RATAPAN 3 - Allah Wene Fano Wene Hupla Inane

Unggum inoba agik, inobabut hebelhik, inendawimo eberek welagik, agarek mene faget isikhe wene

¹ Ap Allah anini inoba fugunem, enggin-fenggin hugu welagaikharek menere anat welagi o.

² An nebe Aren lisogo wo'narek laluk he, o mum kuruak tengse'ma andoma nobagai lili'lago.

³ Linggene inukhogo an nebe endawit nafi lek, yei hundik-handik noatu werek.

⁴ Aren an nebene noumo mondok elo'lekhogo hilingfigik, noak lilibukhogo lakfigik ikhe.

⁵ Aren an nebe ou elo'lekhogo welagik, fong warogo welagik, ugu mene hilingnobagaikhe.

⁶ Afuni o attak wa'lagaukwa mene omanogo hakhogo, an nebe o mum oba logouwageluk Aren ninghogo lisogo nobagai weri'lago.

⁷ Aren hele mondok omame meneba an homak nobagaikhemo re, an nebe wilipluk la mene ekhe werek lek.

⁸ An lebetnabuageluk neneik yabati logolik kinoti lagiba nen Allah nen an nane esanggo holu re abit.

⁹ Aren an nanggwe lagukwe omanogo, helep leget waganogo kwe palnabi'logo.

¹⁰ At he no beruang en hakhogo nenanggotnafu werek, nen mene singa nen hakhogo kagalnabi'logo.

¹¹ A'nogo hilingiti logolik an nebe si'narek mu'narek lagaresikhe he ebekhalem en nelokhe palfei lagaresik, an nebe tilip talaphogo noa'luk lagarek.

¹² At asikhe enggelaba fangsek logolik, andok he an pisinget neagain iluk enggat noba tibetfuluk werek.

¹³ At andok he an nebeba fo'lokhogo noasi wagasik, nendawinggen kagaukhogo noate.

¹⁴ Linggene hundik-handik andoma re afuni mondogaren an nebe faget endo ya'nafu mondok werek, nen an nebe re iren inali'norogo hilingisogo nobagagu mene welagi.

¹⁵ An namburu nunggu mene inom nagai nunggu mene inom he, Aren we arik weak mene nek wo'netunem nunggu welagi.

¹⁶ An nelokhe re Aren kweangma wula'laget nobagagik, naik he helep oba langgot nobagagik, ikhe.

¹⁷ Fanorogo welagaikharek mene inom, inagaiyek hagarek mene inom, inendawinggen serogo welagaikharek mene inom mondogat nonggoragama welagi o.

¹⁸ An nebe nomame welagi mene a'nogo mondogat lek aga, An nendawinggen Tuhan oba eberek welagi mene a'nogo longgo ikhe.

¹⁹ An namel-melhogo wenggelhi lagi mene inom, nebe nonghongsek welagi mene inom andem faget wenggel haluk he, arik engge nen ap inoaterek mene nunggunem hak hilingik welagi.

²⁰ Andi faget hundik-handik ebeti logolik were'ma nen enek he an nendawinggenma enggin mene kwelaknobagali'logo.

²¹ A'nogo hilingik welagiba nen he an nen wene ebe ero ekhe yi ebetlasi wagu sambul he, an nendawimo eberek mene a'nogo weinam ari'logo:

²² Tuhan nen endawi hundik nafe mene andi re mondok-mondok logogin mene, At endawimo fanoba hilingnaferek mene andi re lek asigin mondok lek,

²³ o hubet hundik-handik andoma re ket mene nek hilingnobagali'logo, eberogo nenat Tuhan andi re tiphogo nek hilingiterek!

²⁴ Tuhan andi re an nonggwarek nangge we misik masik enek engge hilingi'mo re At oba nek nendawimo eberek welagi.

Israel mene endawimo eberek mene a'nogo

²⁵ Tuhan he afuni At oba eberek welagik, At ebe heratik, agarek mene andi re inom fano.

²⁶ Enggere Tuhan nen nit lebetnisa wesigin iluk nenangorogo logolik hambuget fakhaluk logogun fano.

²⁷ Nit ninebe souge logolik andemat hambuget haluk hilingitarek mene yanggulugun fano.

²⁸ Tuhan nen nit ninoba enggin-fenggin fugu sambul he, ninamunek hurek logolik ninane legat alokhogo logogun fano.

²⁹ Andi faget he hobuk asigin mene werek hilingi'mo ninamu nen hilingisu lek hak iluk sebelfakhaluk logoumo re fano.

³⁰ It ekhe nen hinelokhe taphogo hinoatu halok inom, inane weak hinoba fugu halok inom, mondogat andoma re hiren onggo lagalhi'lek herakfisogoin halok fano.

³¹ Tuhan nen nit ninebe mondok-mondok faget obokhogo lak ninobagagin lek.

³² Aren nit ninebe endawit ninaferek mene andi re huli-huli werek lek meneba endawi hundik hilingninafere'ma re, Aren enggin-fenggin ninoba fuluk mene ogore endawitninafu mondok werek.

³³ At he endawimo fanoba nit enggin-fenggin higik, ninendawi ou en hilingitik, uageluk herak ninobagaikherek lek.

