ROMA 1 - Allah Wene Fano Wene Hupla Inane

Hai warinafikhe wene

¹ Hit Allah againafuri o Roma welagep mene nerugwi nagaila'lak. At Allah hinebe endawi mene mondogat an Paulus Kristus Yesus amingmingengge mene a'nogo nen wene lisu palogo hinoba lakfei wagi andi o. An nen fano wene a'nogo afuni yagaisilik nikhi logouwageluk, Allah nen wenagaisogo mennobagaikhesik laknobagai wagaikhe o.

² Attagat Allah nen: ”Wene fano wene andi, hobuk weinam asigin o,” iluk abok it ap at ane yagaisikhi lagaukwa mene omanogo yagaisugunem, iren Allah ane palek a'nogoba lisu palogo fikhi lagaukwa.

^3-4 Wene lisu palogo fesukwa andi, ebe re, Allah amlogo ninoe Enupogot Yesus Kristus fageraro. Afuni ta'lagaikharek hak he, ebe Daud en tagongge mene nen ta'lagaikhe. Meneat he, ebe wa'lagaikhesi'mo nen, Allah Areagun omameba eluget fesikhe andiba, Allah amlogo aro, iluk enegat agaikhe andi.

⁵ At wa'lagaikhemo nen Allah Areagun en eluget fesikhe andiba, an nen yi afuni ti afuni inunggulenu lombok inendawinggen at Yesus oba himbiret fuluk ane hologo hilingiti logogun mene yagaisugunem, at enu hokho asuageluk Allah obabut fano nen nayonggo fesikhesik laknobagai wagaikhe o.

⁶ Yi afuni ti afuni inunggulenu lombok andi re, hit afuni o Roma mene hinom fageraro. Hit hinebe Yesus Kristus agoromi asuageluk hinayonggo fesikhe andi.

⁷ Hinebe At onggwarek faget fakhaluk logouwageluk hinayonggo fesikhemo welagebo. Andi halok, an nen wene lisu palogo hinoba lakfei waga logolik, Nineisena Allah inom, ninoe Enupogot Yesus Kristus inom, emberek inobabut fano a'nogo nen fano mene wokhisigik, hinendawinggen hambugethinafik ikhi logouwago, igi andi.

Paulus nen afuni Roma mene inoba lageluk isikhe wene

⁸ Nerugwi, nagaila'lak. Wene ebe yagahisagen he, ekhe yi tak yagahisak. Afuni o yi awi ti awi a'lima nen, hit mondogat hinabok fano ikhi logolik he: ”It afuni Roma mene inendawinggen Yesus oba himbiret fuluk welagaikharego,” iluk agarek andi nen, Yesus Kristus yaga'luk enek, ”Neisena Allah,” iluk hai wati lagi.

⁹ A'nogo hai wati logolik he, hit faget kamo igi'lek samban ikhoat welagi mene andi, at Allah elu o. An Allah awe a'ma logolik, fano wene At amlogo hilingiti lagaikhe wene andi afuni yagaisilik nikhi lagi andi, nendawinggen oba nen, at Allah faget hilingfisikhi lagi o.

¹⁰ Samban a'nogo ikhi logolik, at Allah nen fano anggaluk, ”It inoba lan o,” iluk yagane'luk wo'narek wesuageluk kino yagatu mondok welagi o.

¹¹ Hit hinendawinggen wurik asuageluk, Allah Areagun en wogisikherek mene andi, hit ekhe wokhisoageluk hinobagai we'le e, anggikhi lagi.

¹² An wokhisa we'le anggikhi lagi andi re, hit inom, an inom, ninendawinggen Yesus Kristus oba eberogoat himbiret fesugu mene andiba, ninendawinggen ago wat-wat uogeluk wesigeluk anggikhi lagi o.

¹³ Nerugwi nagaila'lak. An nen, afuni endakwe mene fena o yi awi ti awi a'lima wene yagaisilik lagagimo wanhukwa hak, hit a'nogoat wanubagaigeluk nenggi hokhorogoat hinoba wesigeluk anggikhi lagi meneat he, nanggwe palegen kamo ikhi lagi andi hinelu asubagaigen iluk yagahisigi o.

¹⁴ Eberogoat afuni yi wene ti wene futfagarek mene inom, futfagare'lek mene inom, sekolah yanggulha mene inom, yanggulhi'lek mene inom mondogat fano wene yagaisele iluk anggikhi lagi meneat he, an noba palegengge hangge welagi o.

¹⁵ Andi nenat he, fano wene andi hit afuni o Roma welagep mene andoma yagahisa wesigin namolo anggikhi lagi o.

Fano wene andi, Allah omame aro, iluk yagaisasikhe wene

¹⁶ Fano wene andi Allah omame atma re, attak afuni Yahudi mene, nen hobuk he, afuni Yunani mene, inendawinggen eberogoat Yesus Kristus oba himbiret fagarek mene halok mondogat telinaferek andi nen he, an nailo legat fano wene andi yagaisilik nigirek andi.

¹⁷ Allah nen mel isikhemo lisu palogo fesukwa mene werek: ”Hinendawinggen an noba himbirik logogun andiba, an nen wene hinoba werek mene a'nogo korogo wokhambik, ninom hobuk hinambotkwe hunogo hinobagagin mene halok hineluk mondok logogun o,” iluk isikhemo lisu palogo fesukwa hagat, Allah ninom hobuk ninambotkwe yi'nogo hunetlasugun, iluk, fano wene andiba sele'matfesikhe. Allah ninom hobuk ninambotkwe hunetlasugun wene andi ebe re, hunogoat mene ekhe hilingisugun oba nen fuk. We, ninendawinggen at oba eberogoat himbiret fuluk eroba nen pikhit huli erembul oba logogun andiba, Allah ninom hobuk ninambotkwe hunetlasimbik logogun o.

