PENGKHOTBAH 3 - Allah Wene Fano Wene Hupla Inane

Yi wene ti wene hilinglagarek andi re hilinglasigin iluk werek oba nek hilinglagarek iluk isikhe wene

¹ O kweangma yoma yi wene ti wene hilinglagarek andoma re at Allah nen ti sambul yi'nogo hilinglasigin iluk endawimo wenggelogo fesikhe higithogo nek hilinglagarek.

² At Allah nen he, At ebe o ti sambul ta'lasuwak, nen, ti sambul wa'lasuwak, anggigik. Nen, yi mene ti mene, o ti sambul awi yasuwak, nen, ti sambul ero henogo wulakfisoak anggigik,

³ nen, at ebe o ti sambul wasuak, nen, ti sambul ebe oba ou mene fano asuak, anggigik, nen, o ti sambul o meisalhik, ti sambul wutik uwak iluk, Aren anggikherek oba nek hilinglagarek.

⁴ Allah nenat he, o ti sambul le asuwak, nen, ti sambul endo asuwak anggigik, nen o ti sambul fong watik, nen, ti sambul inendawimo haien wuni watik, uwak anggigik.

⁵ Nen, O ti sambul helep woukhogo lakfisoak, nen, ti sambul andogorogo fouwak, anggigik. Nen, o ti sambul emberek nogo uwak, nen, ti sambul nogo igi'lek weat logouwak, iluk Aren anggikherek obaat hilinglagarek.

⁶ At Allah nenat he, o ti sambul longgoikhe mene herakhoak, nen, ti sambul ebe longgouwak, nen, o ti sambul fakfembik logouwak, nen, ti sambul herakfisoak,

⁷ Nen, o ti sambul su ebe kwasuwak, nen, ti sambul su ebe tilibuak, nen, o ti sambul at ane legat logouwak, nen, ti sambul ane ikhi logouwak, anggigik,

⁸ Nen, o ti sambul he inebe inendawirinbuak, nen, ti sambul inabiret fisoak, nen, o ti sambul weim yabuak, nen, ti sambul lambuluak, iluk Aren anggikherek oba nek hilingitarek.

⁹ Nen, niren yabu ebe set kwil-kwalhogo hilingitorek mene ambisangma re nena mene saburogorek nogo?

¹⁰ At Allah nenat he, Yi yabu ti yabu set kwil-kwalhogo hilingiti logouwageluk nit afuni ninoba enggin mene wo'nisasikhe iluk an futfikhi lagi o.

¹¹ At Allah nenat, yi mene ti mene mondogat, O ti sambul ti'nogo hilinglasuwak anggigik, Nen Aren nit hobuk mondok-mondok logogun mene andi nelu logoile, iluk anggikhi logouwageluk hilingninafikhe meneat he, ero ba nen elugun oba Allah hilingiterek mene andoma niren fut fou re mondok elo'legat welagorek andi.

¹² Nen wene esin he nit ninebe nineluk logolik, ninendawimo ninagaiyek oba fanorogo hilingiti logogun andi nek he an nelu o.

¹³ Nit ninebe mondogat ninenggiba yabu set kwil-kwalhogo hilingfuluk yi mene ti mene yagaisogo ebe tatik, palhik, ogorek andiba ninendawimo hai hikhi logolik, sumburu ninggik, i ninggik ogorek andi re, At Allah nenat wo'nisikherego.

¹⁴ At Allah nen yi'nogo ti'nogo hilingiterek mene andoma re mondok-mondok logogin andi nen he an nelu o. Nit afuni nen ekhe oba to'motfigik, misik ekhe pelakfigik hilingisu mo re elo'lek. Nen At Allah nen a'nogo hilingiterek mene andi re niren At oba ninailorogo logouwageluk hilingiterek.

¹⁵ Yogondak hilinglari'lago mene andoma re attak hilinglagaikhe meneat. Nen, hobuk hilinglasigin mene andi re attak welagaikhe meneat hilinglasigin. At Allah nen, yi wene ti wene endamat hilinglaga lagaikhe meneat hobuk hilinglaga logouwagaluk anggikherek oba hilinglagarek andi,” iluk isikhe.

O kweangma yoma higithogo hilingitarek lek mene faget isikhe wene

¹⁶ A'nogo isikhesik he, ekhe mel isikhe: ”Afuni kweangma mene inobabut hilingitunem neilenggen hikhi lagi re yi: Unggum higithogo inoba figik, kotik, ikhi logou oba omanogoat weak hilingitunem isikhi lagi o.

¹⁷ An nendawimo nen he At Allah nen, o andi sambul ti'nogo hilinglasuak, iluk anggikherek obaat hilinglagarek, andi nen he afuni inobabut higithogo hilingitarek mene inom, weak hilingitarek mene inom, inebe lombok hobuk wene inoba figik, kotik, igin, anggikhi lagi o.

¹⁸ Nane elugun warogo re yi'nogo, At Allah nen he, Hit hinebe hilinglasugun andi re, wam, sue, paik, andi hinom higit aro, iluk yaganisagaluk ninobabut palherek anggikhi lagi o.

¹⁹ Nit, wam, sue, paik, ninom higirat hilinglagorek. Nineluk, we, welagoresik he, nit afuni wa'lagik, it wam, sue paik wa'lagik, ninom wa'lagoregenek. Nit afuni ekhe saburogorek mondok lek. Ninom higithogoat, we, tulemat nineluk welagoresik wa'lagoregenek andi.

²⁰ Nit andi ninebe ero misik, kweang alolong engge mene hilingi'mo re, kweang alolong enggeat hilinglagaikharek. A'nogo agaikharesik niret iret ninebe pirenet enggere obalik we misi'moat lagaikharek.

²¹ Nit afuni ninebe wa'la'luk ninareagun selokhogo kwe ponggwe lagogorek, nen, it wa'la'luk inareagun selokhogo kweangma pagarek, iluk nit tukumhogo ninonggoro.

²² Andi nenat, nit afuni fano hilingisugun he yi: Ninebe nineluk logolik, ninenggi nen ninomamerogo wokfakhaluk ninagaiyekhogo hilingiti logogun andi nek he esin higi o. Nen wa'lasimbik oba nen hobuk hilinglasigin mene re sa nen yaganisa hak nogo? Ninonggoro,” iluk isikhe.