NEHEMIA 3 - Allah Wene Fano Wene Hupla Inane

O Yerusalem pak leget a'nogo wurogo menerik lagaukwa mene, yi'nogo wutugu iluk isikhe wene

¹ Ap Imam Agung Elyasib inom at agaila'lak inomen o kota Yerusalem a'nogo leget pak leget kwe ambe enu ekhe Pintu Gerbang Domba ikhi lagaukwa mene a'nogo, kwe pakhot inom, nekhengge halogo wutukwasik TUHAN obaget enogo fesukwa. Nen, iren he leget pak leget a'nogoba nen he o eil yathogo wurik lagaukwa mene enu Menara Seratus a'nogoba nen he ekhe enu Menara Hananeel a'nogo huli andoma re mondogat pugunhogo wutukwasik TUHAN obagat enogo fesukwa mene re ebe yi'nogo yi:

^2-16 It afuni imam andem inomen he it afuni fenakwe o kota a'nogo leget pak leget inom, kwe ambe kugukwe inom, o eil yathogo wurik lagaukwa mene inom, pugunhogo wurik lagaukwa kwe inebe ineabu lombok he yi. It Yerikho inap, Zakur hun Imri amlogo It Senaa mene ineisok erokwe mene nen he: Gerbang Ikan andi inom e kagalek mene liafu mene inom kwe sou elha inom posiemanggen telhu mene inom e nunggulik lakfugu mene inom andoma wutukwa. Nen, it hun Meremot hun Uria amlogo Hakos omba andi inom. Mesulam hun Berekhya amlogo hun Mesezabeel omba andi inom Zadok hun Baana amlogo awi ero kota Tekoa inap, (inebe o kota andiba kain inogogwi welagaukwa inap andoma re yabu inomamerogo hilingiti'lek he ienberali kwelangai sogo welagaukwa). Nen it Yoyada hun Paeah amlogo andi inom, Mesulam hun Besoja amlogo inomen he: Kwe hokho mene enu Yesyana a'nogo inom, E kagalek mene liafu mene inom, kwe sou elha inom, posiemanggen telhu mene inom nen e kolok watu mene inom, wutukwa. Hun Melaca awi Gibeon mene inom, Yadon awi Meromot mene inom, Mizpa inap inom, en he: Leget Pa' leget a'nogo wilik-wilik he at gubernur i Efrat barat fikhit werek mene a'nogo awi lilu fei lagaukwa. Nen, at Usiel no emas elalhu aple elurek agun hun Harhaya amlogo andi inom. Hun Hananya amusu amben fano mene hilingitu aple elurek agun andi inom, en he; Wurik lagaukwa-lagaukwa re Tembok Lebar oba fei lagaukwa. Hun Hur amlogo Refaya o Yerusalem oba andoma distrik Minggilogo faget omame welagaikhe agun andi inom. Yedaya hun Harumaf amlogo andi mene nen he: Pa'leget onggwarek awi lilu Horokhogo andoma wanhukwa. Hatus hun Hastabneya amlogo andi inom, Malkia hun Harim amlogo andi inom Hasub hun Pahat-Moab amlogo andi inomen he: Pa'leget andi nen elonggo andem inom he, Pa'leget eil uanhogo Menara Perapian andi inom wanhukwa. Hun Salum at Halohes amlogo o distrik Yerusalem oba andoma tulem kwe Minggirogo faget inoe karin welagaikhe agun andi re, a'logomi nen lebethugu kwelek wanhikhe. Hun andi inom he hun Hanun awi Zanoah agun andi inomen he: Pintu Gerbang Lembah a'nogo inom, kwe sou elha inom, posiemanggen telhu mene inom, e sobang etu mene inom, wutukwa. Andi nen pa' leget ebere iren wilik-wilik lagaukwa mene re 440 meter en wilik lagaukwasik Pintu Gerbang Sampah a'nogo inomat wanhikhe. Nen, hun Malkia Rekhab amlogo o distrik Bet-Kerem enu werek welagaikhe agun a'nogo nen he: Pa' leget kwe Pintu Gerbang Sampah hugesi lagukwe iluk agarekwe a'nogo inom, kwe sou esanggo inom, posiemanggen telhu mene inom, e kolok watu mene inom wutukwa. Andi nen hun Salum at Kolhoze amlogo o Mizpa ba enu werek welagaikhe agun andi nen he: Pintu Gerbang Mata Air andi inom, engga inom, kwe esanggo inom, posiemanggen telhu mene inom, e sobang etu mene inom wanhukwa. Andi nen pa'leget ekhe enu: I moge Kolam Selah agarek mene ebene hun raja ebe were'ma nen eabu werek mene a'nogo horo'ma nen wilik-wilik he o kota Daud awiba nen kwe pelarekwe nen pagarekwe andoma inom wanhukwa. Nen, at Nehemia hun Azbuk o distrik Bet-Zur minggilogo faget inoe karin welagaikhe agun andi amlogo a'nogo nen he: Wilik-wilik hun Daud eisok erokwe mene salinafi lagaikhe kwe andoma huli nen he i mogo inom o leise uan mene wurik kwe omanogo inom wanhukwa.

