PENGKHOTBAH 7 - Allah Wene Fano Wene Hupla Inane

Ineluk faget menenei wenggelharek wene

¹ Amusu onggo hokho mene andi re horok harek hak oba nen, inenu fano agarek andi nek he mondok esin he andi, nen inebe ta'lagaikharek oba andi re harek hak oba nen wa'lagaikharek oba andi nek he mondok fano.

² Seni isatukwe lagaikharek andi re harek oba nen fong wari'lagwi kwe lagaikharek andi nek he mondok fano. Andi re wa'lari'lagwi mene andi nen afuni inebe lombok nenangorinafu werek higi, iluk wenggel hikhi logogun.

³ Endo agaikharek andi re harek hak oba nen, inendawimo weak agarek mene andi nek he mondok fano. Inelokhe heiselogo logolik oba nen inendawimo heanerogo logogun andi fano.

⁴ Ap kembu mene nen he inagaiyek anggagarek mene omanogo faget enek murok lagaikharek, oba nen he ap hebelek mene re wa'lasigin mene faget wenggel hikhi logolik werek.

⁵ Ap wenggelek mene nen wenagisagarek andi re mondok fano, oba nen ap futfou elo'lek mene nen fogerinafarek andi nek he mondok weak.

⁶ Engga alok alogengge endu nen lei nilik lei ane selelem-selelem ninggerek hak, ap kembu mene nen endo agaikharek andi re we alomarogo hangge.

⁷ Ap hebelek mene nen eranen wene igin halok, aren igin mene andi re ap kembu mene nen agarek igin, nen lebetnabuageluk uang hinagaisogo wogosigin mene a'nogo helagain halok he, fanorogo wenggelhikherek mene a'nogo weaget fakhagain.

⁸ Wene attak-attak agarek mene andi re weak hak oba nen, hobuk agarek mene andi nek he mondok fano. Leget fakhagarek andi re weak oba nen sebelfakhagarek andi nek he mondok fano.

⁹ Ap morue mene nen ina'mage lagaikherek mene andi inendawimo hinagaisogo fetaluk welagaikharek hilingi'mo re, ina'mage weak-weagat lagaikherek andi weak.

¹⁰ Hiren ikhi logolik, nenahalok o attak andoma fano welagaba nen, yogondak he weak werek nogo, iluk heinok wanu fuk. Ariginik mene andi re ap kembu mene nen heinok wanhagarek mene.

¹¹ Ap ineluk logolik inendawinggen kagalogo logogun fano. Isnendawinggen kagalek mene andi re inalolegengge helagarek andi emberek higit.

¹² Andi re uang inagap telengge wogisagarek a'nogo inom higitse'ma re, endawinggen kagalek mene andi re mondogat esin! Aren andi mene eiserogo logogin halok he agap telek logogin.

¹³ Allah eabu hilingitu mene fanorogo futfikhi logoni. Allah nen afe kwanit fugu mene re ap sa hagen higirabesu hak nogo?

¹⁴ Andi nen he hat hoba fano mene ekhe agu halok he hagaiyek anggikhi logoino. Oba nen hat enggin mene hoba agu halok he, fano mene inom weak mene inom andoma re Allah nenat wokheri'lago hilingi'mo re honggorasu fuk. Nit afuni re hobuk asigin mene andi re ninggi'nogo hilinglasigin iluk ninonggot welago hilingi'more.

¹⁵ An neluk he we alomarogo hak welagiba nen, an nebe neluk logolik oba ekhe hilingitunem hikhi lagi re yi: Ap ekhe weak hilingiti'lek werek oba nen ap fano mene a'nogo ebe wa'lagarek. Nen, ap ekhe kwanirogo hilingiti logolik weak mondok hilingiterek oba nen eluk uanhogo werek.

¹⁶ Mondok fanorogo nek welagik, hebelogo nek hilingitik, ikhi logoumo re elo'lek, Inonggwaregen weaget fakhagarek andi re ninggi'nogoluk nogo?

¹⁷ Hina'mage hokhorogo lagagik, hinafe morue agik ugubo. Wa'lasugun oba oan asi wagi'lek werek kwelek, hinebe tak wa'lasugun andi re ninggi'nogoluk nogo?

¹⁸ Wene ero pire andem oba nen ogalikhi logoino. Nit Allah ba ninailorogo logogun halok he ambisangma fano hiliglaga logogun.

¹⁹ Hebelek mene andi nen he onggwarek agun a'nogo omame hokhorogo wogeterek, nen ap o kota misik ekheba inomame werek inap inebe 10 nen werek oba nen ogore hebelek mene andi nek he omame mondok hokho werek.

²⁰ Kweangma yoma re ap obabut mondok fano mene ekhe werek lek, fano mene nek hilingiti logolik weak mene ekhe hilingiti'lek welagaikharek mene werek legat.

²¹ Afuni inane samik-samok agarek mene andoma futfuluk wanhi logou fuk, Ap hat hamingmingengge logogin mene nen hanggomo kagalhi logogin mene andi re sa elu?

²² Ap amu mene inoba haren homan fisegen halok andi re hat honggwaregat helu.

²³ Mondogat andi re an nendawinggen kagalek andiba obabut mondogat palhi, oba nen he an nen inendawinggen kagalek mene andi herasigin iluk ninghogo heratunem he yatmaat asi lagunem hikhi lagi.

²⁴ Sa nen eluk ero ari yi'nogo hilingik iluk herasu hak nogo? Andi futfugu aplere mondok elonggoma hilingi'mo re mondogat elo'lek!

²⁵ Oba nen an nen nelu asuageluk heratik, andomokhogo yanggulhik hilingiti lagi. Inendawinggen kagalek mene andi heligik, heinok woginafarek mene onggo igik ikhi logoiyogen iluk hilingiti lagi. An nen nelu meneba walhikhi logolik, weak andi re kembu agaikharek he andi, nen ina'mageba hilingitarek andi re hilingisigin iluk ninghogoat hilingitarek he andi aro.

²⁶ An hasigi mene re wa'lagaikharek mene andi re harek hak oba nen hemi nek he inendawinggen ninggerek mene werek. Hemi inendawi nunggunem hilingiri'lagwi andi re hele web etarek mene inom, ikan wasuogeluk su nelon meneba lugutarek andi inom emberek higit. Aren magaisogo pugerisugunem he heleba pikpuget isugunem hak hilingik. Nen, ap Allah endawimo anggikherek mene hilingiterek mene re yepse'ma andi nen ogal fakhogoin oba nen he, ap weak hilingitarek mene re ele'ma ke'nok ugun.

²⁷ Ap awenggelek mene nen ili'lago mene andi hani: Mondogat andoma re an nen eil misik-misik onggo helagain iluk heratunemen herati o.

²⁸ Nen, fena onggo herati logolik welagiba nen, higit asu lek hak ari'lago. Ap inebe seribu mene inanggele'ma nen he ap misik ekhe an nen legeisogo fou mene herati. Oba nen it inanggele'ma andoma nen hele misik ekhe an nen legeisogo fou mene were'ma herati'lek.

²⁹ We yi nek an nelu agi: Allah nen he nit afuni we serogo welagaikharek mene hilingisogo ninobagaikhe, oba nen he, nit ninonggwaregen set kwil-kwalhogo hilingfakhikhi lago.