PENGKHOTBAH 2 - Allah Wene Fano Wene Hupla Inane

¹ An nen wene kagalogo wenggelhi logolik fanot fakhagain anggigik, nen ekhe fano mene nelu asuagaluk murok lagain iluk ebetik, ikhi lagiba nen he, andi ogore alomarogoat hilingiti lagi.

² Andi nen an nelu aga logolik endo agaikharek andi re moruerogo, nen inagaiyegetarek andi ogore furek legengge hilingi'mo hasigi.

³ An nebe hebelek mene asigin iluk namolo anggikhi lagi mene a'nogo nen wo'narek laga-laga, an nen he anggur agai nunggu mene inom, seni isagaisogo i ninggi logolik kabogetukwe omanogo inom, lagain halok he afuni kweangma ineluk we horokhogo ya logolik fano logogun he andi hea, iluk ebeti lagagi.

^4-5 An nen yabu hokho mene hilingiti logolik o an nobaget wurik lagik, yabu waganekwe, an nen e anggur awi yatik, enggen nenggarek mene yi agayo ti agayo mondogat yatik isigi.

⁶ A'nogo hilingitirik yabu yagokwe e awi yago mene omanogo sakhoratu mene faget he i mogo habulogo anggwe halogo lakfigik isigi.

⁷ Namimgmingengge hokhorogo welagaikha mene andoma fena re onggoba huninafi mene, nen fenare nawi loba nen ta'lagaikha mene. Nanggo re it ap o Yerusalem oba inanggo welagaikhe mene andoma inom he higitsek lek. oba nen he an nanggore mondok hokho-pokhorogo welaga.

⁸ An nen perak, emas inom hokhorogo, it ap raja-raja werekwe o an nen ferinarek welagikwe omanogo lagunem nendawi fanorogo iluk wo'neti lagaukwa mene inom, kaboget fesigi. Nen, it alage yenggerugwi nen inom helime yenggerugwi nen inom wuni watu mene omanogo ba re an nagaiyek mene hilingnobagakhi lagaukwa. Nagagwi namingmingengge mene an nendawimo namolo anggigirek mene hokhorogoat welagaukwa.

⁹ Ibi eberogo nen it ekhe o Yerusalem welagaikha inap andoma re sebelek hak werek kwelek an enek he ap hokho nagun welagi, nen wenggelek mene andi inelu mene re we an nami namuat welagi.

¹⁰ An nen yi'nogo ti'nogo hilingisigin iluk wenggelhirek mene aremnogo mondogat he higithogo nek hilingiti lagi, ekhe nendawinggen nunggu mene sebel hikhi logolik welagagi lek. An nenggi ambisangma nangge hokhorogo hilinglagu mene omanogo faget wonoget fakhikhi lagi.

¹¹ Oba nen he hobugen an nen penetunemen he, yabu hilingitirek mene omanogo mondogat inom, nenggi ambisangma saburikhi lagi mene omanogo inom, ekhe mene ekhe mene omanogo mondogat elugun warogo hilingitu mene faget inom, andoma mondogat faget futfikhi logolik, a'nogo hilingitirek mene omanogoba ekhe werek le'ma hasigi. Nomamerogo hilingitirek mene omanogo re we alomarogo sogoi murok lagaikharek a'nogo hak werek anggasigi.

¹² Obabut hilingik aplere ekhe mene ekhe mene hilinglagarek andi re ap raja ekhe nen hilingitu mene andoma re at ebe oan lagagi'le'ma it raja-raja attak mene nen hilingitu mene nek hilingitarek. Andi nen an nen ebeti logolik, ”Afuni inendawinggen wenggelek mene agaikharek andi re ebe nena mene nogo, athe kemburogo hilingitarek inom moruerogo hilingitarek inom andi re ningginogoluk nogo?” iluk wenggelhigi.

¹³ Eberogo nenat he an arat nelu agi, inendawinggen wenggelek mene andi re mondok fanoba nen he kembu mene andi re morue rek, Andi re selek mondok fano meneba nen mum agarek a'nogo inom higit.

