ROMA 13 - Allah Wene Fano Wene Hupla Inane

Kaindek pemerintah mene inane hologo hilingiti logogun wene

¹ Hinogogwi kaindek pemerintah mene andi, ero alek mene fugo. Ero at Allah aro. Arenat menfisasikhemo kain welagaikharek andi nen he, hit hinebe lombok it inane hologo logoino o.

² Andi nenat, sa nen it kaindek pemerintah mene andi inane holhi'lek hilingiri'logo halok he, at Allah inebe menfisikherek mene andiat inane holhi'lek hilingiri'logo o. Halok he, it afuni a'nogo hilingitarek mene andi re, inonggwaregen wene inoba fakhogoin o.

³ It afuni ekhe fano hilingiti logolik he, kaindek pemerintah mene andi, inailo lekhogo welagaikharek. Mene re, it ekhe weak hilingiti logoligat he, inailorogo welagaikharegat. Hiren it pemerintah mene hinailo lekhogo logouwogeluk he, hinobabut fanorogo hilingiti logoino. A'nogo hilingiti logogun halok he, iren fogethinabugun aro.

⁴ It pemerintah re, Allah nen menfisasikhemo, at amingmingengge logolik, hit fanorogo logouwageluk hilingiri'lagwi o. Mene re, weak hilingitep halok he, hinailorogo logoino. It sikhe waluk nikho andi, tulemat waluk nikho fuk. We, afuni weak hilingitunem he, Allah nen a'mage lagaluk wene inoba fou hak, it menfisasikhemo re, iren wene inoba fagarego.

⁵ Halok he, it inane hologo hilingisugun o. Kamo ugun elo'lego. Allah a'mage lagainogo iluk, inane hologo hilingisugunat mene re, andiba nek inane hologo hilingisugun fuk. Hinendawinggen enggin lek serogo logouwogeluk, it inane hologo hilingisugun aro.

⁶ Andi nenat, uang pemerintah faget kino ugunem wogisikhi lagep andi. It he, Allah awe a'ma logolik, at faget a'nogo ninghogo hilingitarek andi.

⁷ Halok, it wogisogoin meneat wogisikhi logoino o. Uang pemerintah nen yi mene ti mene faget kino ugunem wogisogoin higithogoat wogisigik, it inebe hinailorogo logogun higithogoat hinailorogo welagik, hinane agaukhogo yagaisogoin higithogoat agaukhogo yagaisigik, ikhi logoino o.

”Hinerugwi hinagaila'lak hinom nendawi-hendawirogo hinendawinggen hundik logogun,” iluk yagaisasikhe wene

⁸ Hit he, afuni ekhe mene hinoba palegengge logogun lek. We, hinoba palegengge logou hak he, hit-hit nendawi-hendawirogo hinendawinggen hundik logogun andi aro. Wene Allah nen komotninafikhe wene a'nogo mondogat higithogo hilingisu hak he, inebe nendawi-hendawirogo inendawinggen hundik logogun andi aro.

⁹ Wene andi komotninafi logolik he, mel isikhe: ”Pailak fakfisigik, it ekhe hilingisuageluk ugun lego. Afuni inebe inoasugun lego. Yogot wanugun lego. It ekhe inagarek mene hinendawimo nen he: Namolo e, iluk anggogoin lego,” iluk wene komotninafikhe andi inom, ekhe komotninafikhe mene inomat he, misigat lambukhogo wene esin hangge re, mel isikhe: ”Hit he, hinonggwarek hinebe hinendawinggen hundik welagep andi hak, it afuni ekhe hinom welagep mene andi, hinendawinggen hundik logoino o,” iluk isikhe andi.

¹⁰ Afuni ekhe inebe inendawinggen hundik logolik he, inebe weagerinafarek lek. Wene Allah nen komotninafikhe wene a'nogo mondogat higithogo hilingisu hak he, afuni ekhe inom nendawi-hendawirogo inendawinggen hundik logogun andi aro.

At Kristus wesigin sambul horogat asi waga, iluk yagaisasikhe wene

¹¹ A'nogo hilingiti logogun andi nenahalok. Andi re, nit attak ninendawinggen Allahba himbiret fesugu andem sambul he, o fanotninabigin sambul yatma welagaikhe. Mene re, yogondak he, horogat asi weri'logo andi nen he, hit nogo ikhi lagep andi, hineluk asugun higit aga andi, futfikhi lagebo.

¹² O hup welagosik wei igiluk werek andi nen, afuni o mum oba logolik hilingitarek mene andi herakfisouwogo. We, sikhe sige wanharesik inebe hebelogo welagaikharek hak, nit selek mene wanimbik hebelogo logouwok.

¹³ O selek oba logolik hilingitarek hak, ninobabut higithogo hilingiti logouwok. Seni naluk weak hilingitik, i hinago naluk lugulugwi palhik, agarek andi hak hilingisugun lego. Hesanggeat pailak fakfisigik, inenggali lek hilingitik, agarek andi hak hilingisugun lego. Wene palhik, pou igik, agarek andi hak hilingisugun legaro.

¹⁴ Hit hinobabut he, afuni inobabut inetogat logolik, yi wanile, ti wanile, iluk agarek andi hak hinendawimo kagalhi'lek he, we, sikhe sige wanharek hak, ninoe Enupogot Yesus Kristus obabut andiat wanino o.