RATAPAN 1 - Allah Wene Fano Wene Hupla Inane

Yerusalem oba enggin-fenggin agaikhe wene

¹ O attak kota Yerusalem oba anggiluk welagaikhe aiba a'nogo re yogondak mondogat areng tiring-tereng ikhe yi, attak he yi afuni ti afuni inunggulenu lombok inanggele'ma nen at enu nek poksek welaga awi a'nogo yogondak he hemi sogwe higit aga. O kota andi attak he enu lego ratu higit welagaba nen, yogondak he enu sebelek inamingmingengge higit hilinglaga.

² Hup inukhogore oba sinurogo le agu mondok werek, eil amusu elokhenggen kwe piali waga. It ap at inom inendawi hundik welagaikharek mene nen iluk ekhe at endawinggen sebelogo koni'lagwi lek. At agaila'lak mene nen weagarogo fuluk he hebekhogo at aselei mene ari'lagwi.

³ Afuni Yehuda mene re sebelogo ferinarek logolik inomameba wiik weakhogo hilingfisugunem enggin weak-peakhogo hugu mondok logolik he, it inawi eroma omanogo herakfisaluk wulifa. Yogondak it inebe re inoba yamukhogo inendawinggen hambuget haluk werek aplere elo'lek agunem, ap inunggulenu amu mene inanggelek kwe omanogo werek. It a'nogo enggin elo'lekhogo hugu were'ma, it inaselei mene we'luk he hukhogo kwelaginabi waga lagaikha.

⁴ Linggene hokho meneba re, afuni misik iluk ogo ekhe Allah Awi wuri'mo omanogo weri'lagwi lek. Helime wuni watarek mene omanogo re enggin-fenggin hili'lagwi, nen it imam-imam omanogo re inendawimo weakhogo limamit falhu werek. O kwe ambe palek hokho meneba omanogo re afuni ekhe werek mondok lek, nen o kota Sion a'nogo re fong warogo werek.

⁵ It inaselei mene re iren nit sebelogo ninobagakhi logolik a'luk he, it he inalong ari'lagwi. At aweak hokhorogo hilingi'mo re, Tuhan nen at enggin-fenggin hokhorogo hoageluk hilingfili'lago. Afuni at againafuri mene re hele warogo felelenginarek he huginabi lagaikharek oba omanogo fisa lagama werek.

⁶ O kota Yerusalem enu werek welagaikhe mene a'nogo re, we attak andoma hilingita mene iluk tindelharek mene hangge hilingik. O andiba inogogwi ferinarek welagaikharek mene re no rusa amburu nele nen omame lek welagarek andi hak inomame mondogat lek werek. A'nogo hilingik logolik it inaselei mene nen muginarek wagunem yi'nogo ti'nogo hilingisu mondogat elo'lek.

⁷ Mondogat wolelenggenhogo taik igik, ou-pou engge hokhorogo hilinglagik, ikhemo nen enek he, Yerusalem enggi werek hilingik logolik attak hilingik welaga mene aremnogo ebethikhe. A'nogo ebethikhi logolik he afuni o aren andoma inaselei mene inenggimo agu kwelek enek he, ap misigen ogo ekhe lebetnabi lagaikha lek anggikhe. At wolelenggenhogo taik ikhe mene a'nogo at aselei mene nen ineilenggen hagasik he obaget endo yata.

⁸ Yerusalem he weak mondok elo'lek mene nek hilingiti logolik, at onggwaregen weaget fakhili'lago. O attak afuni nen at along anggaluk legetfikhi lagaikha mene omanogo nen he, yogondak at alfulukwa kogouk werek mene a'nogo faget inal ngesukum watfisili'lagwi. At enggali agu nen he, limamit falhu werek.

⁹ At ebe emerek mene re mondogat eneksek, oba nen at ebeba asigin mene faget he aren fut fili'lago lek. At ebe mondogat wililinggin wolelenggenhogo taik ikhe, oba nen ap misigen ogo ekhe koni'lagwi lek. At aselei mene mondogat inalong agaikha andiba re aren Tuhan nen endawit nabuageluk kinori'lago.

¹⁰ At mene angge yi mene ti mene hokhorogo omanogo re at aselei mene nen telaga. A'nogo telagasik iren he o Allah Awi wuri'mo, it afuni Tuhan againafuri lek mene re o andi elonggoma kugun mondok lek, iluk ili werek aiba a'nogo kugunem aren eilenggen isikhe.

