ROMA 12 - Allah Wene Fano Wene Hupla Inane

Nineluk Allah faget fisaluk logogun wene

¹ Nerugwi nagaila'lak. At Allah ninebe endawi iluk wene ekhe hinendawimo wenggel fuluk, Allah anggo wareti lagaukwa hak, hinebe hineluk meneat, at onggwarek faget fisaluk, at endawimo fanorogo wogeti logoino o. At awe a'ma logolik he, at faget hilingisugun mene a'nogoat hilingiti logoino o.

² Afuni yoma hilingiri'lagwi mene andi inobabut wanhubo. Hinobabut ket hunogoat hilinglasuageluk, at Allah nenat hinendawimo ket mene hilinghinafi logouwago. A'nogo hilinghinafi logoumo re, at endawimo nen: ”Yi'nogo hilingisuak, ti'nogo hilingisuak,” iluk anggikherek andi ebe hinelu asigin o. Fano mene ebe andi aro. At Allah endawimo fanorogo hilingitik, inendawinggen wurik agik, ikherek he, andi nen aro.

³ At Allah obabut fano nen, yi'nogo hilingiti logouwageluk nayonggo fesikhe andi nen, wene ekhe yi hinebe lombok komothinabik. Hit he, it ekhe inawe a'ma logogun werek kwelegat he, hinendawimo nen, ”An nebe kain,” iluk hinendawinggen legeisogo fakhikhi logogun lek. Athe, Allah nen hinebe lombok hinendawinggen at oba himbiret fikhi logouwageluk hinobabut lombok wokhisasikhe higithogo, hinendawinggen sebelek logolik hinonggwaregen hinobabut palikhi logoino.

⁴ Ninebe yi re, ninenggi, nineisok, ninebeba hundik mene ekhe hokhorogoat werek. A'nogo werek meneat he, ninebeba hundik mene andi, ineabu lombok hilingiti logouwageluk hunogo ninobagasikhe.

⁵ Andi hak he, ninebe hokhorogoat welago meneat he, Kristus ninom misigat hunogo ninobagasikhemo welago yi. Ninebe misigat mene re, ninenggi nineisok ninebeba hundik welagarek andi hak, ninerugwi ninagaila'lak ninom a'nogoat welago.

⁶ At Allah obabut fano nen, nit mondogat ninobabut lombok wo'nisasikhe andi nen he, aren wo'nisasikhe higithogoat hilingiti logogun o. It ekhe nen Allah ane yagaisikhi logouwageluk inobabut wogisasikhe mene re, inendawinggen at oba himbiret fuluk welagaikharek higithogoat yagaisikhi logogun.

⁷ Nen, it ekhe nen, afuni ekhe leberisikhi logouwageluk inobabut wogisasikhe mene andi re, fanorogo leberisikhi logogun. Nen, it ekhe nen, wene yagaisikhi logouwageluk inobabut wogisasikhe mene andi re, fanorogo yagaisikhi logogun.

⁸ Nen, it ekhe nen, afuni ekhe inendawinggen ago wati logouwageluk inobabut wogisasikhe mene andi re, a'nogo fanorogo hilingiti logogun o. Nen, it ekhe nen, inagarek mene it afuni ekhe inagarek lek mene sumburisikhi logouwageluk inobabut wogisasikhe mene andi re, inonggwarek faget anggigi'lek lebekhogo wogisikhi logogun. Nen, it ekhe kain logouwageluk inobabut wogisasikhe mene andi re, ninghogoat hilingiti logogun. Nen, it ekhe nen afuni ekhe inendawirinafi logouwageluk inobabut wogisasikhe mene andi re, inendawimo inagaiyek hikhi logolik inendawirinafi logogunaro.

Allah againafuri nen inobabut hilingiti logogun wene

⁹ Hit hinendawinggen oba nenat afuni ekhe hinendawirogo logoino o. Weak mene hinabit mondok logolik he, fano mene hinenggi ninghogo fisogo logoino o.

¹⁰ Hinerugwi hinagaila'lak Allah againafuri mene andi hinebe ap misigaren tago mene hak, hinendawinggen tulem hinendawirogo logolik he, hit-hit hinerugwi hinagaila'lak hinane agaukhogo yagaisikhi logoino.

¹¹ Allah Areagun en hinendawimo agaiyegeratu kwelek, nineisena Tuhan faget hinaberali agi'lek, ninghogoat hilingiti logoino o.

¹² Hiren he, ”Hobuk at Allah nen fano hilingisigin werego,” iluk, hinendawimo hinagaiyekhogo yi enggin ti enggin hikhi logolik he, hinafe morogo samban kamo igi'lek ugu mondok logoino o.

¹³ Allah againafuri mene ekhe yi mene ti mene le'ma werek halok sumburisigik, ap pok inebe hinonggot mene wagunem hinaiba fanorogo woginafik, ikhi logoino o.

¹⁴ It afuni ekhe nen weagethinafunem he, Allah nen it fanorinabuageluk ayonggo fikhi logoino. Weagerinabuageluk homan fisigi'legat, fanorinabuageluk ayonggo fikhi logoino o.

¹⁵ It afuni ekhe inendawimo inagaiyegetu halok he, hit hinomat hinendawimo hinagaiyegetik, it ekhe le agu halok he, hit hinomat le agik, ikhi logoino o.

¹⁶ Afuni ekhe hinelokhoma fisigik, ekhe hinambotma fisigik, igi'lek he, hinendawirogo higithogo nek hilinginafi logoino o. Kaindek inobabut hilingitarek mene andi, hilingiti'lek he, inawe a'ma logolik hilingitarek mene andiat hilingiti logoino o. Hinendawimo nen he: ”An wene mondok nelu o,” iluk hinonggwaregen fogerakhagubo.

¹⁷ It afuni ekhe nen weak hilinghinafunem he, hiren onggo lagakhogo weak hilinginafi logogubo. Afuni mondogaren ineilenggen hisaluk he: ”It fano hilingiri'lagwi o,” iluk hinabok fano ikhi logouwageluk he, hinendawimo anggalugen fanorogo hilingiti logoino o.

¹⁸ Afuni mondogat hinom fano lambukhogo logouwogeluk, hit hinobabut fano hilingisu mene nek higithogoat hilingiti logoino o.

¹⁹ Nerugwi nagaila'lak. Hinebe nendawi e. Afuni ekhe nen hit weagethinafu halok, hinonggwaregen onggo fugubo. We, Allah a'mage lagaluk, aren hilingisuagen he, at enggiba fikhi logoino. Wene a'nogo hilingiti logogun, iluk lisu yi'nogo palek werek: ”Wurep oba an nen inoatik, onggo an nen figik, igin o, iluk Nineisena Tuhan nen ikherek,” iluk lisu palogo fesukwa.

²⁰ Andi halok, hiren he, yi'nogo hilingisugun: ”Afuni hinom weak mene andi sumburu nele werek halok he, sumburisigik, i nele werek halok he, wogisigik, ikhi logoin o. A'nogo hilingisugun andiba re, endu enggen inungguloak oba fugunem heinet wasu hak, inenggali asigin andi.”

²¹ Weak hilingitarek mene andi omame a'luk hit sebelogo hinobagainogo iluk he, hit fano hilingiti logolik, hinomame a'luk he, weak hilingitarek mene andi sebel fisikhi logoin o.