PENGKHOTBAH 11 - Allah Wene Fano Wene Hupla Inane

Inendawinggen kagalek mene nen hilingitarek wene

¹ A'nogo isikhesik he hobuk ekhe mel isikhe: ”Uang hit mene eak tasuagaluk, it afuni ekhe yi mene ti mene onggo wanhik, palhik, agarek mene inoba fakhegep halok he, hobuk hit hinenggi werek hilinglasugun o.

² Hobuk hit weak mene hinoba asigin hinonggot andi nen he, hinangge yi mene ti mene minggilhigik, amu-amu awingge wogisugunem awi yatarek andi hak fakhaluk inomamerogo hilingiti logoino o.

³ Nen, ohena higet hikheresik meiso pogoroba nen pelabi wagarek. E sanokhogo afe halekwe a'nogoat lagaresik, sanokhogo lagarek oba aremnogoat hulamberek logolik welagarek.

⁴ Hiren o obabut palhu mondok logogun halok he, sumburu inom, yi mene ti mene inom, awi ekhe yasugun elo'lek. Hobuk ebe tatik, palhik, ugun mondok elo'legaro.

⁵ Hiren sogoi ninggi'nogo wagarek hinonggorat, nen, hemi inalabutmo nen omalik inalue agaikharek andi hinonggorat andi hak, Allah nen yi mene ti mene hilingiterek andi hinonggoraro.

⁶ Yi mene ti mene awi hubet yasugun mene fano asigin he a? Hu'mokokwe yasugun mene fano asigin he a? Emberegat fano nek asigin he a. Hinonggot andi nen he, hubet yati la'luk hu'mokokwe set warigi'legat yati logoino o,” iluk isikhe.

⁷ Mo asinandi kwelabi waga logolik fanot fugunem afuni nen kwelakhaluk he inagaiyek agarek.

⁸ Hat hebe umur ekhe inom to'mot hobagagu halok he hai wati logoino. Andiba re hat hebe o kweangma yoma aninurogo logogin mene andi re horok harek hak oba nen, wa'la'luk lagaikharek oba andoma laluk logogin andi nek he mondok aninurogo logogin. Arigini'mo re andoma faget hendawimo eberek logou hak nogo? Mondogat andoma re we alomarogo werek.

Ap souge inom helime tugum inom faget komorinaferek wene

⁹ Hat ap alage souge yi re, hebe souge logolik andem he hendawimo anggagain mene hilingirikhi logoino! Hebe elama sougerek logolik andem he hagaiyek hokhorogo hugu nogo. Hat hendawimo nen wenggelhu mene andoma re tiphogo nek hilingiti logoino, nen hendawimo hilingisigin iluk anggagain mene andoma higithogo nek hilingirikhi logoino. Oba nen he helurogo! Haren hilingiti logogin mene andoma mondogat he, At Allah nen hobuk wene inoba figik kotik igin oba andoma wokharek lambik katokhogo ayo wut habigin oba werego.

¹⁰ Hat hebe souge logolik welagen oba andem he we eil misigat logombik legasigin, enggere hendawi fiti lagen mene andi inom, hoba enggin hikhi lagen mene andoma inom mugusogo wulak fisikhi logoino o, namlogo.