RATAPAN 5 - Allah Wene Fano Wene Hupla Inane

Tuhan nen endawit ninabuageluk samban oba kinotikhe wene

¹ Tuhan neisena, nit ninoba hilinglaga mene ari faget futninobagain o, nit mondogat sebelek mene hangge agosik welago mene yi faget heilenggen wo'ninabin.

² Nit ninagge ninalolegengge omanogo re ap amu mene inenggiba agaikha, nit ninawi wuri'mo re ap pok mene kwagasik werek.

³ Nit nineisugwi re it ninaselei mene nen inoata, yogondak nit ninagaisawi re sogwe nek agaikhasik werek, nen nit he suarek mene welago.

⁴ Ninagai nunggu mene inom ninagayo nolhu mene inom he niren onggoba nek palikhi lago.

⁵ Nit he wam hangge enu gerbau oba hilingitarek hak yabu enggin mene hilingisuageluk yaganisili'lagwi, nit ninomame lek a'luk ninoba lebelek ari'lagoba nen set waroageluk yaganisili'lagwi lek.

⁶ Nit he o Mesir laluk kino-kinongge mene aga lago, nit nunggu mene re Asyur mene inoba kinosi laga lago.

⁷ Nit ninambu ninombalak weak hilingitukwa mene re yogondak it inebe werek lek, oba nen he it inaweak hilingitukwa meneba yogondak nit ambisangma hikhi lago.

⁸ Nit he ap inamingming engge ninom higit mene omanogo nen melalninabi'lagwi, ma re ap it inenggi omame a'ma nen fikhalogo wulakninafu mene ekhe werek lek.

⁹ O kota endakwe fikhit he ap ware mene nek lakwak ili'lagwi, nen nit nunggu mene faget herarik nugunem he ninoasuogeluk hilingiri'lagwi.

¹⁰ Nit he ninamburu nele nen anggolorogo hugu were'ma, nit ninagap he endu aigen hakhogo hundugut nisili'lago.

¹¹ Hemi o Sion hemi omanogo re aben inomameba ninghogo inom seberi'lagwi, helime tugum o Yehuda helime re o sili endep kwe omanogo nen emetfisaga.

¹² Nit ninogogwi kaindek omanogo re aben fakfisagasik he e ba porogo fisaga, ap yaman agaikha mene omanogo re afuni nen ekhe agaugwet fisili'lagwi lek.

¹³ Nit ninagainafuri ap souge mene re enggen ugu sagalhigik pelafarek oba omanogo yabu hilingisuageluk inomameba inane nen ninghogo yagaisugu kwelek hilingiri'lagwi, ninagainafuri ap omalik he e hatarek mene omanogo enggin nen sebelinafunem ineil furuk fili'lagwi.

¹⁴ Ap yaman mene re o kota solombonma kabogeti lagaikha aremnogo hakhogo kabogeri'lagwi lek, ap souge mene inanggelek kwe omanogo nen pinggong ane ekhe watunem holi'lagwi lek.

¹⁵ Wuni o silimo watarek awuni omanogo agamhogo le wuni hilingfugunem he, nit ninagaiyek werek mene a'nogo mondogat longgo ikhe.

¹⁶ Nit ninamolo hikhi lago mene omanogo re mondogat lek aga, nit weak hilingitoba re mondogat alomat lago.

^17-18 Tom Sion a'nogoba re inareng mondogat tereng ikhe, nen aben mondogat herakfisaga; Andoma re olomene nek lakwak ili'logo. Andiba re nit mondogat ninoba sinu ikhe, nit le agunemen enek he nineilenggen mum ari'lago.

¹⁹ Oba nen he Tuhan neisena Hat enek he homame mondok hokho mene welagen, nen Hat he henggi mondok-mondok faget melalinafu logogin.

²⁰ Nenahalok Haren ninenggi aninurogoat oboget nisegendik welagen nogo? Hat he henggi mondok-mondok faget nit ninoba honggoragen a?

²¹ Tuhan neisena, Haren nit hobuk ninambotkwe sugulogo Hat hoba ninobagaime o. nirogo sugulogo Hat hoba wesugun! Ninebe attak hilingik welagagu hak hilingik logogun nen he halogo ninobagain o,

²² At he Haren mondogat obokhogo lak ninobagegenma nen a? Hat ha'mage lagagendek mene andi re huli-huli werek legen a? Iluk samban isikhe.