OBAJA 1 - Allah Wene Fano Wene Hupla Inane

Tuhan nen afuni Edom mene unggum inoba fagain iluk isikhe wene

¹ Tuhan Lego Mondok welagarek mene a'nogo nen he, ”Hit afuni hinunggulenu Edom mene faget he yi'nogo yagaisano ikhe,” iluk at Obaja nen yi'nogo ti'nogo hilinglasigin iluk yagaisikhi lagaikhe mene re yi'nogo: At Tuhan nen he yonggongge yi afuni ti afuni inunggulenu lombok inoba lakfisilik lagama wene iren waluk yaganisa wagaikha mene re yi'nogo yaganisaga: Nit he o Edom pin talogo inoasi kugun nen he, louwogen fik-fouge'ni o,” iluk aga mene yaganisa wagaikha.

² Nen, it Edom mene inoba Tuhan nen yagaisikhi logolik, ”Hat he An nen homame lek hilingisogo hobagaumo re afuni inunggulenu mondogaren sebelogo pelakhobagakhi logogun o.

³ Hat he hendawimo wonoget fakhikhi lagen andiba re honggwarek lalfakhikhi lagen. Nen hat hawi ibu kota re helep unggul omame meneba wurik welagi, nen hawi hebe welagen oba re tom unggul uan meneba wurik welagi, iluk anggikhi lagen andiba re hat hendawimo nen he, ”Ap sa hagen an pelaknobagau hak nogo? Iluk foget fakhikhi lagen.

⁴ A'nogo anggikhi lagen oba nen he, hat haiba sue fogonoe awi mondok pulema wuterek andi hak inom, nen pogoroba hesagalenggen werek oba walek po'lima inom, wusigin meneba nen ogore, An nen hat pelakhabi wesigin aro.

⁵ Ap inenggi abisak wanharek mene nen ogo, nen hugul helagarek mene nen ogore o hubanggo we'luk he we it inendawimo anggagarek mene aremnogo nek helagarek. Nen, it afuni yabumo nen anggur enggen taganhi logolik ogore fenakwe ekhe herakfisagaregat. Oba nen he, hat he it haselei mene nen mondogat lek hilingisogo hobagagun o.

⁶ Yago hit afuni Esau ambisangma mene yoma sani, afuni nen he hit hinebe welagep oba andoma foli wesimbik he, hinangge mondok hinagoma fakhikhi lagep mene andoma ogore mondogat helogoin enego.

⁷ Hat he it hinom sebe'luk hilingiti lagep mene omanogo nen lalhealuk he o hat hebe welagen oba andoma nen mugusogo wulak hobagagun. Hat he it hinom hundik welagep mene omanogo nen mabenet hobagagik, nen it hinom sumburu misi'mo ninggi lagep mene omanogo nen alomat hobagagik, imbik he iren hat hebe faget afuni inoba heinok woginafi logolik, ”Attak he at mondok elu-pelurek welaga agun a'nogo re yogondak he elu mene a'nogo koma lagama?” iluk yagaheti logogun.

⁸ Nen linggene An nen o Edom inap mondogat felelenghogo legetfisagain sambul andi re, afuni inendawinggen wenggelek meneba hilingitarek mene inom, it inobabut hebelek oba hilingitarek mene omanogo inom An nen mondogat leget fisamo re inobalik ekhe logogin lek.

⁹ It ap o Teman oba andoma mene sikhe inenggi puk mene ogore inailo nek asugun, nen it o Edom oba andoma sikhe fisogo inap he mondogat wathigik logoin,” ikhe o iluk yagaisasikhe.

Allah nen Edom wene oba welagaikhemo unggum wogotikhe wene

¹⁰ Allah nen ikhi logolik, ”Haren he it herugwi hagaila'lak Yakub ambisangma mene omanogo hanini inoba fesiginmo re, afuni nen inenggi mondok hokhorogo logogun andomaba re wiik weakhogo hilinghobagagu mondok logolik, hat hebe heiloak legaphogo hobagakhi logogun o.

¹¹ Afuni selei mene nen o Yerusalem kwe houwak isaluk kwikhi logolik, o kota andi sebelogo fugu sambul he, hat hebe yatma mendek logolik heil fuluk welagagin. Nen, iren o Yerusalem oba andoma yi mene ti mene mondogat hogouk eraluk laga logolik it-it omanogo sumbut-sambathogo helugu kwelek he hane igi'lek welagagin andi. Hat he it selei mene andoma hinom he tagansek lek, hinom higit welagen.

