RATAPAN 2 - Allah Wene Fano Wene Hupla Inane

Tuhan nen Yerusalem unggum wogetikhe wene

¹ Tuhan a'mageba hilingitunem, Sion he Aren mum meneba sebeli weri'lago. Israel enu legeisogo pogot lego welagarek po'li hak hilingik mene a'nogo re, Aren kweangma woukmirogo hugisa pi waga. At Tuhan anini nen hilingisigin sambul andi re, At aiba Sion a'nogo ogore ogal fou lek hak.

² O Yehuda kweang oba engga lei werek mene omanogo re, Aren endawi higi'lek mondogat wolelenggenhogo lakfisikhe. At a'mageba re o kota andiba leget hukhogo ning-maniberogo waganek mene omanogo langgukhogo lakfisugunem he halik-halokhogo hilinglaga laga. O kerajaan andi inom nen ap kaindek o andoma ferinarek welagaikharek mene inom he, Aren sebelfisikhemo re mondogat sebelek mene agaikha.

³ At anini endu hakhogo yelang- melanghogo re, Israel mene inomame werek mene a'nogo inomame legetfisikhe. Nit ninaselei mene nen ninoasi kwi wagunem Aren lebetnisigi'lek eil fuluk welaga. Endu amulok wabunak ninggi logolik yi mene ti mene mondogat legabeterek a'nogo hak, Tuhan nen nit ninebe mondogat andi higirat a'mage ninoba fikhe.

⁴ Nit At aselei mene hakhogo, Aren asikhe lirik logolik, andok he nit ninebikhit pisinghogo lakfei waga. Ap nit ninendawimo nina'ma lolo kwelafarek mene omanogo re, Aren inebe mondogat inoate. Endu engganggan palogo lagarek hak, Aren o kota Yerusalem yinogo aniniba hilingisogo fikhe.

⁵ Tuhan he nit ninaselei mene higit agasik, Aren Israel yei warogo al perelogo fikhe. Aren he leget omamerogo hukhogo waganek mene inom, ap raja ebe were'ma o sili omanogo inom mondogat wolelenggenhogo lakfisikhe. Nen, afuni Yehuda mene inoba re fong ekhe inom hokhorogo watu logouwageluk hilingfisikhe.

⁶ Aren he At onggwarek aiba, it At againafuri mene kaboge'luk At fogeratarek oba a'nogo mondogat wolelenggenhogo lakfisikhe. Afuni nen inenggi sabat oba inom nen linggene hokho mene ekheba inom inonggorasuageluk hilingisogo fisikhe. At Tuhan anini mondok hokho meneba re it imam inom, raja inom omanogo abiren herakfisikhe.

⁷ Tuhan nen he mezbah mondok horek mene a'nogo nabit iluk herak fisikhe, nen At onggwarek aiba a'nogo herakfisikheat; o andi leget pa'leget waganek mene omanogo re ap selei mene nen langkukhogo lakfisoageluk herakfisikhe. O attak niren Tuhan obaget hilingitik, pesta hilingitik, ikhi lagagukwe omanogo re it ninaselei mene nen inomame agaikhasik inagaiyegen inanggiluk eri'lagwi.

⁸ Tuhan nen anggikhi logolik o Sion oba leget pa'leget waganek mene andoma mondogat, molulukhogo puak iluk wene tekhogo ikhe. Leget pa'leget waganek mene andoma mondogat molulukhogo pigin iluk, Aren ilirengge fena-fena mondogat waganogo fikhe. Leget pa'leget waganek mene inom, ap lagaluk kagalek werek oba wurogo liabek omanogo inom yogondak he mondogat halokhogo kabok lagali'lago.

⁹ Kwe ambe hokho mene palek kwe omanogo mondogat he kweang en salhe, e nunggulik sobangsek mene omanogo sombologo pikhe; raja ebe inom, it pemerintah ba yabu legoma hilingitarek inap omanogo inom he, mondogat huginabi lagaukwaba omanogo lagaikhasik werek. Tuhan awene melalek omanogo yanggulinabi'lagwi lek, it nabi re Tuhan nen ogo husumbi ekhe yagaisili'lago legat.

¹⁰ O kota ba ap yi kain ti kain omanogo re inane igi'lek kweangma hurek mondok werek; it he fong warogo iluk he wul inunggulkwe liakfigik, su karung mene labetik, agasik werek. Nen helime tugum he inunggul wamborogo kweangma pelakfuluk werek.

¹¹ An le palfigi'lek le agu mondok were'ma nen enek he neil mondogat fite, nendawinggen selekwe potunem nagupsak enek agama welagi. It inunggulenu mene omanogo wolelenggenhogo pelakfisilik lagunem he, yenggerugwi magendek mene inom, omalik fou mene inom he o kota ebekhe kwe omanogo inafekwe mo'luk ineil furuk fugunem nendawinggen mondogat warikhi lagi.

