NEHEMIA 4 - Allah Wene Fano Wene Hupla Inane

Ap Nehemia nen afuni Yahudi mene inaselei mene faget omamerogo hilingitikhe wene

¹ Afuni ekhe nen he, ”Afuni Yahudi mene omanogo o kota leget pa'leget a'nogo hobuk legeisogo wusuogeluk hilingiri'lagwi,” iluk isukwama ap Sanbalat esanggo holhikhesik he, a'mage hokhorogo lagasikhesik, ina'malolo kwelafi lagaikhe.

² Wene a'nogo esanggo holhikhesik he, ap at inom ineabu misigat mene inom, ap tentara Samaria mene inom, ineilhanem mel yagaisasikhe: ”It afuni Yahudi mene andi nen yabu andi katokhogo hilingisugun iluk a? elo'lek meneat hilingiri'lagwi andi isikhi lageba? O kota mesalhukwa mene andi, iren elok ambotkwe legeisogo wusugun nogo? It inendawimo nen he, niren wam, yi mene ti mene Allah faget warogo noleti logolik, leget andi ninenggi hup misik sambul obaat arat wusugun, iluk anggili'lagwi andi inenggali lega? O kota leget pa'leget wurik welagaikhe mene meisalogo potfisasukwama mondok weak agarikhe mene andi, iren helep hilingisogo leget pa'leget wusugun nogo? Mondok elo'lego,” iluk isikhe.

³ A'nogo isikhemo, at Tobia, Sanbalat era'lu logolik, mel isikhe: ”Iren leget pa'leget wuta mene a'nogo, mene olo mene enda'ma mene nen meisalu hak iriwaringge wuta andi yethani!” iluk isikheat.

⁴ A'nogo ina'malolo kagalhukwama, an nen samban Allah ayonggo yi'nogo yagatigi: ”Allah neisena. Iren inendawimo seramet finagasik nina'malolo kwelabi'lagwi mene andi, it inonggwarek ina'malolo kwelakhoageluk hilinginabin o neisena. A'nogo hilinginabumo, ap ekhe weim o pin talik waga logolik, it inangge yi mene ti mene mondogat telambik, inebe hele warogo woginarek afuni ekhe hunogo mene inaiba andoma fisa loakhogo yagaheti o, neisena.

⁵ Iren he, nit leget pa'leget wuti lago yi faget inendawimo seramet ninobagagasik nina'malolo kwelafa andi nen he, iren weak aga mene andi haren sagalogo leget fisambik, oba honggoret fugun o, neisena,” iluk ayonggo fesigi.

⁶ A'nogo yaganisugu kwelegat halolot fisaluk, nit leget pa'leget a'nogo wuti lagaguat. A'nogo wuti logolik, afuni nit mene mondogat ninomamerogoat wuti lagagu andi nen he, leget pa'leget andi mondogat weak-weagat wurogo obakheba fei lagasugu andi.

⁷ A'nogo wurogo fei lagasugumo, it afuni ekhe nen he, ”Afuni Israel mene omanogo re, o Yerusalem leget pa'leget a'nogo weak-weagat mondok wanhi logolik, folelek to'mosuogeluk fakfaga aro,” iluk ugunem at Sanbalat inom, Tobia inom, ap Amon mene inom, Asdod mene inom, Arab mene inom, inebe mondogat inesanggo holhukwasik he, ina'mage hokhorogo het-perisukwa.

⁸ Ina'mage a'nogo het-perisukwasik, it inebe mondogen he, weak asuageluk nit afuni Yerusalem mene ninoasuogeluk isukwa.

⁹ A'nogo isukwa andi nen, niren he, samban Allah ayonggo fikhi logolik, o kota Yerusalem hup hundik linggene hundik kagalek mondok welagagu.

¹⁰ A'nogo meneat he, afuni o Yehuda mene nen aleik wati logolik wuni kelem wuni mel isukwa: Leget meisalek mene mondok hokhorogo meneat he, ebe salmasu mene ninomame mondok lek aga o. O kota yi leget he, nit wusugun elo'lego, leget yi'nogo re, niren wanugun elo'lego,” iluk wuni watukwa.

¹¹ Nit leget a'nogo wanhu were'ma, ap nit ninom weak mene andi nen weim abok ikhi logolik, ”It inonggothogo leget wanhu were'ma, nit kagali lambik inanggelekwe menlarik lambik inebe inoasuogo. A'nogo inoatunem, leget andoba herakfisoago,” iluk weim abok isukwa.

¹² A'nogo isukwa meneat he, afuni Yahudi mene ekhe it ap nit ninom weak mene andoma inom horokhogo welagaukwa mene nen he, ”Iren weim abok a'nogo ili'lagwi,” iluk yaganisa wagu mondok welagaukwa.

