NEHEMIA 5 - Allah Wene Fano Wene Hupla Inane

Nehemia nen he ap inenggi lek mene leberisasikhe wene

¹ A'nogo logolik yabu hilingiti lagagusigen ninenggi ekheba re afuni Yahudi mene inebe hokhorogo ap inom hemi inomen he afuni it inunggulenu mene faget inendawi firik aple ikhi lagaukwa.

² Iren ikhi logolik he, ”An he nagainafuri hokhore'ma re nineluk logolik nunggu mene faget gandum enek he, namolo,” igik.

³ Nen, it ekhe nen ikhi logolik he, ”An he sumburu ouwagen nit ninebe wa'lago hanogo iluk he yabukwe inom, anggur agayo inom, ninawi inom, ap inoba onggo palogo uang gandum hunitu mene faget iluk fougerati, igik.

⁴ Nen, it ekhe nen ikhi logolik he, ”Nit he at raja nen nineabu inom, ninagayo anggur yabu inom faget kweang onggo pajak yi'nogo fikhi logogun iluk ninoba fikhe mene omanogo fugu mene iluk ap inoba niren hobuk obali'mo wogisogoin nen iluk kino ogo igik, ikhi lagaukwa.

⁵ A'nogo ugu logolik he iren he, ”Nit he Yahudi ninap he le'nogo a? Yahudi ninap aro. Nen, ninagainafuri re it afuni Yahudi fena andoma inagainafuri hak he lek nogo? It ogo it inagainafuri andi higit aro. Oba nen he niren nit ninagainafuri andoma afuni inamingmingengge asuageluk obogerisikhi lago andi. Andem enek fuk, nit nina'logomi oba nen ogore ap inamingmingengge asuageluk herakfisogoat. A'nogo hilingitosik anggolo nen nit nineabu inom, ninagayo anggur yabu inom he, afuni nen uang wo'nisoageluk yagaisasugusik amu mene ekhe hilingisu elo'legenau hilingito andi,” ikhi lagaukwa.

⁶ A'nogo ugunem nesanggo holhigisik an mondok na'mage lagasigisik he,

⁷ an nen ninggi'nogo hilingisiok iluk fanorogo ebethigi. A'nogo hilingitigisik he an nen it ap inogogwi kaindek omanogo inom, afuni melalinafi lagaukwa mene omanogo inom, inoba ikhi logolik he, ”Hiren he it hinagaila'lak mene hinomameba sebelinarek welagep!” iluk yagaisasigi. A'nogo yagaisigirik he an nen wene andi faget ninggi'nogo hilingisiok iluk he afuni inebe abirengge inom wene ninane misik seberogo masuogeluk kabogetugu.

⁸ Kabogetugusik an nen yagaisikhi logolik he, ”Afuni Yahudi mene inebe it ap inunggulenu pok meneba onggo palinafi lagaukwa mene omanogo niren ninomamerogo lologo wulaginabik lagagu. Oba nen he yogondak he hirogo Yahudi hinap oba nen, he hiren he it inebe onggo huninabuogeluk hinane mondok ninghogo yagaisikhi lagep!” iluk yagaisasigi. A'nogo yagaisasigimo re inogogwi melalinafi lagaukwa mene omanogo re inane endephogo iluk ekhe isukwa lek.

⁹ Andi nen he, an nen ekhe ikhi logolik he, ”Hit he Allahba hinendawinggen hinailo a'luk welagep oba re it afuni nit ninaselei mene ineisena TUHAN hak mene ogo ekhe werek lek mene andoma nen nit nonomame legetfugu aplere selek ekhe logou lek mene re hiren hilingiti lagep mene andiba re mondok weak mene hilingiti lagep andi.

¹⁰ Nen, nit he an nebe nen inom, nen it nagaila'lagen inom, it an ninom hundik mene nen inomen he ninagengga uang inom, gandum inom it afuni inoba iren obali'mo hobuk wo'nisobagaigen iluk wogisasugu. Oba nen he niren nekhengge ninonggwarek obali'mo wo'nisani iluk hobuk kino ikhi lago lek.

¹¹ Arigini'mo re hiren ogo it afuni inoba hinagengga uang halok ogo, gandum halok ogo, nen anggur halok ogo, at he zaitun, amusu halok ogo it inoba hinombalegengge werek mene andoma mondogat legaberik lani. It inanggweang inom, inagayo anggur yabu inom, inagayo zaitun yabu inom, inawi wurik inom, andoma hiren it inonggwarek inoba wogisano!” iluk yagaisasigi.

