinendawimo hinagaiyek hikhi logoino o,” iluk isikhemo lisu palogo fesukwaat.

¹¹ Nen, ekhe re, wene mel isikhe: ”Hit afuni endakwe mene mondogaren ineisena Tuhan fogeratik, inunggulenu lombogen at fogeratik, ikhi logoino o,” iluk isukwama lisu palogo fesukwaat.

¹² Nen, ekhe re, at Yesaya nen he, mel iluk lisu palogo fesikheat: ”E mutarek mene andimiba nen asimit lagaikherek hak, at Isai nen tagongge mene ekhe weinam asigin. Weinam agunem he, it afuni endakwe mene at awe a'ma logolik, aren fano'ninabigin, iluk at oba eberek logogun o,” iluk lisu palogo fesikhe.

¹³ ”Hobuk fano asigin,” iluk ninendawimo ninagaiyek hogorek andi, ero at Allah nenat hilingninaferek. Hit a'nogo hinendawimo agaiyek hokhorogo hikhi logouwageluk Allah Areagun omameba hilinghinabuak. A'nogo hilinghinabuagen he, hinendawinggen at oba himbiret fesigip andiba himbiret fuluk were'ma, aren hinendawimo agaiyek hokhorogo hikhi logouwageluk hilinghinafik, hinendawinggen hambugethinafik, uago.

Paulus nen he, ”Allah nen nayonggo fesikhe andi nen, fano wene yagaisilik nikhi lagi,” iluk yagaisasikhe wene

¹⁴ Nerugwi nagaila'lak. Hit hinobabut fano mondok logolik, yi wene ti wene hinelu mondogatma, hit-hit komo-komo ugun elok welagep andi, an nelu o.

¹⁵ A'nogo meneat he, at Allah obabut fano nen an nayonggo fesikhe andi nen, wene ekhe andi suesingga yiba nailo lekhogo ebethisigi andi.

¹⁶ An nebe at Kristus Yesus awe a'ma logolik afuni endakwe mene woginabuageluk nayonggo fesikhemo, at Allah endawimo fanorogo Areagun andiba it inebe Allah awe a'ma inobagauwageluk, at ane fano wene andi yagaisilik nikhi lagi o.

¹⁷ Kristus Yesus nemberek hundik logolik he, Allah faget fano hilingiti lagi o, iluk fogerakhogoin fano.

¹⁸ An nen wene hunogoat mene u nailo. We, it afuni endakwe mene Allah nen awe a'ma fisoageluk he, at Kristus nen nayonggo fesikhesik wene igik, enggi nen hilingitik, ilik wagaikhe andi nailo legat igin.

¹⁹ At ebe futfouwageluk Allah Areagun omameba elalin mene nikhogo hilingitik, inailo asu mene hilingitik, hilingitu kwelek he, an he, o Yerusalem andoma nen lagakhogo pikhit o Ilirikum andoma, at Kristus awene fano wene andi furogo yagaisaluk wagi.

^20-21 Wene a'nogo iluk lisu yi'nogo palogo fesukwama werek: ”It afuni ekhe, at abok holhi'lek mene ineilenggen higik, nen it wene holhi'lek mene nen futfigik, ugun o,” iluk lisu palogo fesukwa higithogoat yagaisaluk waga logolik, it afuni ekhe nen he, o tik watfoumo an nen o ebe wusu lek hak iluk, nendawinggen tulem he, afuni Kristus enu inesanggo oan holhi'le'ma andoma fano wene yagaisilik wesigin iluk anggasigi.

At Paulus nen o Roma lageluk wene warisasikhe wene

²² Wene a'nogo yagaisilik nikhi lagi andi nen, hundik-handigat hit neilenggen hisageluk hinoba wesigeluk ugunem he, wesu re elo'lek ari'logo.

²³ Mene re, an o yoma logolik hilingisu mene arat hilingiti o. Halok, o fageat andoma nenat hit neilenggen hisa wesigeluk nendawimo anggasigimo re, yogondak arat wesigin o.

²⁴ Yogondak o Spanyol laga logolik, hit hinebene fa'larik wesigeluk nendawimo anggikhi lagi o. Hit hisa wagi halok he, nendawimo nagaiyek hikhi logolik nenggi endebat ninom logombigen, hiren o Spanyol andoma laknobagaumo lagain anggikhi lagi o.

^25-26 It afuni o Makedonia mene inom, Akhaya mene inom. inomen inendawimo kagalogo it mene andogorogo it afuni Allah againafuri inenggi lek mene ekhe o Yerusalem welagaikharek mene andi fisaga mene werek andi nen, yogondak an nen waluk leberisageluk o Yerusalem lagain o.

²⁷ It afuni Yahudi mene nen it endakwe mene inebe fano asuageluk Allah ane wogisasukwama nen, iren hobuk lagokhogo yi mene ti mene inalabut faget leberisogoin higit obaat a'nogo inendawimo kagalogo fisagama o.

²⁸ A'nogo arat fisaga mene andi, a'nogo Allah faget fisaga mene andi an nen it Yerusalem mene arat wogisa lagi halok he, o Spanyol lageluk waga logolik, hinoba fa'larik wesigin o.

²⁹ An arat hisa wagi halok he, at Kristus nen hit faget wo'netikhe mene mondogat wokhisa wesigin anggigi.

³⁰ Nerugwi nagaila'lak. Ninoe Enupogot Yesus Kristus andiat iluk, nit-nit nendawi-hendawirogo logouwageluk Allah Areagun en hilingninaferek a'nogoba, an faget he, ninom samban Allah ayonggo ninghogo fikhi logouwogeluk yagahisigi o.

³¹ It afuni o Yudea mene inendawinggen Yesus oba himbiret figi'lek mene nen nebe inenggi faknobagainogo iluk, ninom Allah nen telnabuageluk inom, nen, afuni Allah againafuri o Yerusalem mene faget andogorogo fisaga mene andi, waluk leberisa lagunem he, fano wanuageluk inom, samban fanorogo ikhi logoino o.

³² O Yerusalem lambigen, at Allah endawimo nen fano anggikhe halok he, an nendawimo nagaiyek hilik-hilik hinoba wesigin o. Wesimbik ninom logolik he, set walagain andi.

³³ Allah nen afuni inendawinggen hambuget fikherek mene a'nogo, hit mondogat fethinarek logouwageluk, ikhi logolik, ”Ebe asuak,” u hak, ”Amin,” iluk igi andi.