¹¹ O andiba afuni werek mene re, inane yabul watu logolik nunggu mene herakhili'lagwi; Nit wa'lago hanogo iluk ineluk logogun mene faget he, it inangge onggo hokho meneba palharek mene omanogo re iren we roti inom awari'lagwi. Yerusalem en humeti logolik, ”Tuhan neisena, an heilenggen nean o, an enggin-fenggin hikhi lagi mene yi kwela'nean,” ili'lago.

Yerusalem ane yabul wari'lago isikhe wene

¹² ”Yago, hit afuni kwe bene laga lagep mene nen hineilenggen nealuk kwela'neani o! Tuhan nen anini hokho mene an noba fikhesik, enggin hokho mene noba fikhe mene yi foge'ni! Ou pou hokho mene an nen yogondak hikhi lagi mene ari higit mene re ekhe werek anggegep?

¹³ Tuhan pogoroba nen endu pelabi waga mene nen he, an nendawinggenma werasi pi waga. Aren hele wephogo an neiso'ma ke'nok uageluk nelokhoma hukha waga meneba ke'nokhogo hulambeti. A'nogo hilingnobagaikhemo linggene inukhogo an namunek ou hikhi logouwageluk hilingnobagaikhemo welagi.

¹⁴ Aren he an naweak omanogo abirengge waganogo misi'mo yelfikhesik, an nalonggopma kelfikhemo enggin nen he nomame mondogat lek hilingisogo nobagaikhe. Tuhan nen he an nebe it naselei mene inenggiba wogisikhemo re, it andi ninom walhaluk nebe ogalare elo'lek aga.

¹⁵ An nagoromi sikhe inenggi puk mene o ari faget ninghogo hilingitarek inap omanogo re Tuhan nen maben hak anggikhe. Aren he an nagoromi ap souge mene mondogat legasuageluk he ap tentara lit-lat isikhe. Aben anggur agai perelharek hak, Aren afuni an nunggulenu mene mondogat alperelogo fisikhe.

¹⁶ Andiba re neilamusu mondogat pialiluk pili'lago, an nebe kon nobagagik, nendawimo nagaiyekhogo hilingnobagagik u mene ekhe werek lek. It naselei mene nen mondogat sebel fakhagama re, an nunggulenu mene inangge mondogat lek aga.

¹⁷ An nen nenggi liakfuluk lebetnabuageluk hilingiti lagiba nen, an konnabu mene ekhe werek lek. Yi kwe ti kwe mondogaren he Tuhan nen naselei mene lakfisa wagunem, it we'luk an noasi weri'lagwi. An he ologoilong engge hugisagarek mene hak hilingnobagali'lagwi, it inanggele'ma nen he hebak inafe mene hangge hilingik welagi.

¹⁸ Oba nen we Tuhan enek he eberogo mene werek. Aren wene melalek ikhe mene omanogo an nen sagalogo fikhi lagagi. Yago, hit yi afuni ti afuni hinunggulenu lombogen he an nane yi hinesanggo holini o, An yi enggin ti enggin hugu mandok welagi mene andi hineilenggen neani. An nagainafuri ap souge inom helime tugum inom mondogat hele warinafasik, felelenginarek hugisa lagaikharek oba omanogo fisa lagaikha.

¹⁹ An nen nagaila'lak ninom hundik welago mene omanogo wolinafi lagi oba nen iren an hembelnafi lagaikha. Ap imam inom inunggulenu ari mene ferinarek inap omanogo inom mondogat he, o kota ebekhe kwe omanogo nen wa'lagaikha. Nineluk logogun nen iluk nunggu mene herakhugunemen wa'lagaikha.

²⁰ Tuhan neisena! An futnobagain o, an nendawinggen sebe igirik noba mondogat fogikhemo welagi. An nen attak kwanirogo hilingiti lagagi omanogo faget nendawinggen warikhi lagi. Ebekhe kwe re ap enek inoatunem, olokwe re ap warek enek pi pou ili'lagwi.

²¹ Tuhan neisena! An limamit falhu welagi mene andoma nane hesanggo holin o, Aben an konnafu mene ekhe werek lek. Haren an alomat lasuageluk nobagegenma re, it naselei mene nen inagaiyek hili'lagwi. Linggene haren abok isigin mene a'nogo wesuak. An enggin mondok elo'lekhogo hikhi lagi mene ya re, it inoba ogo a'nogoat hoageluk hilingfisano.

²² Iren inaniniba hilingiri'lagwi mene andoma futfisan o, An nen hat helokhoma weak hilingiti lagagimo re, Haren an noba hilingnobagegen mene ari higithogo it ogo a'nogoat hilingfisan o. An nendawimo heiselhunem elo'lekhogo logolik nendawinggen ou en limamit falhu welagi o,” iluk le agaikhe.