³⁴ Nit nineluk a'nogo hele warek logolik enggin-fenggin enek agu werek halok,

^35-36 nen aben tiphogo hilingitu lek oba wene agaum-fagaum isikhi logolik werek halok, Tuhan nen nit ninangge ninonggwaregen mene iluk wo'nisugu mene omanogo lek agarek oba nen ogore, Tuhan eberogo elure'ma re fut ninobagakhi logolik werek.

³⁷ Tuhan endawimo andi mene asuak anggigi'lek kwelek, eberogo nen andi mene faget afuni nen yi'nogo ti'nogo iluk hilingisumo re elok nogo?

³⁸ Fano mene weak mene hilingitarek andoma re Tuhan nen hilingisuageluk ugu halok enek hilingitarego.

³⁹ Ap weak hilingitarek onggo unggum wogetu kwelek, nenahalok limamit falhu mondok werek nogo?

^40-41 We niren ninebe ninggi'nogo welago iluk hal fakhaluk he, Tuhan Allah pogoroba werek mene a'nogo oba sugulogo waga logogun fano. Niren ninendawimo kwe hutfuluk samban uogen we'ni,

⁴² ”Tuhan nineisena, nit he Hat hane sagalogo fuluk weak hilingito, nen Haren nit ninaweak sagalogo leget ninobagegen lek.

⁴³ Nit ninebere Haren si'ninarek mu'ninarek laga logolik pinggi ninoaten, Haren hendawit ninafendek mene a'nogo re ha'mage anggele'ma hinakfegen.

⁴⁴ Hat hanini re o hena mondok hik mene andi hak hilingi'mo re, Niren samban ugu mene re fanorogo lagai wesu re, elo'lek ari'lago.

⁴⁵ Afuni o kweangma mondogat ineilhanem en, nit ninebe yi re Haren ologoilong engge hugisagarek mene hangge hilingisogo ninobagegen.

⁴⁶ Nit he ninaselei mene mondogaren inal ngesukhum wat ninobagagik, endo ya'ninafik, ili'lagwi,

⁴⁷ nit ninebe alomatninafu mene inom weaget ninobagagu mene inom ninoba asi wagunem, nit ninebe nineluk logolik youk kwelagaisogo ninailorogo welago.

⁴⁸ Afuni an nunggulenu mene omanogo mondogat wolelenggenhogo hilinglagaikhama re, an neil amusu i lagarek hakhogo pili'lago.

⁴⁹ An he palfigi'lek le agu mondok were'ma nen,

⁵⁰ neisena Tuhan hebe pogoroba nen nit fut ninobagagin oba asigin.

⁵¹ Nit nina'logomi o kota niren meneba oma isaluk he an nendawinggen mondogat heiseli'logo o.

⁵² Wene ero lek kwelek it naselei mene nen an inabit noba fikhi logolik, afuni nen sue wasuogeluk murok lagaikharek hak mu'narek weri'lagwi.

⁵³ Pogole i yenggelek lek meneba an nebe nelugengge pelaknobakuk an nebe a'nogo helep oba nek sebelnobali'lagwi.

⁵⁴ A'nogo hilingnobagagunem i yenggelik nunggul huli lagagunem, an nen ebeti logolik, ’An a'nogo yogondak huli nen neiloak legasigin andi iluk ebeti!’

⁵⁵ Tuhan neisena, an nebe pogole mondok woluele meneba ma'lima nen Hat henu hombuk palhi lagi o.

^56-57 Haren an lebetnabin iluk kinothafi mene andi faget hat hesanggo to'mosu fugo iluk yagaheti. Andiba re an nen samban igi mene andi hat hesanggo holhendik hat hebe an horokhogo wagendik, Haren ikhi logolik, ’Hoak leigesu fugo,’ iluk yaganeten.

⁵⁸ Tuhan neisena, an nawene faget Haren hal nobagegen, an neluk a'nogo Haren nagap telogo nobagegen.

^59-60 It selei mene an inabit nabi'lagwi mene nen inaniniba hilingisugun mene iluk weim abok ili'lagwi mene inom, iren inaniniba hilingiri'lagwi mene inom, Hat heilenggen niikhi lagen. Ma re Tuhan neisena, an nawene andi faget Hat nebikhit ame o.

⁶¹ Tuhan neisena, an sebelogo nobagali'lagwi mene andi re Haren niikhi lagen, iren hilingisugun mene iluk wene melali'lagwi mene andoma re Hat mondogat helu welagen.

⁶² Iren linggene hundik-hundik an nobaget nabok palhu mondok werek. An nebe alomat nobagauwogeluk he hilingisugun mene iluk weaget nabugun mene inane mari'lagwi.

⁶³ O huberen pikhit hu'mokwe huli andoma re, an he iren endo ya'nafu mene aga lagi.

⁶⁴ Tuhan neisena, it andi re iren hilingiri'lagwi mene andem higithogo unggum wogisan o,

⁶⁵ Haren it inendawinggen haro mene hilingfisaluk, it inoba homan fisano.

⁶⁶ It inebe siginarek muginarek lambik ineiloak leget fisamo, o kweangma yoma nen mondogat legakhoak,” iluk samban isikhe.