ROMA 10 - Allah Wene Fano Wene Hupla Inane

¹ Nerugwi nagaila'lak. Allah nen he, it nerugwi nagaila'lak ninunggulenu misigat mene andi, telinabilebe, iluk nendawimo nen menenei ebetik, Allah ayonggo figik, ikhi lagi.

² Iren he, Allah faget inomamerogo hilingiri'lagwi meneat he, inobabut he, nelu. Eberogoat hilingisugun mene inelu logolik hilingiri'lagwi fuk.

³ It he, Allah nen wene inoba mene korogo wokhaluk hobuk inambotkwe inom hunogo inobagauwageluk, at awe a'ma kuluk logolik hilingisugun mene inonggoren hilingiti'lek welagaukwa. We, inonggwarek inendawimo nen anggaluk inomamerogo hilingiti lagaukwa andi.

⁴ At Kristus ebe kweangma pi wagaikhe andiba, wene Allah nen komotninafikhe wene a'nogo ebe agaikhe. Afuni inendawinggen at Kristus oba himbiret fagarek mene halok inebe lombok, wene inoba mene korogo wokhasikhesik, hobuk inambotkwe Allah inom hunogo fisikherek.

Allah nen afuni ninebe mondogat telninabigin wene

⁵ At Musa nen he, wene Allah nen komotninafikhe wene a'nogoba, Allah nen wene ninoba mene korogo wokhaluk hobuk ninambotkwe at ninom hunogo ninobagaikherek andi faget mel isikhe: ”Wene andi hologo logolik, higithogo hilingiti logogun mene halok hinebe lombok, wene andiba hineluk mondok logogun o,” iluk lisu palogo fesikhe.

⁶ A'nogo meneat he, afuni inendawinggen Allah oba himbiret fugunem he, aren wene inoba mene korogo wokhaluk hobuk inambotkwe at inom hunogo fisikherek andi faget, Allah aneba lisu yi'nogo palogo fesukwa: ”Hendawimo nen he: Pogoroba sa lagagin, iluk anggagun o,” iluk isikhe andi ebe re, Kristus ebe waluk pi wesuageluk igin lek iluk isikhe andi.

⁷ Nen: ”Kweang a'ma sa pigin, iluk anggagun o,” iluk isikhe andi ebe re, Kristus wa'lagaikhemo niren eluget fembik waluk lagai wesuageluk ugun lek andi faget isikhe andi.

⁸ Halok he, wene andi mel anggaluk isikhe: ”Allah ane andi ebe horogat werego. Andi hambeba inom, hendawinggenma inom, werego,” iluk isikhe andi, afuni nen inendawinggen Allah oba himbiret fogoin wene niren yagahisikhi lago andi fagerat isikhe o.

⁹ Hambeba nen he: ”Ninoe Enupogot he, Yesus aro,” iluk fakhogo igik, nen, hendawimo nen he: ”Yesus ebe wa'lagaikhemo re, Allah nen eluget fesikhemo werego,” iluk eberogoat anggigik, umo re, telhabigin aro.

¹⁰ Afuni inendawinggen Allah oba himbiret fugunem he, aren wene inoba mene korogo wokhaluk, hobuk inambotkwe at inom hunogo fisikherek. Nen, inambeba nen, at abok fakhogo ugunem he, telinaferek andi.

¹¹ Allah aneba lisu palogo fikhi logolik he, mel isukwa: ”Afuni inendawinggen at eba rogo himbiret fogoin mene halok inenggali asugun mondok lego,” iluk lisu palogo fesukwa.

¹² It afuni Yahudi mene hunogoat, nen, afuni Yunani mene hunogoat, ugun lek. Nit mondogat nineisena Enupogot he, Allah misigaro. Nen, aren wogisoageluk ayonggo fagarek mene halok inebe mondogat hokhorogoat wogisikherego.

¹³ Aren ikhi logolik, ”It ekhe nen an hineisena Nenupogot Allah nenu hombuk palharek mene halok, mondogat telinabigin enego,” iluk isikhemo lisu palogo fesukwa.

^14-15 Allah nen he, wene ekhe mel isikhe: ”Afuni fano wene waluk yagaisa lagaikharek mene andi, fano mondogo,” iluk isikhemo lisu palogo fesukwama werek meneat he, fano wene andi waluk loageluk inayonggo fuluk lakfisigi'lek halok, ninggi'nogo nen yagaisa logoin? Nen, it ekhe nen wene ebe yagaisa lagi'lek werek kwelek he, at abok ninggi'nogo nen inesanggo holugun? Nen, at abok holhi'lek logolik he, ninggi'nogo nen inendawinggen at oba himbiret fogoin? Afuni inendawinggen at oba himbiret figi'lek logolik he, enu hombuk ninggi'nogo palugun?

¹⁶ Mene re, afuni inebe mondogat fano wene andiat wanu mene re, it fena wanhi'lek werego. At Yesaya nen he, Allah yi'nogo yagatikhe: ”Nineisena. Niren wene yagaisugunem he, sa nen wene andi eberogoat iluk futfikhe nogo? Futfigi'lek enek werego,” iluk yagatikhe.

¹⁷ Mene re, fano wene andi, Kristus abok yagaisa lagunemat inesanggo holharego. Nen, wene inesanggo holilugat, inendawinggen at oba himbiret fagarego.

¹⁸ Mene re, an nen heinok ekhe wokhisak. It he, fano wene andi inesanggo holhi'lek werek nogo? Lego. Inesanggo arat holha. Allah aneba, ”It inane andi o yi awi ti awi mondogat wialagaikhesi'mo re, o esanggo-esanggo andoma mondogat inesanggo holhukwa o,” iluk isikhemo lisu palek werek andi nen igi o.

¹⁹ Heinok ekhe wokhisagat. It afuni Israel mene fano wene andi inonggot nogo? Ineluaro. Attagat, at Allah nen ane isikhemo, at Musa nen mel yagaisasikhe: ”An nen he, it afuni ekhe an nagainafuri mene fuk. We, ap hunogo mene inayonggo foumo, hiren wene palubagaigen iluk hilinginafik, nen it ekhe inendawinggen lek mene nayonggo foumo, hit hina'mage lagauwagen iluk hilinghinafik, igin o,” iluk yagaisasikhe.

²⁰ Nen, hobuk Allah nen he, wene ekhe mel isikhe: ”Afuni an nebe hera'nabi'lagwi lek mene nen, hera'nafa o. Nen, afuni an noba heinok wo'nafi'lek mene nen, ebe neoageluk nonggwaregen inelokhoma menlagi o,” iluk isikhemo, Yesaya nen ailo legat yagaisasikhe.

²¹ Nen, Allah nen afuni Israel mene mel yagaisasikhe: ”An huberen, linggene nen, hu'mokwe nen, afuni yoma woginabigeluk nenggi langhogo welagi meneat he, inesanggo holhi'lek nane oak sagalhuat werego,” iluk yagaisasikhemo, Yesaya nen yagaisasikheat.