PENGKHOTBAH 6 - Allah Wene Fano Wene Hupla Inane

¹ O kweangma yoma higithogo hilinglagu le'ma afuni inoba enggin kwelaklagunem hikhi lagi mene re yi.

² Allah nen afuni ekhe inenggi werek hilingisogo fisigik, inalong mene logouwageluk hilinginafik, ap misik ekheba angge yi mene ti mene wogetik hilingitunem he, at endawimo amolo anggikherek mene omanogo mondogat he at oba nek werek. Oba nen he Allah nen ap a'nogo wogeterek mene omanogo ninggo winggo mondok logouwageluk hilingfisikherek lek, we it ap amu mene at ebe inonggot mene omanogo inangge nunggu mene hilingfisikherek. Ma re mondogat andoma re we alomarogo nendawimo weak asu hak mene nek hilinglagarek.

³ Ap ekhe againafuri inebe seratus nen taginafe mene ebe eluk uanhogo logolik umur uanat welaga meneba nen ogore, at endawimo agaiyekhogo welagi'lek, nen at ebe ogo afuni salinafarek oba fanoma omanogo salhi'lek hesanggema salfisugunem he, an nen anggikhi logolik he omalik inamep laga la'luk waregengge taginafarek andi re eil misik fanoba nen, ap eluk a'nogo werek andi nek he mondok weak anggigi.

⁴ Omalik waregengge ta'laga mene andi re we alomarogoat ta'laga, nen laga ogo we obakhe palegat mumse'ma lagama re at oba weak-weagat inonggot agaikha.

⁵ Aren o selek inom eluk werek mene inom oan futfigi'lek andi nen he, we weingik logolik abolok legat werek.

⁶ Andi re mondok fano, ap eluk werek kwelek enek dua ribu tahun hilingiteba nen oba fanorogo ekhe welaga le'ma andi. Andiba re inebe pirenet he o misik awi lagaikharek he lek nogo?

⁷ Afuni nen yabu hilingitarek andi re nunggu mene faget helagarek, oba nen he inoba homot fisikherek mene ekhe werek lek.

⁸ Arigini'mo re, ap hebelek mene inom kembu mene inom walet hamo nen he ap hebelek mene nen helogoin mene re nena mene nogo? Nena mene faget iluk ap inenggi lek mene afuni inanggele'ma inobabut fanorogo welagaikharek nogo?

⁹ Mondogat andire alomarogo nek we sogoi murok lagaikharek hak were'ma re, mondok fanore hokho-pokhorogo helelo iluk murok lagaikharek mene andoma herakfuluk, ninenggiba logogin mene andem faget higit anggikhi logogun fano.

¹⁰ Yi mene ti mene yogondak weregengge andoma re o attak ogo welagaikhe meneat. Ap ekhe omame werek mene faget at a'nogo hilingik iluk wene onggo lagalu elo'lek mene andi re nit mondogaren ninelu o.

¹¹ Aren ane a'nogo nek ikhi logolik logoumo nen he ane ugu mene omanogo ebe ti faget iluk ambisangma tibu lek hak, nen aren ambisangma ekhe inom hela lek hagat.

¹² Nit ninebe we eilhorogat logolik ebe ambisangma legengge faget were'ma nen we inafumak palogo lagarek hak lagarek mene andomaba re ebe ti mene iluk ninggi'nogo inelu asu hak nogo? Nen, at ebe lek agu kwelek hobuk o kweangma yoma asigin mene ninggi'nogo elu asu hak nogo?