NEHEMIA 9 - Allah Wene Fano Wene Hupla Inane

Afuni Israel mene weak hilingitukwa mene fakhogo fesukwa wene

^1-2 A'nogo hilingitukwasik, afuni Israel mene nen afuni inunggulenu hunogoat mene inom welagaukwa mene omanogoba nen herakfisaluk inale'ma arik lagaukwa. A'nogo hilingitukwasik tugi andi mene tanggal 24 oba re afuni Israel mene inebe mondogat andogotukwasik iren he, ”Nit weak mondok hilingiti lagoma o,” iluk fageti logolik he sumburu ninggi'lek welagaukwa. A'nogo logolik afuni fena nen he, ”It inendawi warikhi logolik hilingita,” iluk enegenggerogo re inunggul oba wul yugulogo su pelagi su laberogo welagaukwa. A'nogo hilingitukwasik inebe menlagaukwasik he, it weak hilingitukwa mene omanogo inom, it inombalagen weak hilingitukwa mene omanogo inom mondogat fagetukwa.

³ A'nogo fagetukwasik, Allah nen komotninafikhe wene lisu palogo werek mene a'nogo enu salogo yagaisugu 3 jam hangge welagaukwasik, hobuk it inonggwarek inaweak hilingiti lagaukwa mene omanogo fageti logolik 3 jam hanggeat welagaukwa. A'nogo hilingitu logolik ineindep awi yagaisogo nineisena TUHAN Allah fogeratukwa.

⁴ A'nogo hilingitukwaba andem he ap Lewi mene faget e meja talek were'ma re, at Yesua inom, Bani inom, Kadmiel inom, Sebanya inom, Bunni inom, Serebya inom, Bani inom, Kenani inom, inebe lagasukwasik he inane hokhorogo samban nineisena TUHAN Allah ayonggo fesukwa.

⁵ Samban a'nogo isukwasik, o andi sambul he, ap Lewi mene, Yesua inom, Kadmiel inom, Bani inom, Hasabnea inom, Serebya inom, Hodia inom, Sebanya inom, Petahya inom, it andemen Allah againafuri nen Allah fogerasuagaluk mel isukwa: ”Ninebe menlasimbik he, nineisena TUHAN Allah fogerasuogo. Nineisena TUHAN fogeratu mondok werek mene a'nogo fogerasuok. It ekhe endebat hangge fogerinabugun mene re, At enek he, enu elalin mene yi awi ti awi mondogat lili'lago a'nogo enu seralhu mondok logouwogo,” iluk isukwa.

Weak hilingiti lagaukwa mene fakhogo fikhi logolik samban isukwa wene

⁶ A'nogo isukwama, it afuni Israel mene nen Allah ayonggo fikhi logolik mel isukwa: ”Nineisena hat hami-hamuat Henupogot welagendego, neisena. Haren hesagal pogoroba welagarek mene elalhik, tulem huli warek welagarek mene mondogat elalhik, isigin. A'nogo isigindik he, i laut yenggelek ebe elalogo fesigindik elema welagarek mene mondogat elalhik, kweang ebe elalhigindik, oba welagarek mene mondogat elalhik, isigin. A'nogo elalogo fesigindik, eluk logouwagaluk hilingisogo figik, fisogo welagik, egendek andi, neisena. A'nogo elalogo fesiginmo, inomame hokhorogo pogoroba welagaikharek mene mondogaren inot soma iluk ineindep awi yagaisogo fogethafarek mene o, neisena.

⁷ Nineisena hat hami hamuat Henupogot welagendek o, neisena. Haren Abram ebe afuni inunggulenu at mene inanggele'ma nen wenagaisogo fesigin andi, neisena. A'nogo wenagaisogo fesigindik, at ebe o Babel aiba o Ur andoma nen waluk wulibi wagagin andi, neisena. A'nogo waluk wulibi wagagindik, at enu ket mene Abraham salogo fesigin andi.

⁸ A'nogo salogo fesiginmo, at ebe hat hoba lombokhogo logolik, hane hologo mondok hilingitunem hasigin andi. A'nogo hasigindik, haren at wene eberogoat mene wareti logolik he, o afuni Kanaan mene inaiba inom, Het mene inaiba inom, Amori mene inaiba inom, Feris mene inaiba inom, Yebus mene inaiba inom, Girgasi mene inaiba inom, mondogat andi, haren tagomangge mene inebe mondogat eise asimbik logouwagaluk wokhesigin o, iluk wene waretigin andi. Hat hebe inoba lombokhogo logolik, higithogo nek hilingitendek andi nen he, hat wokhesigin, iluk wene waretigin mene andi, ebe mondogat arat wogotigin andi, neisena.

