PENGKHOTBAH 4 - Allah Wene Fano Wene Hupla Inane

¹ Andi nen o kweangma yoma higithogo hilingitarek lek mene andoma an nen ekhe inom futfugunem en he, afuni sebelogo fisagarek mene omanogo enggin hikhi logolik le agu were'ma re, afuni ekhe nen leberinafi lagaikha le'ma isigi. Ap inenggi omameba sebelinarek werek mene andoma nen he inomame hokho meneba a'nogo hilingfisugunem he, ap misigen iluk ogo ekhe leberisa re elo'lek welaga.

² Andi nen he it afuni wa'lagaikha mene andi re fano hak oba nen, it afuni ineluk werek mene re elo'lek hak were'ma higirik he an na'makwe hetperikhe.

³ Oba nen he it ap oan ta'lagi'lek mene andoma nek he o kweangma yoma weak agarek mene andoma higi'lek andi nen he, andi faget inagaiyek werek anggikhi lagi.

⁴ An nen ekhe nelu mene re yi: It afuni nen yabu inomamerogo wanharek andi re it inom siok erarek mene andoma ineabu ambisangma weregen ina'ma weagen hilingitarek. Andi re we sogoi murok lagaikharek hak alomarogo hilingitarek.

⁵ Ap morue mene andi etokhogo enggi yinggilogo hurek enek logolik sumburu ouwak eilmorogo wa'lasigin fano iluk onggwarek ebe hal fakhigi'legengge werek.

⁶ A'nogo werek mene andi re fanoba nen he, inangge endebengge were'ma inendawinggen hambukhogo welagaikharek andi nek he mondok fano anggikhi lagi. Oba nen inenggi pireba yabu hokhorogo hilingirik lagaikharek andi re sogoi murok lagaikharek higit.

⁷ Nineluk yiba we alomarogo werek mene re ekhe weregat.

⁸ Ap ekhe eisok we misik mene re at againafuri lek, nen agaila'lak ogo legat mene werek. A'nogo werek meneat he aren yabu nek omamerogo hilingirik lagarek andiba angge andoma nen oba homot fikherek lek. Andi nen he aren agaiyek hikhi logolik werek mene a'nogo herakfuluk likhak wulagaisogo hilingiri'lago mene andoma re sa faget hilingirik lagarek nogo? A'nogo hilingitarek mene andoma ogore we alomarogo aro, nen andoma re inoba enggin-fenggin hikhi logolik mondok werek.

⁹ Ap misik amunek werek andi re weak oba nen, ap inebe pire logogun andi nek he mondok fano. It yabu hilingitu mene re ambisangma fano asigin.

¹⁰ Ap ekhe pule pikhe halok agailak ekhe nen lebetha hak, nen ap misik andi re amunek hilingi'mo re at ebe pule pikhe halok ap andi lebetha mene ekhe werek lek andi nen he namelmelsek.

¹¹ Hubanggo ogore inebe pire erarogo nogogunem he aganhan welagarek, oba nen ap misik nogogin halok he at ebe amu nek hilingi'mo re ninggi'nogo aganhan logou hak nogo?

¹² Ap inebe pire mene logoin halok he, aben it inoba wulifi logolik inom yei yabugun oba nen he it inomame asu hak. Oba nen ap ekhe amu nek lagain halok he serogo omame leget fou hak. Hele henagan meneba saplirogo lalek mene re siserogo lebegesumo re elo'lek.

^13-14 Ap enggi lek meneba nen he raja asu hak, ap hele warek werek menere takhta raja hu'lagarek meneba elok hu'lasi lagau hagat. Oba nen he ap raja ebe yaman agunem aben komo wene yagatu mene omanogo holhi' legengge moruerogo hilingitarek mene andi re, ap alage mene ekhe enggi lek oba nen endawinggen kagalek logogin halok fano hak oba nen ap andi nek he mondogat nonghongsek.

¹⁵ An he afuni mondogat o kweangma werek mene oma faget wenggel hikhi logolik he, it mondogat inanggele'ma nen ap souge mene ekhe raja obali'mo menfoumo nek he higitse'ma futfikhi lagi o.

¹⁶ Afuni aren ferinarek logoukwe andoma re, aben ogo wenasu elo'lekhogo hilinglasu hak, oba nen at ebe mondogat asi lamo nen he aren hilinginaferek mene omanogo faget ebet haluk he hai wasu lek hak. We eberogo mondogat andoma re alomarogo sogoi murok lagaikharek hak hilingik.

Weak-weak wene wasu fuk isikhe wene,

¹⁷ O Tuhan Awi wuri'mo laga logolik halok he hendawinggen wenggelogo nek laga logoino. Andoma nen yangguligiluk lagain andi re fanoba nen ap kembu mene nen hilingitarek hakhogo yi mene ti mene Tuhan obaget fei lagaikharek andi re weak. It ariginik mene andi re yi weak mene, ti re fano mene iluk penesu lek hak.