It Lewi inap leget pa'leget andi wanhunem inom wanhukwa mene a'nogo

^17-21 Leget pa'leget fenakwe yi re it ap Lewi inaben wanhukwa mene re yi'nogo: Hun Bani amlogo Rehum a'nogo inom hun Hasabya o distrik Kehila minggirogo faget inoe karin welagaikhe agun andi mel en he: pa'leget ebe irogo inonggwarek faget mene wanhukwa. Nen, Binui hun Henadad amlogo o distrik Kehila minggirogo faget inoe karin welagaikhe agun andi inom, Hun Yosua amlogo Ezer o Mizpa andoma along werek mene welagaikhe agun andi inomen he: Pa'leget kwe unggutmo o sikhe sige were'ma a'nogo elokhe fikhit andoma wanhukwa. Hun Zabai amlogo Barukh a'nogo nen he: Pa'leget kwe unggutmo omanogo nen he O hun Imam Agung Elyasib a'nogo awi wuri'mo andoma huli wanhe. Hun Meremot at Uria amlogo hun Hakos omba a'nogo nen he: hun Elyasib aiba kwe higithogo andem en wilik-wilik he o a'nogo ambisang huli andomaba fei wagaikhe.

It imam inap leget fak mene a'nogo wanhunem inom wanhukwa mene re yi

^22-26 It ap imam andi nen leget andi palek higithogo ombo'ne wilik lagaukwa mene, higit-higit he yi'nogo: it imam inebe o Yerusalem andoma horokhogo welagaukwa mene inom, Benyamin mene inom Hasub mene inom, en he: Pa'leget it inonggwarek kwe kwili' lagikwe higithogo omanogo wanhukwa. Azarya hun Maaseya amlogo hun Ananya omba a'nogo nen he: Pa'leget o onggwarek awi era'lukwe omanogo wanhikhe. Binui hun Henadad amlogo Andi nen he: Pa'leget hun Azariah awi wuri'mo nen he, pa'leget waganek mene a'nogo unggutmo andoma huli wanhikhe. Hun Uzai amlogo Palal a'nogo nen he: Leget pa'leget waganek mene a'nogo unggutmo aremnogo nen he hun raja awi silimo higithogo ap lagaluk kagalek welagaikharek oba nen abel ambolkwe fikhit andoma wanhikhe. Hun Paros amlogo Pedaya a'nogo nen he: pa'leget kwe ambe enu Pintu Gerbang Air en mo liabi wagarek fikhit en he o TUHAN Awi wuri'mo a'nogo faget lagaluk kagalek werekwe andoma huli wanhikhe. (Andem en horokhogo andem he o sili ekhe enu Ofel, it ap TUHAN Awi a'nogo faget yabu hilingitu inap andi were'ma werek.)

It ap fena fikhit yabu hilingitukwa mene a'nogo

^27-32 Leget pa'leget andi fena fikhit he, it ap inenu lisu palek mene yi nen attak en engge hobugen engge wanhukwa mene re yi: It afuni Tekoa mene nen he: Leget a'nogo re TUHAN Awi silimo ap lagaluk kagalek werekwe andoma nen he o Ofel sili kwe andoma wanhukwa. It imam o kwe enu Pintu Gerbang Kuda ugukwe andoma werek inaben he: leget a'nogo re it inawi wurik mene inom misik era'lukwe hilingik mene omanogoba nen he kweba andoma nen hiling-hiling he abel utara fikhit andoma huli. Hun Imer amlogo Zadok a'nogo nen he: Pa'leget at onggwarek aiba inom elokhe misi'mo hilingik mene andoma kwe wanhukwa. Hun Sekhanya amlogo Semaya kwe ambe enu Gerbang Timur fikhit agarek kwe a'nogo kagalek welagaikhe agun andi nen he: Pa'leget at onggwarek aiba inom, elokhe wuthogo hilingik kwe omanogo wanhikhe. Hun Selemya amlogo. Hananya amlogo inom, nen hun Zalaf amlogo Hanun at ebere falfaligengge a'nogo inom. Bereknya amlogo Mesulam a'nogo inomen he: Pa'leget it inonggwarek inawilokwe inom, elokhe wuthogo hilingik kwe omanogo wanhukwa. Hun Malkia emas elalhu aple elu agun a'nogo nen he: Leget it ap TUHAN Awi elonggoma yabu hilingitarek mene inawi inebe misi'mo logolik welagaikharekwe andoma nen it ap yingge-tingge onggo palhu inap inawi wurik mene kwe enu Pintu Gerbang Mifkad salek kwe a'nogo nen he ambe eil ambol kwe mene wagane'ma nen mo liabi wagarek fikhit en he a'ma fikhit higithogo pa'leget unggutmo andoma huli wanhukwa. It ap emas elalhu aple inelu inap inom, nen yingge tingge onggo palhu inep inom, andoma nen he: Pa'leget he mondok fem elugunmo, ambe ambolkwe mene leget a'nogo unggutmo aremnogo nen hiling-hiling he kwe ambe enu Pintu Gerbang Domba salhukwa mene a'nogoba wanhukwa.