ROMA 14 - Allah Wene Fano Wene Hupla Inane

”Hinerugwi hinagaila'lak hinendawimo nen wenagisogoin lego,” iluk yagaisasikhe wene

¹ Hinerugwi hinagaila'lak ekhe inendawinggen Allah oba furogo himbiret figi'lek oanat werek mene andi, it inobabut he, ”Yi'nogo hilingisugun, ti'nogo hilingi sugun,” iluk agarek mene andi faget wenagisigi'legat woginafi logoino o.

² It ekhe inendawinggen Allah oba himbirik logolik he, yi mene ti mene hesanggeat ninggi logogun, iluk anggaluk nenggarek. Meneat he, it ekhe inendawinggen oan mene re, sumburu inom, eremengga inom, andi nek nenggarek.

³ It hesanggeat nenggarek mene andi inebe Allah nenat woginafemo. Halok, it nenggarek lek mene andi inendawimo nen, ”It weago,” iluk wene inoba fogoin lek. Nen, it nenggarek mene andi nen he, it nenggarek lek mene andi inendawimo sebelfisogoin legaro.

⁴ Ap ekhe inamingmingengge meneat he, hiren he, wene inoba fogoin nogo? ”At yi weak hilingite, Hu'la'nik,” nen, ”At andi fano hilingite, mendek logonik,” iluk it inoe kain andi nenat igin o. Mene re, mendek logouwageluk he, At Tuhan yagaisagain elok mene nenat yagaisamo mendek logogun o.

⁵ It ekhe nen he: ”O we sambul yi mene ti mene hilingisugun enek meneat he, o yogondak yi sambul enek he, hilingisugun lek,” iluk anggugu kwelek, it ekhe nen he, ”O yi sambul ti sambul higit enek,” anggagarek andi, inebe lombok inendawimo a'nogo anggikhi logogun enego.

⁶ It ekhe nen he: ”O yogondak yi sambul enek he, yi mene ti mene hilingisugun lek,” iluk agarek mene andi, At Tuhan fagerat anggagarego. Nen, it ekhe yi mene ti mene hesanggeat nenggarek mene andi re, At Tuhan fagerat ninggi logolik he, Allah hai watarek andi. Nen, it nenggarek lek mene andi, At Tuhan fagerat ninggi'lek logolik he, Allah hai wataregat andi.

⁷ Ninebe lombok he, ninonggwarek faget enek nineluk welagik, wa'lagik, ikhi lago fuk.

⁸ We, nit nineluk welago halok Nineisena Tuhan fagerat welago. Nen, wa'lasugun halok at fagerat wa'lasugun o. Halok he, nineluk logogun inom, wa'lasugun inom, at faget enek welago.

⁹ Wa'lagaukwa mene inom, nineluk mene inom, lambukhogo faget, at Kristus nit ninobaget Enupogot logoigeluk, wa'lagaikhesik eluk agaikhe andi.

¹⁰ Nerugwi nagaila'lak. Nit ninebe mondogat Allah nen ninanema wanigin oba logoin meneat he, hit hinerugwi hinagaila'lak hinom hinendawinggen Allahba himbiret fikhi lagep mene andi, nenahalok wene inoba figik, hinendawimo sebelfisigik, ikhi lagep?

¹¹ Allah nen he, mel yagaisasikhe: ”An hineisena Tuhan neluk mondok welagirek mene nen nane eberogoat yagahisak. Afuni inebe lombok he, an nawe a'ma kwi wesimbik iren he, Allah hararo, iluk inambeba lombok fakhogo yaganesugun o,” iluk yagaisasikhemo lisu palogo fesukwa.

¹² Hobuk he, ninebe lombogen, ”An yi'nogo hilingitigimo, ti'nogo hilingitigimo,” iluk, wene fakhogo at Allahat yagasugun o.

”Hinerugwi hinagaila'lak weaget fisogoin lek,” iluk yagaisasikhe wene

¹³ Andi nen he, nit-nit ekhe nen, ekhe wene oba figik, ekhe nen, ekhe wene oba figik, ikhi logogun lego. Niren he, ninerugwi ninagaila'lak ninom ninendawinggen Allah oba eberogoat himbiret fikhi lago mene, weagerinafik, inendawimo kwanit fisigik, inogo iluk hinobabut fanorogo hilingiti logoino o.

¹⁴ Yi mene ti mene nenggarek mene andi ebe re, wesa lek, iluk an Tuhan Yesus nemberek hundik logolik nelu o, futfigi. Mene re, at ekhe endawimo nen he: ”Andi mene wesa. Nogoin lego,” iluk anggikhe halok he, at faget he, nogoin legaro.

¹⁵ Nen, hat nenggendek mene andi nen hagailak endawimo weak aga halok he, ebe hendawirogo hilingiti lagen lego. Hagailak andi faget Kristus wa'lagaikhemo re, hat nagain andiba at ebe weagetfugun o.

^16-17 Allah awe a'ma logolik he, yi mene ti mene ninggik, herakfisigik, agarek andi ebe esin fuk. Ebe esin he, Allah Areagun inendawimo logolik, Allah endawimo amolo mene higithogo hilingitik, inendawinggen hambukhogo welagik, inendawimo inagaiyek anggigik, agarek andi nen he, hat hendawimo nen, ”An fano hilingiti lagi,” iluk anggikhi lagen mene re, it afuni ekhe nen habok weak inogo iluk he, a'nogo hilingiti logogun o.

¹⁸ Hit Kristus amingmingengge logolik, wene andi faget fano hilingiti logoumo, Allah endawimo fano agik, afuni ekhe inendawimo nen he: ”At andi fano,” iluk inendawimo anggigik, ugun aro.

¹⁹ Halok he, ninendawinggen hambukhogo logouwogeluk, nit-nit ekhe nen ekhe endawinggen wurigetfigik, ekhe nen, ekhe endawinggen wurigetfigik, ninghogo hilingiti logouwogo.

²⁰ Hat ninggi lagen mene andiba nen, Allah againafuri aren fano hilingisogo fisasikhe mene weagetfisagun o. Yi mene ti mene fano nogoinat mene re, ninggi logolik at ekhe weagetfegen halok he, hat weagat hilingiten o.

²¹ Haren he, wam kurik ninggik, enggen amusu ninggik, yi mene ti mene hilingitik, ugunem he, herei hagailak ekhe weak asigin andi nen he, ninggi'lek herakfisikhi logoumo fano.

²² Hat ekhe hendawinggen Allah oba himbirik logolik he, ”Hesanggeat elok hilingisugun aro,” iluk, hendawimo ebeti lagen mene andi re, Allah eilhanem honggwarek faget enek hilingiti logoino. Sa nen, ”An fano hilingiti lagi,” iluk anggikhi logolik wene onggwarek oba fakhigi'lek werek halok he, endawimo agaiyekhogo logouwago o.

²³ A'nogo meneat he, sa nen endawinggen Allah oba furogo himbiret figi'lek logolik: ”Yi mene elok nagain he a? nagain lek he a,” iluk menenei endawimo nen ebeti logolik nagain halok he, Allah nen wene oba fagain o. Inendawinggen Allah oba furogo himbiret figi'lek logolik he, yi mene ti mene hilingisugun halok, weagat hilingisugun o.