PENGKHOTBAH 1 - Allah Wene Fano Wene Hupla Inane

¹ Ap Daud amlogo wene endawi mondok wenggelek mene a'nogo nen eisena obali'mo raja o Yerusalem menlagaikhesik wene ikhi lagaikhe mene palogo fesukwa mene re buku yiba palek werek.

² Hun wene wenggelfuluk ikherek mene andi nen yi'nogo isikhe: Mondogat omare we elalinat, alomarogo werek! Ineluk welagaikharek andi re ero le'ma we alomarogo werek isikhe.

³ Nit nineluk uanhogo logolik yabu likhak warogo hilingiti lagoba nen he ebe nit hilingiti lago mene a'nogo ambisangma enggen ki mene i'lagarek nogo?

⁴ Inagainafuri attak tagomangge mene nen taginafu mene wa'lagu kwelek, hobuk tagomangge mene nen taginafu mene weinam asi wagik, hilingirik wagu kwelek meneat he kweang he munen agi'lek etok mondok werek.

⁵ Mo yegekhogo lagai wagik, ubukhogo pi lagik ikheresik, aloget figi'legat obalik werek oba omanogo kwi lagaresik, hobuk ambotkwe yegelogo lagai wagaregat.

⁶ Sogoi funhogo selatan fikhit lagaresigen, andoma kwe nen yunggulogo utara fikhit wasi lagarek, andi nen hobuk kwani-kwani re eroma yinogo kwi wagarek.

⁷ I elesi wiliferesik lagarek mene re laut oba nek kwelabi lagarek, oba nen i laut oba andoma re hopo ikherek mondok lek. I a'nogo sugulogo elesimo lagaresik hobuk wilibisogo lagarek.

⁸ Mondogat a'nogo hilingiterek mene andoma re inaberali agarek meneat he, afuni nen tindelogo u mene inom he higitsek lek. Nineilenggen kwalogo welagorek oba nen ninoba homotfikherek lek, ninesanggo hologo welagorek oba nen homotninobagaikherek legat.

⁹ Attak welagaikhe mene omanogo re yogondak weregat, nen attak hilingiti lagaukwa mene omanogo re yogondak hilingiri'lagwiat. o kweangma yoma ket mene re ekhe werek lek.

¹⁰ Ap ekhe nen ikhi logolik,” Yethani, yi re ket mene hilingiri'lago!” iluk agarek oba nen, andi re nit oan ta'lagi'lek werek kwelek andoma hilinglagaikhe meneat.

¹¹ Afuni nen attak hilinglaga lagaikhe mene andomaba ebeti logogun lek. Andi hakhogo re yi wene ti wene yogondak ari'lago mene inom, hobuk asigin mene inom, andoma it ap hobuk logogun mene nen he ebeti logogun legat.

Endawimo mondok kagalek mene a'nogo nen wene hilinglagunem hikhi lagaikhe mene faget isikhe wene

¹² An nebere nendawinggen mondok kagalek mene logolik o Yerusalem oba andoma afuni Israel mene faget inoe raja mendek logolik melalinafi lagagi.

¹³ A'nogo logolik an nen nendawinggen wenggelek meneba futfuluk o kweangma yoma hilinglagarek mene mondogat ero pilingisogo fanorogo yangguligin anggasigi. Allah nen nit hobuk hilinglasugun mene faget fougeratikhe mene andoma re inendawimo mondok weak asu hak mene nek hilingik.

¹⁴ Afuni o kweangma yoma nen hilingiri'lagwi mene andoma mondogat he an nen isigirek enek. Oba nen he yethani, mondogat a'nogo hilingiri'lagwi mene andoma re we alomarogo sogoi murok lagaikharek hak hilingiri'lagwi.

¹⁵ Ebe lek kwelek wenasu lek hak, nen kwanirek mene moret foumo re elo'lek.

¹⁶ An nen anggikhi logolik,” An enek he esin hangge, nendawinggen kagalek nagun welagi, nen an nelu welagi mene andoma mondogat he ap raja an oan menlagi'le'ma o Yerusalem oba menlagaukwasik ferinarek welagaukwa mene andoma mondok sebelek kwelek an enek he esin nagun welagi,” anggigirek. An he yi wene ti wene inelu agaikharek mene andi mondogat andogorigi anggigirek.

¹⁷ Andiba re an nen anggikhi logolik afuni hebelagaikharek andi inom, kembu agaikharek andi inom, nen inendawinggen wenggelek welagaikharek andi inom, sogourek welagaikharek andi inom agaumsek oba nen hilingik mene andoma nelu asuageluk herasigin anggasigi. Oba nen hobuk eberik-eberigen he an yire sogoi murok lagaikharek hak hilingiti lagi higi, iluk futfesigi.

¹⁸ Andi re nit ninendawinggen ekhe inom hebelek mene hilingninobagagunem he ninendawi fit lagu mene ogo ekhe inomat fit lagarek. Nen ninelu agu mene hokhorogo agarek oba nen he, enggin-fenggin hokhorogo ninoba agaregat andi.