PENGKHOTBAH 10 - Allah Wene Fano Wene Hupla Inane

¹ Sobon misik waregen minyak amben fano mene botol misik keralek weagerogo fikherek, andi higit he we endebat kemburogo hilingisugun mene aremnogoba nen hebelek mene lego logogin mene a'nogo sebel fogoin.

² Ap hebelek mene nen inendawi werekhogo hilingitu kwelek, ap morue mene nen kwanirek mene hilingitarek andi re hilingisu hak.

³ Ap andi ebe kembu iluk inelu agarek andi re at obabut hilingiterek oba weinam agarek. Afuni mondogat inoba re at ebe kemburek mene a'nogo weinamet fikherek.

⁴ Hat hoba ap ekhe omame logogin mene nen wenakhetu halok he, yabu hilingiti logogin mene herak fisagain iluk yagasu fuk. Hat weak hilingiten mene hokhorogo werek kwelek oba nen, hafe morogo sebel haluk logogin halok he aren sagalogo legetfisagain.

⁵ O kweangma yoma weak kwanirek mene ekhe were'ma hasigi: Ap inomame werek mene nen lalogo hilingitunem hasigi re yi'nogo

⁶ ap morue mene re ineabu lego mene wogisagarek, meneba nen ap kaindek inenggi werek inap omanogore ineabu sebelek mene wogisagarek

⁷ Ekhe an nen hasigi re amingmingengge mene omanogo wam kuda ba hu'la'luk lagu kwelek, ap inunggulenu kaindek meneba nen kweanggwe inamingmingengge nen lagaikharek hakhogo lagunem isigi.

⁸ Ap sa nen kweang habuligin halok, andoma at onggwarek ebeat ubuk igin. Ap sa nen leget fak waganek meneba tungesigin halok, ap andi kisu afuni palinaferek mene nen libiligin.

⁹ Ap sa nen yabu helep serelharek oba andoma hilingisigin halok he helep serelogo ebe wasigin. Nen ap sa nen e pelangesigin halok at ongwarek ebe wasu hak hilingisigin.

¹⁰ Henggarok enggat lek kwelek mati lagen lek halok, haren yabu hilingisigiluk he honggwarek homameba fukfakhogo hilingisigin. Oan hilingiti'lek logolik attak-attak he hilingisugun mene fanorogo wenggelogo feino.

¹¹ Kisu haraneba oan eil warek le'ma, attak-attak senggelinafe halok, ap kisu haraneba eil watu mene andi re we alomarogo logou hak.

¹² Ap hebelek mene ane ugunem he legeisogo fagarek, oba nen ap morue mene re onggwarek ane ambisangma eiloak lek agarek.

¹³ At a'nogo ane ikhi logolik he, attak-attak hesangge mene tak eroraterek, andi nen ambisangma re ap lugulugwi paligen agarek hangge ikherek.

¹⁴ Eberogo, ap morue mene nen he ane hokhorogo ili'logo, hobuk logogun oba re nit mondogat faget eil hinago werek. Nit ninebe legasimbik hilingisugun mene faget ap misigen ekhe yi'nogo hilinglasigin iluk u mo re elo'lek.

¹⁵ We ap kembu mene halok enek he onggwarek aiba lagukwe onggot welagarek, ap andire set waligi'lek yabu omamerogo hilingitu welagarek.

¹⁶ O kweang ekheba raja ap souge ket mene werek halok, nen ap kaindek at agoromi re hup hundik seni isago lagu kwelek wuni watu werek halok he alomat lasugun werek.

¹⁷ O kweang ekhe ap raja omame hokho mene logolik werek aiba halok, nen it ap kaindek ogo nunggu mene mo higiroba nunggu werek halok, nen lugulugwi palhi'lek ogalfakhugu halok he o kweang andiba inendawinggen hambukhogo welagaikharek.

¹⁸ O engga fanorogo salfakhugu lek halok he helhelin weinam agaresik, andi ambisangma re o a'nogo fili agarek.

¹⁹ Seni isago werek halok he inagaiyegen endo agik, anggur agai werek halok he inendawimo hai agik agarek, oba nen andoma mondogat he a uang lombok werek.

²⁰ Hat hendawimo nen ogore raja abok palu fuk, nen hat honggwarek haiba nogokhi lagen oba nen ogore ap hokhondek mene inoba wenagisa fugat. A'nogo hilingisigin halok he sue misik ekhe nen holimbik, it ap haren inabok paligin mene omanogo inoba yagaisa lanogo.