¹² A'nogo yagaisasigimo inogogwi melalinafu mene omanogo nen ikhi logolik he, ”Haren komotninafen mene yi re niren higithogo nek hilingisugun. Niren he nit ninawi onggo ekhe wo'nisani iluk kino igi'legengge mondogat it inoba wogisogoino,” iluk yaganetukwa. A'nogo isukwama an nen it imam inom, afuni melalinafi lagaukwa mene inom, omanogo wolinafigisik he it ap inane a'nogo hilingisugun iluk isukwa mene omanogo nen he it imam omanogo ineilhanem andoma nen, ”Niren ogo mene andi re ibi-eberogo nenat hilingisuogeluk ogo o,” iluk hombuk paluageluk yagaisasigi.

¹³ A'nogo yagaisasigisik an nen su mene nobakheba puksek welagagi mene a'nogo nonggologo wanhigisik yi'nogo isigi, ”Ap ekhe nen aneba wene wate mene tiphogo hilingitu lek mene andi re at Allah nen leget fagain. Nen leget fisambik he ap andi angge inom, awi inom, Allah nen mondogat wanumo re at ebe enggi lek mondok logogin!” iluk yagaisasigi. A'nogo yagaisasigimo re afuni wene kabogetunem kaboksek welagaukwa mene a'nogo nen he, ”Eberogo,” iluk u hak he, ”Amin” isukwasik TUHAN fogerati lagaukwa. Andiba re it afuni melalinafu mene a'nogo nen he wene watukwa higithogo re tiphogo nek hilingirik wagaukwa andi.

Nehemia endawi fano nen hilingitikhe wene

¹⁴ Nen, an nebe gubernur menlagagisik werek kwelek enek he 12 tahun hilingitigi. Andi re at raja Artahsasta ebe raja menlagaikhesik tahun 20 meneba werek kwelek menlagaikhesik he 32 tahun huli werek kwelek andem oba welagagi. Nen a'nogo welagagi huli andem he an nen inom, nen an nagaila'lagen inom he ap ineabu gubernur logolik onggo helagarek higithogo helikhi lagagi lek.

¹⁵ It ap gubernur an menlagi'lek were'ma, welagaukwa mene andoma nen he afuni holhu mene nen, linggene misik meneba at gubernur nunggu mene faget inom, nen anggur inom faget he uang perak mene 40 nen wo'nisani iluk kino yagaisugunem he afuni inoba enggin welagaikhe. Oba nen, an he neisena Allahba nailorogo logolik he, a'nogo hilingiti lagagi lek.

¹⁶ It an nagoromi mondogat he inebe seberogo leget andi wanhi lagagu oba nen he, An he leget pak leget esia'le uanhogo wilik lagagu mene andi faget ebet-ebet hilingiti logolik, yabu hilingiti lagi mene onggo iluk kweang endebengge iluk ogo ekhe helasigi lek.

¹⁷ A'nogoba nen he afuni Yahudi mene inebe 150 nen inom, ap inogogwi kaindek inom, an netokhogo sumburu isaginafi lagagi. Nen, andem he it ap inunggulenu amu mene nineralukwe nit ninambok higit waga lagaukwa mene andoma inom seberogo faget he lek.

¹⁸ Linggene hundik-handik he an nonggwarek mene nauang oba onggo paluk, sapi misik inom, domba sei werek mene falfaligen inom, sue ayam he hokhorogo inom isaginafi lagagi. Nen, andoma a'nogo hilingiti logoligen at he, linggene nomolo nen wela'luk, anggur agai lek asinogo iluk he hinagaisogo fikhi lagagiat. A'nogo hilingiti lagagiba nen he, it afuni nen hilingitu aple mondok enggin hokhore'ma re an nen nebe gubernur welagi mene faget onggo wo'neni, iluk kino ikhi lagagi mondok lek.

¹⁹ A'nogo hilingiti logolik he an nen samban ikhi logolik, ”Neisena Allah, an nen yi mene ti mene afuni inunggulenu ari faget hilinginafi lagi mene andi ebethaluk he, an noba fanoabet nobagakhi logoin o,” iluk kino yagati lagi.