⁹ Haren nit ninombalak, afuni Mesir mene nen yi enggin ti enggin inoba fugunem inom, i laut Teberau yenggele'ma nen inoasuogoluk ugunem yagahetunem inom, inane hesanggo holhi lagagin andi.

¹⁰ Inane a'nogo hesanggo holhi lagagindik, hat hagainafuri yi enggin ti enggin hilinginafi lagaukwa mene andi helu andi nen he, afuni Mesir mene inoe raja ebe inom, agoromi inom, afuni aren ferinarek welagaikhe mene inom, elalinat weagarinafi lagagin andi. A'nogo hilinginafigin andi nen, henu o yi awi ti awi lagu mondok huli yogondak huli nen laguat werek andi.

¹¹ Hat hagainafuri inebe wulibi wesuageluk he i laut yenggelek a'nogo healogo kwe yagisasigin andi. Yagisasigindik, i mondok firokse'ma ial pililirekwe nen inebene i kulelagi'legat woginarek wulibi wagagin andi. A'nogo woginarek wulibi wagagindik, ap Mesir mene nen it inoasuogoluk muginarek wagaukwa mene andi inebe helep ima pikherek andi hak, i laut yenggele'ma ma'lima mondok sebelogo pelakfisasigin andi.

¹² Hat hebe o linggene re, ohena anggele'ma mendek logolik woginarek wagagin andi. Nen, hubanggo re, endu amulok anggele'ma menla'luk kwe logoin kwe liarogo yat yarethilik woginarek wagagin andi.

¹³ Hat hebe pogoroba nen tom Sinai ba pi wagagindik, hat honggwarek hagainafuri hane yagaisasigin andi. Yagaisikhi logolik, yi'nogo hilingiti logoino, ti'nogo hilingiti logoino, iluk higithogo komorinafik, hane eberogo mene yagaisigik, isigin mene andi re, oba tipsek logolik hilingiti logogun mene isigin andi.

¹⁴ A'nogo yagaisikhi logolik, o inenggi 6 en wela'luk ekhe 7 andiba hat honggwarek faget weat logouwagaluk hamingmingengge Musa yagatiginmo, aren yagaisasikhe andi.

¹⁵ Nen, it inamburu endebatma, nele were'ma, haren inamburu pogoroba nen pelagisa waga lagagin andi. Nen, it i mondok nele were'ma, haren, helep mondok haro mondok mene elema nen i elesi wulibisogo wogisasigin andi. Nen, haren he, An nen o andoma hit eise asubagaigen wokhisagain o, iluk honggwarek henu hombuk palogo yagaisasigin oba, yoma kwi wesuagaluk yagaisasigin andi.

¹⁶ A'nogo meneat he, nit ninombalak andi, inendawinggen mondok helep hangge logolik, inonggwaregen fogerakhikhi logolik, haren, yi'nogo hilingi'no, ti'nogo hilingi'no, iluk komorinafigin wene andi hologo hilingiti'lek herakfisasukwa andi.

¹⁷ Haren yi mene ti mene faget mondogat fano hilinginafi lagagin mene andi inom, elalin mene hokhoat hilingiti lagagin mene andi mondogat inom, hologo hilingisu inabiren he, inendawimo eberek welagi'lek inonggoret fisasukwa andi. A'nogo inonggoret fisasukwasik, inonggwaregen fogerakhikhi logolik, it inoe ap ekhe nen it woginarek o Mesir inambotkwe lagaukwasik afuni Mesir mene inamingmingengge logouwageluk fisa loageluk, wenagaisogo fesukwa andi. A'nogo meneat he, afuni weak hilingitunem hat Allah nen sagalogo legetfisigik, inebe hendawirinafik, ha'mage horogat het-perigi'lek herakfisigik, egendek andi. Inebe hendawinggen hundik mondok logolik, it inebe kofologo herakfisigi'lek farinarek mondok welagagin andi.

¹⁸ Iren he, tugwi kembu sapi mene alik hilingitukwasik mel isukwa andi: Nineisena Allah afuni Mesir mene nen inamingmingengge higit fetninarek were'ma wo'ninarek waga a'nogo ebe yi aro iluk isukwa andi, Allah nineisena, hat hebeat inendawimo seramet hobagasukwa andi.

¹⁹ A'nogo meneat he, haren it inoba hendawinggen hundigen, o leimo afuni le'ma andoma nen it herakfisigi'lek ferinarek mondok welagagin andi. Ohena e higit mendek andiba linggene ebekhalem woginarek wagik, nen, endu mendek andiba hubanggo inanggwe wesugun kwe omba'bak liarogo yararathilik woginarek wagik, kamo igi'lek mondok waga lagagin andi.

²⁰ Hat Hareagun fano meneba it komorinafi lagagin andi. Haren it inamburu manna mene kamo igi'lek wogisugunem ninggik, inagai nele were'ma wogisugunem elokhogo ninggik, ikhi lagaukwa andi.