Allah nen afuni wene inoba fikherek wene

¹⁸ Afuni nen he, Allah ebe inobakhe nene herakfisaluk, inobabut weagat hilingiti logolik, ebe wene afuni ekhe inelu asinogo iluk sebeli'lagwi andi nen he, Allah a'mage lagasikhesik pogoroba nen sele'matfesikhe.

¹⁹ At Allah a'mage lagasikhesik sele'matfesikhe andi, at onggwaregen, ”An nobabut yiginik,” iluk abok fakhogo sele'matfesikhemo futfogoin mene werek kwelegat hilingitarek andi nen a'mage lagasikhe andi.

²⁰ Allah ebe nineilenggen hogorek lek meneat he, aren kweang pogot elalhikhemo ineilenggen hikhi logolik, at ebe Walhasikhe mene atma re, omame etok mondok welagarek, iluk, obabut furogo futfouwemat welagaikharek andi. A'nogo welagaikharek andi faget, iren inoba nonggologo wene ki u he aro.

²¹ Allah ebe a'nogo inelu logoligat, iren he: ”Allah ebe Walhasikhe mene aro,” iluk, ebe fogerati'lek, hai wati'lek, welagaukwa. A'nogo logolik he, hunogo mene ebe mene lek meneat he, menenei oba ebeti lagaukwa andi nen, inendawinggen mum agaikhe andi.

²² It inendawinggen a'nogo mondok mum hilinglagaikhesik logoligat he, ”Nit ninendawinggen mondok kagalego,” iluk agarek andi.

²³ Inendawinggen mum agaikhesik he, Allah ebe fili agarek lek mene, fogerasu mene andi herakfisaluk he, obali'mo re, fili agarek mene inenggi nen afuni-afuni hilingisogo figik, sue-sue hilingisogo figik, wam-wam, paik-paik, mene-mene hilingisogo figik, kisu-kisu hilingisogo figik, iluk he, fogeratarek andi.

²⁴ A'nogo hilingitarek andi nen, Allah nen he: ”It inonggwarek inendawinggen nen nunggunem, it-it inenggali lek inebe weagarikhi logouwak,” iluk inebe herakfisikherek andi.

²⁵ At Allah Walhasikhe mene fogeratu mondok logogun, iluk ugunem, eberogoat, iluk u hak, ”Amin,” iluk ikhi logogun meneat he, iren Allah ane ebe wene andi herakfisaluk, afuni ineranen felalogo isukwa mene andi wanhukwa. A'nogo wanhukwasik, Allah nen yi mene ti mene elalhikhe mene andi ebe fogerati'lek, we, yi mene ti mene elalek mene andi inenggi nen agauwak halogo fuluk, fogeratik, obaget hilingitik, agarek andi.

²⁶ It a'nogo hilingitarek andi nen, at Allah nen, it inendawinggen nen inenggali lek mene hilingiti logouwageluk, ”Inoba lombok,” iluk herakfisasikhe. It hemi nen he, ap inom nogo agarek hagat nogo u meneat he, it hemi-hemi inom nogo u lek meneat nogo agarek andi.

²⁷ Andi hak, it aben ogo re, aben hemi inom nogo agarek hagat nogo igi'lek, we, ap-ap nogo agarek. It ap-ap inoba aigage lagagunem inenggali lek weagat hilingitaresik he, wene inonggwaregen inoba fakhagaresik inebe weak fakhagarek andi.

²⁸ Iren he: ”Allah ebe ninelu logogun he, ninabiro,” iluk at ebe it inendawimo sebelfesukwama re, aren he: ”It inendawimo anggili'lagwi andi weago. Nabit. Iren he weak meneat he fano, iluk anggagarek andi, a'nogo inoba lombok anggikhi logolik hilingisu lek mene hilingirikhi logonik,” iluk inebe herakfisikherek.

²⁹ A'nogo hilingirikhi logolik, it inendawimo yi weak ti weak kwanirek mene peterek logolik, inami'mik weak hilingitik, afuni ekhe weagerinafik, agarek. Ariginhi logolik, afuni inapsiritfisigik, inebe inoatik, wene serep agik, afuni lalinafik, wene ambumet fuluk welagik, agarek andi meneat inendawimo mondok peterogo welagaikharek. Logolik, inabok hinagaisogo nabok-habok igik,

³⁰ weinam igik, Allah ebe inabit welagik, inawulagam weak hilingitik, inonggwaregen fogerakhigik, sewirakhigik, weak hilingisuogeluk inambelal weak felalhik, ineisena inagaisa inane holhi'lek hilingitik, agarek andi.

³¹ Inendawinggen lek weak hilingitik, wene warisagaresigen kamo igik, afuni inabit enek welagik, inendawirinafi lek welagik, agarek.

³² A'nogo hilingitarek andi nen, at Allah nen he: ”Afuni inobabut a'nogo hilingitarek mene halok he, an nen wene inoba fembik inebe mondok inoasu higit obaat inoasigin o,” iluk isikhe mene inelu logoligat he, it inonggwaregen a'nogo hilingitoat welagaikharek andi. It a'nogo hilingiti logolik, it ekhe nen a'nogoat hilingitunem he: ”Elok hilingiti lagep,” iluk yagaisagaregat.