RATAPAN 4 - Allah Wene Fano Wene Hupla Inane

O Yerusalem ap amu mene inenggiba agaikhemo enggin hikhi lagaukwa wene

¹ Emas eil tibelenggeri'lago mene yi nogo re hobuk eil lombugikhe, helep o Allah Awi wuri'mo omanogo molulukhogo ebekhe kwe telfol ikhe.

² Attak he alage fano mondok o kota Sion mene andoma re emas onggo hokho mene hangge hilingik welagaikha, oba nen yogondak it faget he iwak kweang meneba elalek mene hangge anggili'lagwi.

³ Mene olomene serigala oba nen ogore eagwi eilak wogoterek, oba nen he an nagainafuri re sue unta enggen fuluk halherek lek andi hak hilingik.

⁴ Inomalik fou mene eilak wogisigi'le'ma inendawi age fulunghugu nen wa'lari'lagwi, yenggerugwi oan mene re inamburu nunggu mene kinori'lagwiba nen ap it wogisugu mene ekhe werek lek.

⁵ It andoma inetokhogo nunggungge enduk fano mene nek nenggarek mene omanogo re, inebe inom inangge yi mene ti mene mondok ebe mene nek were'ma werek mene omanogo, yogondak he lobo-lobonggerik ologoilong engge hugisagarek oba omanogo nunggungge herakhilik nugunem, inebe re ebekhe kwe omanogo wa'lari'lagwi.

⁶ It Sodom inap inoba afuni nen yi'nogo ti'nogo ekhe hilingiti'le'ma nen unggum Allah enggiba nen ferekhogo wogisikhe mene andi re mabensek oba nen, an nagainafuri nek he unggum engginhogo wogisikhe.

⁷ O attak he nit ninogogwi kaindek fetninarek welagaukwa mene omanogo re no kapas eil kut welagarek andi hak hilingik welagaikha, it inebe re inomamerogo logolik inoba ou legengge fano mondok welagaikha.

⁸ Oba nen yogondak it inelokhe re no helangasin he we endep harek hak oba nen mondogat sing elemik hilinglagaikha, it inebere afuni ebekhe kwe werek mene nen futfisa hak. It inagap he e puk mene hak inoak oba to'morogo iring paringhogo hilingik.

⁹ It inangge nunggu mene legen inebe aninurogo enggin-fenggin hugu wela'luk orok-orok wa'lari'lagwi, it ap weim oba nen wa'lari'lagwi mene andoma re fano oba nen sumburu nele nen wa'lari'lagwi mene andoma nek he mondogat enggin sek.

¹⁰ Yago, enggin mene an nagainafuri inoba asi waga mene ari re hunik mene hilinglaga o, hemi inobabut mondok sakhorek logolik inoba heanerogo nek hilingiri'lagwi hemi omanogoba nen inamburu nele agunem he inalabut ninghogo nunggu mene faget it inonggwarek ineagwi omanogo belangalema isakfakhaluk nili'lagwi.

¹¹ Tuhan a'mage endu amulok higit lagaikherek mene a'nogo o kota Sion oba fikhemo re o andi kweang inom luphogo ningge.

¹² It ap raja-raja andoma mene ekhe nen ogo, nen afuni o kweangma werek mene mondogaren ogo, o kota Yerusalem leget pa'leget waganek mene andiba kwe ambe palekwe omanogo nen aselei mene kwi wesugun mel anggaga lek andi.

¹³ Oba nen it ap imam inom nabi inom inaweak oba re andi mene mondogat hilinglaga. Iren he ap weak hilingitu lek mene omanogo inoatama hilinglaga andi.

¹⁴ Ap ineilenggen puk mene ebekhe kwe yafak-tafak nikharek hak, ap o kota Yerusalem oba ferinarek welagaikharek mene andoma re a'nogo hilingik. It inasu re ap inameben eil mondogat sing elemikhogo hilingi'mo re, aben iluk ogo senesu re inabit.

¹⁵ Afuni nen ikhi logolik, ”Hit he hinebe emerek welagep, nit senisugu lek, yoma nen sugulogo lani!” iluk agarek. Ma re it inebe o leil warik it inunggulenu lombok werekwe omanogo nen it inunggulenu ekhe mene werekwe lili'lagwiba nen, ap misigen iluk ekhe yoma femhogo logoni, iluk yagaisili'lagwi lek.

¹⁶ Tuhan he At onggwaregenat againafuri omanogo telfol isigik, it imam omanogo legeisogo fisigi'lek hilingitik, it inogogwi kaindek mene omanogo endawirinafi'lek welagik hilingiti logolik, Aren it againafuri omanogo endawirinabi'lago lek.

¹⁷ Niren koma nen telninabi wesugun iluk nenangorogo were'ma nen enek he nineil ou eri'lago, niren he it inunggulenu misik ekhe furogo lebetnisa lek meneba nen iren lebetninabuageluk alomarogo inoba eberek logolik weri'lago.

¹⁸ Nit he wulibugun iluk lagunem it ninaselei mene nen ineil wo'ninafu nen he niren wilipluk ebekhe kwe laga lago lek. Linggene nit nineluk logou mene re wurep oba arat asi waga, nit ninebe wa'lasugun oba tip iwaga.

¹⁹ Sue rajawali nen pogotkwe tarogo lagarek andi re aninurek hak oba nen nit mu'ninarek weri'lagwi mene re mondok ferekhogo weri'lagwi. Iren he tomkwe omanogo nit mu'ninarek laluk, o leikwe omanogo nen he nit ninanggwe pali'lagwi.

²⁰ Iren ap raja Tuhan nen wenago mene a'nogo seneta, ap iren anggikhi logolik nineluk wo'nisa mene, nen nit ninaselei mene inoba nen aren telninabu mene. iluk anggikhi lago mene a'nogo re iren seneta.

²¹ Yago, hit Edom hinap yi inom Us hinap yi inom oma re, hiren hilingisuba andem endo yakhigik, hinagaiyegetik, hilingiti logoni! Enggin mene andi re hit hinoba ogo asi wesumo re, hit hinebe lugulugwi palhi logolik hinonggwaregen hinalfulukwa kogouk erikhi logogun.

²² Sion he aren aweak hilingite meneba, yogondak unggum oba fikhemo hikhi logolik werek, yogondak he nit Tuhan nen oboget nisigik, hele warogo huginabi lagaikharek oba wo'ninapluk lagik, igin lek. Oba nen he hat Edom ahwi, hat he Tuhan nen unggum wokhesigin o, hat haweak hilingiti lagen mene andoma mondogat weinamet fagain.