²¹ Haren it o leimo afuni le'ma andoma, 40 tahun ferinarek logolik, yi mene ti mene it lek mene elokhogoat wogisikhi lagagin. It inasu tilibikhi lagaikhe mondok lek andi. It ineisok ou agik, fitik, ikhi lagaikhe mondok legat andi, neisena.

²² It afuni inunggulenu hunogo mene, nit ninombalak inawi wogisasigin oba yoma huliba welagaukwa mene mondogat mabenet fisaluk, inomame asuageluk hiliniginafigin andi. Andi re, o Hesybon ap raja Sihon nen ferinarek welagaikheba mene sebeli kwi wagik, o Basan ap raja Og en ferinarek welagaikheba mikha kwi wagik, isukwa andi.

²³ Haren iren tagomangge nit nineisenalak mondok hokhorogo, hesagal pogoroba welagarek andi hangge hilinginafigin andi. Haren he, ninombawi yagaisikhi logolik, o andoma hit wokhisagain o, iluk wene warisasigin mene andi, ebe o yoma logouwagaluk arat wogisasigin andi.

²⁴ Iren tagomangge mene nen afuni o Kanaan yoma mene mabenet fisaluk, inebe hat hagainafuri inawe a'ma logouwageluk hilinginafigin andi. Hat hagainafuri nen afuni Kanaan mene inunggulenu lombok inogogwi raja inom mondogat a'nogo hilinginabuagaluk homame wogisasigin andi.

²⁵ Hagainafuri homame a'nogo wogisasigin andiba re, it Kanaan mene kwi wesinogo iluk leget pa'leget omamerogo waganek mene inom, inanggweang muli fano yi mene ti mene ebe hokhorogo werek oba inom, inaiba inangge yi mene ti mene sik-pikhogo werek oba inom, inagai mogo habulik mene inom, i elesi agai mene inom, yabu anggur yabu inom, e zaitun yabu inom, e ekhe enggen iterek mene yabu inom, mondogat sebelasukwa andi. A'nogo sebelasukwasik, yi mene ti mene andi enggen ninggi logolik, inebe inobakhe firik welagaukwa andi, neisena. Haren yi mene ti mene wogisasiginmo oba heilarogo welagaukwa andi.

²⁶ A'nogo meneat he, it Hagainafuri nen, At awe a'ma logolik ane hologo hilingiti logogun ninabit, iluk herakhobagasukwasik, ap hat hane yagaisikhi logolik, hinafe hebela'luk hineisena Allah awe a'ma kwi we'no, iluk yagaisikhi lagaukwa inap omanogo inebe inoati lagaukwa andi. A'nogo inoatu logolik, hat hebe inendawimo seramet hobagagu mondok welagaukwa andi, neisena.

²⁷ A'nogo hilingiti lagaukwa andi nen, haren he, inebe it inaselei mene inomame a'ma ferinarek logolik, yi enggin ti enggin inoba fugu mondok logouwagaluk inenggiba fisikhi lagagin. A'nogo fisugunem, yi enggin ti enggin hokhorogo hugu mondok logolik, haren telinabuagaluk inane hokhorogo hayonggo fikhi lagaukwa. A'nogo fugunem hat hebe pogoroba nen hendawirinabluk he, inane hesanggo holfuluk hobugalep telinafi lagagin andi, neisena. Inane a'nogo ugunem hesanggo holfuluk, it inaselei mene nen ferinarek were'ma telinabuageluk inogogwi kaindek inayonggo fuluk inoba lakfisa waga lagagin.

²⁸ A'nogo lakfisa wagunem, iren telinafunem fano lioksek logolik meneat he, hobuk weak-weagat inambotkwe weak hilingiti lagaukwaat. A'nogo hilingitu were'ma, haren he, it inaselei mene nen yi enggin ti enggin hilinginafi lagaukwa mene andi inenggiba fisikhi lagagin. A'nogo meneat he, iren he, nit weak hilingito o, iluk inobabut hebela'luk, telninabin o, iluk inane hokhorogo hayonggo fesukwa andi. A'nogo hayonggo fugunem, hat it hendawi mondok andi nen, hebe pogoroba nen inane hesanggo holherendik he, telinafu mondok welagagin andi.

²⁹ A'nogo telinafi logolik, wene haren komotninafigin wene andi hologo hilingiti logouwageluk, inenggali warogo komorinafi lagagin andi. A'nogo meneat he, inonggwaregen fogerakhikhi logolik, wene komotninafigin wene andi herakfisikhi lagaukwa. It afuni ekhe nen wene komotninafigin wene andi hologo hilingitunem haren fano inelugerinafendek meneat he, iren a'nogo herakfisikhi lagaukwa. It inungguloak mondok helep hangge logolik, inendawimo nen seramet fuluk, inesanggo furogo holhi'lek, higithogo hilingiti'lek, hilingiti lagaukwa andi.