¹² Inoba mondok lebelekhogo le aga logolik inagaisawi inoba inamburu inom inagai inom wo'nisoageluk kinotu werek. Ap tok warek mene hakhogo ebekhe kwe nen ineil furuk fugunem inagaisawi inagaumo wa'lari'lagwi.

¹³ O Yerusalem, kota Sion nendawi hundik mene yi, hat hebe wolelenggenhogo hilinglagen mene andi re i laut yenggelek esanggo mondok wurilik welagarek andi hak agen o. Hat hendawimo konogo iluk An nen ninggi'nogo yagahesu hak anggegen? Hat enggin hikhi lagen ari hak mene enggin a'nogo haga mene ekhe werek le'ma, hat hilingik welagen mene andi eberogo nen he ap ekhe nen halogo hobagaumo re elo'lego.

¹⁴ It ap nabi nen hat yagaheti lagaukwa mene omanogo re, we ineranhogo wene inom lalogo wene inom enek yagaheti lagaukwa. Iren he hat haweak werek mene a'nogo weinamet fikhi lagaukwa lek, andiba re hat hobabut agaum eti lagagin lek andi o. Hebekhogore iren hat hoba yagaheti logolik inane nen lalek wene inom hendawinggen wanhu mene inom enek yagaheti lagaikha.

¹⁵ Hat hebe mondogat wolelenggenhogo taik egen andiba re, afuni kwe andi kwe laga logolik hat pilibet healuk enek lili'lagwi andi. Iren inunggul kwanit hilik laga logolik yi'nogo ili'lagwi, ”O kota mondok fano awi afuni o kweangma welagaikharek mene mondogaren inagaiyek agalogolik fogeratarek awi a'nogo re ari a?” ili'lagwi.

¹⁶ It haselei mene mondogaren he hat helokhe kwelakhealuk inabit habi'lagwi, iren he hat puliaphogo endo yakhabi'lagwi. Iren ikhi logolik, ”O Kota a'nogo re niren mondogat molulukhogo pelafo! A'nogo hilingisogo fogoin iluk nenangot hikhi logolik welago mene a'nogo ninenggi yogondak higit asi waga yi o!” ili'lagwi.

¹⁷ Tuhan nen a'nogo hilinghinobagagin iluk nit ebesuageluk yaganisikhi laga mene inom, Aren ebete mene inom, a'nogo mondogat hilingite. Nit he endawit ninafi'lek mondogat wolelenggen hogo ninobagaikhesik, nit ninaselei mene re inomanet fisikhe. Nit a'nogo weaget ninobagagunem nisaluk, it ninaselei mene inagaiyek hoageluk hilingfisikhe.

¹⁸ Yerusalem leget pa'leget yi re, Tuhan enu hombuk palin o! I lingge hundik hup hundik lagarek hak heil amusu lilogo pelabin o. Palfigi'lek le agu mondok werek kwelek enek he hebe mondogat korosonget heoago!

¹⁹ Hit hinendawimo anggikhi lagep mene andoma Tuhan oba fakhogo yagati logobagaigen he enu hombuk palhi logolik, ekhe sambul ekhe sambul hup enggen tulem hineluk aga logoino o. Hit hinagainafuri sumburu nele nen kwe unggut-unggut andoma inafe mori'lagwi andi faget he Aren endawit hinabuageluk, oba kinoti logoni o.

²⁰ Tuhan neisena, it Haren enggin-fenggin inoba fisikhi lagen mene andoma heilenggen isaluk fut fisikhi logoin! Haren a'nogo hilingfisikhi lagen mene ekhe werek nogo a? Inagaisawi nen he inomalik inendawi hundik mene omanogo wathigik nili'lagwi andi, imam inom nabi inom he Hat Hawi Mondok Hore'ma omanogo nen inoatunem wa'lari'lagwi.

²¹ Ap yaman mene inom souge mene inom inebe inoa'luk warek he ebekhe kwe herak fisaga, ap souge inom helime tugum inom he karok enggat oba nen wa'lagaikha. Haren hanini inoba fegen sambul andi re hendawirinafi'lek it mondogat inoaten.

²² Haren he nit ninebe ninoasuageluk he seni pesta hilingisuageluk afuni inayonggo fagarek hak nit ninaselei mene niren ninailorinafi lago mene omanogo inayonggo fegen. Niren taginafo mene inom ninendawinggen hundik logolik inebe kulinafo mene omanogo inom he mondogat inoata. Hat hanini inoba fegen sambul andi re ap misik iluk ogo heise polokhogo wulifa mene ekhe werek lek.