¹⁴ Ap hebelek mene nen ti fikhit laga lagi iluk futfagarek, oba nen ap morue mene nen tip-tabenggerik lagaikharek hak lagunem hasigi. Oba nen obaburugwi ariginik mene andi it inebe mondogat inoba asigin mene andi re an nelurek.

¹⁵ Andiba an nen wenggelhi logolik, ap morue mene inoba agarek andi re an noba ogo a'nogo hilinglasigin mo re, nendawinggen kagalek andiba ekhe hilingisu lek hak. Andi faget an nen anggikhi logolik hebelagaikharek mene andiba nen hilingisu mene ekhe werek lek higi, iluk anggasigi.

¹⁶ Ap kembu mene nen he weak-weagat inoba inonggot agaikharek, oba nen he ap hebelek meneba nen ogore weak-weak eberisikhi logogun legat. We hilinghiling mene ogore nit mondogat ninoba ebet nisikhi logogun lek enek. Ap hebelek meneet nen morue meneat he ninebe higithogo nek wa'lasugun.

¹⁷ Andi faget he ineluk welagaikharek andi ambisangma an nobaget ekhe werek lek, amu mene ogo legat. Mondogat andoma re we alomarogo hilingi'mo re an he sogoi murok laga-lagi.

¹⁸ Yi yabu-ti yabu hokhorogo hilingiti lagi mene andoma an nen ap an nobali'mo menlasigin meneba fugungge hilingi'mo re, an nen ikhi lagi mene andomaba ambisangma an fano hilingnobagagin mene ekhe werek mondok lek.

¹⁹ Nen ap andi hebelek meneat he kembu mene iluk he sa elurek nogo? Andi hilingik kwelek oba nen he at andi re an nen o kweangma yoma neluk logolik nendawinggen wenggelek oba set kwil kwalhogo hilingiti lagi'mo re, ambisangma agu mene andoma eise asigin. Arigini'mo re a'nogo hilingitu mene andi ogore we alomarogoat.

²⁰ Yabu nomamerogo hilingiti lagagi mene andoma faget yogondak he nambigen agwi anggikhi lagi.

²¹ Afuni nen yabu hilingisuogeluk wenggelek mene a'nogoba inom, elu mene a'nogoba inom, inenggi pugunsek meneba inom, yabu ambisangma ekhe mene helagain iluk hilingitarek. Oba nen ambisangma nen he aren angge yi mene ti mene omanogo herakfuluk wulibigin halok, yi mene ti mene enggi ambisangma mene omanogo ap ekhe we likhak wati'lek mene a'nogo eiserogo hilinglasigin. Arigini'more andi ogore alomarogoat, mondogat elo'lek.

²² Afuni inelu werek andem oba inukhogo kweangma yoma logolik yabu hokho mene hilingiti logolik enggin mene ogo hikhi logogunat. A'nogo hilingiti la'lugen enggi ambisangma yi iluk wonoget fakha hak nogo?

²³ At eluk logolik ninggi'nogo hilingisigin meneba, oba enggin mene inom, endawimo ou mene inom kwikherek. O hubanggo meneba nen ogore inendawimo wenggelhi logolik he fenggek-fenggek enek ikherek. Arigini'mo re mondogat andoma re we alomarogo nek hilingik.

²⁴ Afuni inobaget mondok fano mene ekhe werek lek, oba nen he, we ineabu helaluk, inamburu ninggik, inagai ninggik, amu mene ekhe hilingitik ugu mondok welagaikharek andi. Andi mene ogore Allah nenat wogisikherek iluk nelu ari'lago.

²⁵ Ap ningginik mene nen Allah inonggorengge agaiyekhogo ninggi logolik logou hak nogo?

²⁶ Allah nen he ap At endawimo fano mene hilingiterek mene a'nogo hebelagaikharek mene inom, elu agarek mene inom, inagaiyek agarek mene inom, wogisikherek. Oba nen he ap weak hilingitarek mene re ineabu wokfuluk inangge ambisangma nen kabokhogo re ap Allah endawimo fano aple hilingitarek mene inoba wogisoageluk hilingfisikherek. Arigini'mo re mondogat andoma re we alomarogo sogoi murok lagaikharek hak hilingik.