³⁰ It a'nogo weak hilingitu kwelegat, Haren he, yi tahun ti tahun wene inoba figi'lek hafe morogo logolik, komorinafi lagaginat. Hareagun ap hat hane yagaisikhi lagaukwa mene inendawimo logolik, wene andi inendawimo kagalogo yagaisugunem, iren holu inabiren inesanggo te'met fikhi lagaukwa. A'nogo hilingiti lagaukwama it inebe afuni o yi awi ti awi inunggulenu hunogoat mene inenggiba fisikhi lagagin andi.

³¹ A'nogo meneat he, hat hobabut he, nit afuni hokhorogo hendawit ninafendek andi nen, it inebe herakfisaluk wulil tagalogo legetfisigi'lek welagagin andi. A'nogo hilingitendek andi re, hat Allah hamu aro. Hat hobabut fano nen mondok hendawitninafendek andi.

³² Hat Allah homame mondok hokho, elalin inailo mene hilingitendek mene, neisena. Hebe ninoba lombokhogo logolik, yi'nogo hilinghinabigin, iluk wene Watnisasigin mene andi sagalasinogo, iluk higithogo hilingninafendek andi, neisena. Afuni Asyur mene inogogwi raja nen nit ninoba yi enggin ti enggin hilingninafi lagaukwa andi huli nen yogondak huli re, yi enggin ti enggin mondok weak hugu welago, neisena. Andi nen he, nit ninogogwi raja inom, ap imam inom, hane yaganisagarek mene inom, ninogogwi kaindek inom, ninombalak inom, afuni mondogat inom, yi enggin ti enggin andi mondogat hugu welagorek, neisena. Ma re, nit yi enggin ti enggin hogorek mene andi mondogat ninoba hendawimo nen honggoragi'lek eberek mondok logoino o, neisena.

³³ Niren weak mondok hilingitu kwelek meneat he, hat hebe ninoba lombokhogo mondok logolik, nit weak hilingitorek mene faget higithogoat wene ninoba figik, kotik, egendek andi.

³⁴ Nit ninombalagen inom, ninogogwi raja nen inom, hat eisewerek mene nen inom, ninogogwi kaindegen inom, en he, haren wene komotninafigin mene andi inendawimo seramet fuluk, hologo hilingiti'lek herakfisasukwa andi. Haren he, yi'nogo hilingiti logoino, ti'nogo hilingiti logoino, iluk komotninafigin mene andi mondogat inom, inenggali watigin mene inom, inesanggo hologo hilingisu inabiren hilingitukwa andi.

³⁵ Haren hagainafuri o kweang muli fano esanggo mondok hokhoat tuale'ma wogisigik, inogogwi raja ferinarek logouwagaluk menfisigik, isigindik fanorinafi lagagin meneat he, hat hamingmingengge hilingla'luk, hat faget hilingiti'lek inobabut weak mondok hilingiti lagaukwa mene, inobabut hebelagi'lek weak hilingitu mondok welagaukwa andi.

³⁶ Mene re, yethan! Yogondak, nit ninanggweang muli fano ninombalak wogisasigin mene andi, nit eise asimbik yi mene ti mene yagaisogo helikhi logogun mene, afuni ekhe inamingmingengge hilingla'luk welago andi, neisena.

³⁷ Nit weak hilingiti lago mene andi faget wene ninoba fou hak it ap ekhe mene inogogwi raja fetninarek logouwagaluk menfisugunem fetninarek were'ma, yi mene ti mene yago mene ebe tatik, palhik, ugunem, it inane ninghogo, nit ninobaget ninobagakhi logoino, iluk ugunem fisikhi lago. Iren fetninarek logolik he, ninebe inom, ninanggo inom, yigit feni, tigit feni, iluk inonggwarek inendawimo nen anggaluk hilingninabi'lagwi andi. Andi nen he, nit yogondak weak mondok logolik, yi enggin ti enggin hikhi lago, neisena,” iluk ayonggo fesukwa.

Afuni Israel mene nen, ”Yi'nogo hilingiti logogun,” iluk isukwa mene faget inenggi amusu fesukwa wene

³⁸ Allah ayonggo a'nogo fesukwasik he, iren mel isukwa: ”Nit afuni Israel mene nen, yi'nogo hilingiti logouwok, iluk lisu palogo fogosik he, ninogogwi fetninarek werek mene inom, ap Lewi mene inom, Allah eisewerek mene ekhe inom, en inenggi amusu fouwageluk yagaisogoma inenggi amusu mondogat faga andi,” iluk isukwa.