PENGKHOTBAH 12 - Allah Wene Fano Wene Hupla Inane

Ap endawinggen wenggelek mene nen hilingiterek wene

¹ A'nogo isikhesik he hobuk ekhe mel isikhe: ”Hit hinebe logombigen hobuk arat yaman asimbik yi tahun ti tahun logolik, hinendawimo hinagaiyek higi'lek weak enek hikhi logogun andi nen he, hineisena Elalhinafikhe mene oba ebeti logoino o.

² Hinebe arat yaman asimbik, hineilenggen puk asumo re, o mo inom, tugi inom, hesagal inom, yatu kwelek meneat he afumagengge salasimbik hineil mum agik, nen ohena hik weak mene nen meiso waluk wagarek higit, weaget hinabigin mene hinoba asi wagik, igin o.

³ Henggi leik leigenggetunem he hambuget ha mene ekhe logogin lek. Heisok omame logogin mene a'nogo omame legasimbik lebelek asigin. Nen haik he wuthogo hilingik le'ma nunggungge sagalure elo'lek aga logogin, heilenggen he mum asumo yethugu aplere mondogat mum hikhak ikhi logogin.

⁴ Afuni ebekhe kwe inanggilugeti logolik inane hokhorogo ugu mene omanogo re hat hesanggoma re inane anggungga nek ugunem holhi logogin. Gitar watunem inom, nen mesin yi mene ti mene sagalhunem inom ane hesanggo holhi logogin lek. Nen sue ane ikherek mene andoma nen he hendawinggen eluget hafunem nogo homokhogo ure elo'lek aga logogin.

⁵ Kwe liabek lagau re hailo agik, ebekwe hendawimo fuluk erogat lagik, hesi helel mondok yauwak igik, kwe lagu aple heisok enggin agik, igin. A'nogo hilingisigin andem oba re, hendawimo yi namolo ti namolo Nen hinebe re hinobalik mondok-mondok logogun oba omanogo lagunem he, afuni kwebene logogun mene nen he inouwak le agik, fong watik, hilingiti logogun.

⁶ Kombi hele perak meneba ugungge a'nogo tekhogo lologo amu-amu pigik, lampu emas mene a'nogo kobokhogo pikhi logolik wolelenggen tagalogo taik igik, i sumur habuli'mo hinatungge agale a'nogo tekhogo weak agik, iwak omanogo halokhogo yinhun igik, igin.

⁷ Nen ninagap he ambotkwe kweang al agik. Nen set ninelugeraterek mene a'nogo re sugulogo Allah were'ma lagik, igin. Andi re we At endawi fano nen weat wo'nisikhe mene hilingi'mo re a'nogo hilinglasigin.

⁸ An nendawinggen kagalek mene nen he, Yi mene ti mene mondogat andoma re we elama faget alomarogo welagarek, iluk igi andi,” iluk isikhe.

Wene mondogat andoma faget elugun warogo re yi

⁹ Wene wenggelni andi re hebelek mene logolik endawinggen kagalek agun hilingi'mo re inelu agaikharek mene andoma afuni mondogat inoba yagaisasikhe. Komo wene omanogo mondogat ero pilingitikhesik, andi eberogo a, lega, iluk obabut palogo nen afe halhigik lisu palogo fesikhe.

¹⁰ Aren he wene inendawinggen ago watu mene faget herakhagain iluk amurururogo hilingitikhe, nen at ane palogo fikhe mene andoma re mondok higithogo nek palogo fikhe.

¹¹ Ap hebelek mene ane andoma re sige tomuk werelek mene ap domba halharek mene nen anggo tegelhi logolik fisogo welagarek andi higit. Inane agaumhogo agarek mene inom, komo wene inom kabogete mene andoma re posiemanggen omamerogo telek mene hak werek. Mondogat andoma re Allah nit nineisena Gembala we ami-amuat mene andi nenat wo'nisikherek.

¹² Namlogo e. Wene misik fanorogo futfagain mene re yi! Buku hokho pokhorogo palharek andoma re wurep kobok u lek hak, hokhorogo yangguliluk wanharek mene andoma ogore inebe inomame li'lekhogoat hilingitarek.

¹³ Andoma mondogat an nen wil-wal hasigisik, wene andi ambisangma lambulogo an nen anggasigi mene re yi: Allah nen afuni elalinafe andi re At oba inailorogo logolik hilingiti logouwageluk elalninafikhe hilingi'mo re, afuni inebe lombogen At awane fano wene pukhogo fisogo logolik hilingiti logogun andi esin o.

¹⁴ Nit mondogaren hilingiti lago mene andoma At Allah nen ayo wurogo pilingninabigin, Wene weak mene inom fano mene inom andi nen hinago werek mene andoma mondogat ayo wusigin.