¹² It afuni Yehuda meneba wene weak mene andi inoba asi wagu kwelek inom, nen it hagaila'lak andi inebe alomat larik wagunem inom haren hagaiyek hikhi lagen mene andi re a'nogo hilingisu lek mene hilingiti lagen o. Nen, it inebe mondok enggin-fenggin hugu kwelek oba nen hat hane nen weregabet hikhi lagen mene andi re, hilingisu lek meneat hilingiti lagen.

¹³ It An nagainafuri ou-pou hugu werek kwelek inom, nen linggene mondok weak mene andiba inangge telugu kwelek inom andem he hat hebe o kota ba kwi lageluk hane ami'mit sup-sap ikhi logolik, it inangge hugulengge helikhi lagen mene andi re hilingisu lek mene hilingiti lagen o!

¹⁴ Nen, hat hebe kwe esanggoma mendek logolik, it ap selei mene omanogo inailo nen weim heise logoin iluk lagaikharek mene omanogo inanggwe palinafik, nen it inoba enggin-fenggin hikhi logolik werek mene omanogo haren senfisaluk it selei mene inenggiba fisigik, ikhi lagen mene andi re, hilingisu lek meneat hilingiti lagen o” ikhe iluk yagatikhe.

Allah nen yi afuni ti afuni inunggulenu lombok inawene paligin wene

¹⁵ A'nogo isikhesik ekhe inom ikhi logolik he, ”An Tuhan nen afuni inunggulenu lombok inawene pilingisogo ayo wurinabigin sambul a'nogo re, ibi-eberogo nenat horogasi waga o. Nen, at Edom en hilingiti laga mene andoma re aren hilingiti laga onggo at oba ogo a'nogoat hilinglasigin. Aren afuni amu mene inoba hilinginafunem hikhi lagaikha andem hakhogo re arogo a'nogoat hagain aro.

¹⁶ An nandom horek mene unggul oba andoma re An nagainafuri nen i unggum inoba fagain mene ilirenggerogo hilingik mene nengga. Oba nen he i it afuni inunggulenu lombok o yi awi ti awi welagaikharek mene faget he mondok arik weak mene nogoin o. Ma re unggum inoba wesigin mene andi re iren inoba ekhe ogalasugun mondok lek. We it inebe mondogaren i enduk arikweak mene andi lik-lekhogo nambik he, it inebe inobalik legengge koma lagaikhaheat legasugun.

It afuni Israel mene inomame asugun isikhe wene

¹⁷ Allah nen ekhe inom ikhi logolik, ”A'nogo hilinglasugun oba nen he tom Sion oba andoma nen it fenakwe nek he inagap telinabigin o, nen tom andiba re An nonggwarek nandom hilinglasigin. Andi nen he it Yakub en tagongge mene omanogo re inanggweang inonggwaregen mene omanogo hobuk ambotkwe helogoin aro.

¹⁸ An nagainafuri Israel mene re endu higit asimbik, yabukwe engga lei ninggerek andi hak it Esau ambisangma mene omanogo re mondogat endu nogoin. A'nogo hilinglasumo re Esau ambisangma mene andoma misik iluk ogo ekhe linet lasugun mondok lego,” iluk An Tuhan nen nane mondogat igi!

¹⁹ Nen it afuni o Yehuda abel selatan fikhit werek mene andoma re o Edom oba andoma sebeli kwimbik logogun. Nen, it afuni tom-tomkwe mo ubuk ikherek fikhit logogun mene nen he it afuni wilayah Filistin meneba andoma inomame legetfisambik sebelogoin. Nen, it inunggulenu Benyamin mene nen he o Gilead sebeli kwimbik logogun. Nen, it An nagainafuri Israel mene nen he o Efraim mondogat oba inom Samariaba inom sebelambik logogun.

²⁰ It afuni Israel inap abel ambolkwe utara fikhit werek mene omanogo re inebe hele warogo lakfisasukwaba omanogo nen wesimbik o Fenisiaba nen he o Zarfat huli andoma logogun. Nen it afuni Yerusalem mene o Sardis hele warogo fisa lagaukwa mene omanogo re inambotkwe wesimbik o Yehudaba nen abel a'ma selatan fikhit inawi kota andoma sebelambik logogun.

²¹ It afuni o Yerusalem oba inomame asimbik logogun mene nen he o Edom pin talogo inoasi kwimbik o andoma sebelugun. Andi nen he, An Tuhan nebe re it faget raja mendek logolik melalinafi logogin o,” iluk yagaisasikhe.