¹³ A'nogo ikhi lagaukwa andi nen, an nen he, ap inebe mondogat karok inom, sikhe sige inom, sumburogo wogisasigi. A'nogo wogisasigisik, leget pa'leget oan huniti'lek welagaikhe kwe omanogo ebe lombok kagalek logouwageluk inunggulenu lombok sumburogo fisasigi.

¹⁴ A'nogo fi sasigi meneat he, it ap omanogo inendawinggen inailo were'ma isasigisik he, it inom, inogogwi inom, kaindek ferinarek welagaukwa mene inom, inebe mondogat inoba mel yagaisasigi: ”Ap nit ninom selei mene andi inoba hinailo asu fugo. Nineisena Tuhan Omame Mondok Hokho logolik inailo mene hilingiterek a'nogo hinendawimo ebe'ni o. Eberek logolik, hiren hit hinagaila'lak inom, hinagainafuri inom, hinagagwi inom, hinawi wurik inom, mondogat telinabubagaigen hinomamerogo yabino o,” iluk yagaisasigi.

¹⁵ A'nogo yagaisasigimo, it afuni ekhe nen he, ”Afuni Israel mene omanogo hiren inoasuogoluk weim abok ikhi lagep mene andi, arat inesanggo holhasik werego,” iluk yagaisasukwama inesanggo holhukwasik, iren he, ”Niren it inoasuogoluk ogo mene a'nogo, Allah nen leget fikhe higi,” iluk arat futfesukwa. Futfesukwama re, nit he, leget hobuk andoba wanuogoluk fakfesugu.

¹⁶ A'nogo yagaisasigi meneat he, o andem sambul he, an nagoromi inebe minggilogo fenakwe nek leget wanhu kwelek, it inebe fenakwe minggilogo re, sing igisogo, sige inom, sikhe inom, wanhukwasik he, tok pisingerisugunem ponghogo loageluk e sabelek inenggim wanhukwasik, selei mene kwi wagunem kagalek welagaukwa. A'nogo hilingitu kwelek, ap Israel mene ferinarek welagaukwa mene nen he, ”Niren lebethisogoin aro,” iluk isukwasik he,

¹⁷ it ap leget pa'leget legeisogo wusuogeluk ugunem leberisikhi lagaukwa. A'nogo leberisugu kwelek, it ap leget wanugun mene salmati lagaukwa mene andi, inenggi fenakwe sikhe, sige fisogo logolik, inenggi fenakwe nek helep salmati lagaukwa.

¹⁸ Nen, it ap helep leget wuti lagaukwa mene ogo re, inenggarok inalinggin oba kelogo fisogo logolik wuti lagaukwa. Nen, selei mene ninoasugun mene arat wagaikhama higi, iluk inendawi wenggelasuageluk pinggong hokho mene anet fikhi logogun mene ebe an nera'lu mondok welagaikhe.

¹⁹ A'nogo werek kwelek, an nen ap mondogat inom, inogogwi inom, inebe ferinarek welagaukwa mene inom, inoba mel yagaisasigi: ”Leget pa'leget yi yiling-waling mondok uanat wanhi lago andi nen, ninebe ninamu-ninamu mondok logogun andi.

²⁰ A'nogo were'ma, pinggong ane ugunem hinesanggo holhep halok he, hinebe nit ninoba yoma weak-weagat andogosi we'no o. Nineisena Allah nen nit faget weim yabigin werego,” iluk yagaisasigi.

²¹ A'nogo yagaisasigisik, leget andoba ohealek hupsiakhogo wulipluk he, wilik lagorek-lagorek huli o sebe-sebe hesagal pogoroba arat weinam agunemen kwi waga lagagu. It ap ekhe minggilogo re, leget pa'leget legeisogo wanhu kwelek, it ap fenakwe, sikhe sige inenggimo waluk selei mene kagalek logolik welagaukwa.

²² Leget pa'leget andi wuti logolik he, ap wuti lagaukwa mene inebe inom, leberisikhi lagaukwa mene inom, inebe mondogat he, o Yerusalem mondok nogo ikhi logogun, iluk yagaisasigimo yoma mondok nogo ikhi lagagu. A'nogo nogo ikhi logolik, hubanggo o kota Yerusalem kagalek welagagu, nen linggene re leget pa'leget a'nogo legeisogo wanhi lagagu andi.

²³ A'nogo wuti logolik, an nebe inom, an nagaila'lak ninom higit mene inom, nagoromi tentara mene inom, nebe kagalnarek welagaukwa mene inom, ninebe mondogat ninasu labetu mene a'nogo nonggologo fuluk, amu mene ekhe iti'lek hup hundik lingge hundik laberek mondok welagagu. A'nogo hilingiti logolik, ninasikhe ninarige ninenggimo mondok fisogo logolik, selei mene kwi wesinogoluk ninobabut hibil hebelhogo nek kagalek mondok welagagu.