NEHEMIA 2 - Allah Wene Fano Wene Hupla Inane

Nehemia ebe o Yerusalem wagaikhe wene

¹ Allah ayonggo a'nogo fikhi lagagisik, tugi nit wenatorek higithogo 4 oba welagagisigen, tugi ekhe enu Nisan agarek andiba, nenggi ekhe sambul at raja Artahsasta amburu nuggu were'ma, an noba sinurogo logolik, at agai anggur amusu mene hinagaisogo wogotigi. An at elokhoma a'nogo hilingiti lagagi lek mene, andi sambul enek he, a'nogo hilingiti andi.

² A'nogo hilingitigi andi nen, aren he, ”Hat hebe ou lek meneat he hoba sinurogo welagen andi nenahalok? Hendawimo weak ekhe weregenat hilingiten u,” iluk heinok wo'neasikhe. A'nogo heinok wo'neasikhemo, an youk isigisik he,

³ mel isigi: ”Hat hebe henupogot mondok logoino, neisena. An nawi kota nombalak inebe salinafukwa kwe yogondak huli nen meisalek werek mene andoma inom, nen, kwe leget pa'leget ambe palek mene halik halokhogo endu nologo weaget fesukwa mene andoma inom, mondok weagat werek kwelek nendawimo fano logou re, elo'lego, neisena,” iluk yagatigi.

⁴ A'nogo yagatigimo, at raja nen he, ”Halok he, hat hendawimo nen ninggi'nogo hilingisigin hamolo anggegen?” iluk heinok wo'neasikhe. Heinok a'nogo wo'neasikhemo re, an nendawimo nen nineisena Allah pogoroba mene ayonggo fikhi logolik,

⁵ at raja oba mel yagatigi: ”An hamingmingengge nen kino yagahesigin mene andi, haren nane hesanggo holimbik he, higit, iluk anggegen halok he, o Yehuda an hamingmingengge nombalak inebe salinafukwaba o kota meisalek mene andi legeisogo wusi loageluk la'nobagaino o, neisena,” iluk yagatigi.

⁶ A'nogo yagatigimo, at ebe agwe era'lu hurek logolik nane esanggo holhikhesik, ”I o. Fano. Lanogo,” iluk yaganetikhe. A'nogo yaganetikhesik, mel yaganetikheat: ”O andoma henggi miren logombigen hobuk henggi kiba hambotkwe wesigin,” iluk heinok wo'neasikhemo, an nen he, tanggal tiba lambik logombik, hobuk tiba wesigin, iluk tanggal wenagaisogo fesigi mene yagatigi.

⁷ A'nogo yagatigisik, ap gubernur o propinsi Efrat barat fikhit welagaikharek mene andoma nen an o Yehuda wagunem it ekhe nen nanggwe pali nogoluk, it faget surat ekhe wo'nesuagaluk kino yagatigi.

⁸ Andi nen ekhe re, e ogoi at raja mene hun Asaf en kagalek welagaikhe mene o Allah awi wurik era'lukwe leget pa'leget ambe palugun mene faget inom, o kota leget pa'leget wusugun mene faget inom, o an nebe logogin oba wusugun mene faget inom, tegelogo nobagauwageluk at faget surat ekhe wo'nesuagaluk kino yagatigimo, Allah nen an lebetneasikhemo, an nen kino isigi mene andi at raja nen mondogat hilingnobagasikhe andi.

⁹ A'nogo wo'netikhesik, at agoromi ap tentara inogogwi ekhe inom, tentara wam kuda ba nikharek mene inom, an wo'narek wesuageluk inayonggo fesikhemo ninom o propinsi Efrat barat fikhit wagagu. A'nogo wagagusik, surat at kain raja nen palogo wo'netikhe mene a'nogo it gubernur lak wogisasigi.

¹⁰ A'nogo meneat he, ap Sanpalat aiba Bet-Horon mene andi inom, ap Tobia unggulenu Amon mene pemerintah faget yabu hilingiti lagaikhe mene andi inom, emberek inoba afuni ekhe nen he, ”Nehemia re, afuni Israel mene leberisagaluk wagasik werego,” iluk ugunem inesanggo holhukwasik he, ina'mage mondok lagasikhe.

¹¹ Ina'mage a'nogo lagasikhesik werek kwelek, an a'nogo waga lagagisik, o Yerusalem arat wagagisik set walogo nenggi henagan o andoma welagagi.

¹² A'nogo logolik, an nen he,” Allah nen o kota Yerusalem meisalhukwa a'nogo hobuk ambotkwe legeisogo wusuagaluk yaganetemo nen wagarigo,” iluk afuni mondogat yagaisigi'lek welagagi. A'nogo welagagisik, nenggi ekhe sambul nogo iluk o hubanggoat neluk agagisik, nagaila'lak inebe pire, henagan, ekhe inayonggo fesigisik he, wam amboloba nikharek mene ekhe welagaikhe le'ma re, we, wam keledai an amboloba hurek lagain mene nek waluk, o kota abel endakwe wulifugu.

¹³ O wei igi'lek werek kwelegat, o kota herakfuluk kwe ambe palek oba enu Pintu Gerbang Lembah agarek kwe a'nogo nen wulifugusik, kota abel elikwe o mo ubuk ikherek higit i ambutmo kwe ambe ekhe yi mene ti mene weak mene wulak fisagarek kwe, i enu Kisu Naga elesikwe andi nen lagagu. A'nogo laga logolik, o kota leget pa'leget wurik weaget fesukwa mene inom, kwe ambe palek mene endu fatukwama felelenghogo nasikhe mene omanogo inom, neilenggen kogolik lagagi.

¹⁴ A'nogo kogolik laga lagagisik, o kota abel mo liabi wagarek higiren, pikhit i elesikwe higit kwe ambe palek ekhe enu I Elesi Fuluk-fuluk Palogo wulilibi Wagarek oba ap raja agai mogo habulik werek oba andoma lagagu. A'nogo lagagu meneat he, andoma kwe mondok weaget fesukwama nogo nen he, an wam keledai amboloba hurek lagagi mene andi la mondok elo'lek agaikhe.

¹⁵ A'nogo hilinglagaikhemo, o Kidron tonggoma andoma pisugusigen o wei igi'lek werek kwelegat o kota leget pa'leget wurik welagaikhe mene kogolik kwanirogo re, kwe ambe palek ekhe enu Tonggoma a'nogo kwe nen ninambotkwe o kota kwi wagagu.

¹⁶ A'nogo kogolik lagagisik, afuni ninunggulenu misigat mene, ap Allah eisewerek mene inom, afuni Yahudi mene inogogwi inom, pemerintah faget hilingitarek mene inom, ap mondogat o kota Yerusalem hobuk legeisogo wusugun mene inom, inebe mondogat an nebe wagagiba nen pikhit huli o neilenggen kogolhigi andi sambul, ”An yi'nogo hilingisigin,” iluk nendawimo ebeti lagagi mene andi re it inoba endep ekhe yagaisasigi'lek andi nen he, neilenggen kogolik lagagisik wagagi mene andi re, iren fut figi'lek inonggot welagaukwa.

¹⁷ A'nogo meneat he, an nen hobuk it mel yagaisasigi: ”O kota Yerusalem mondok wolelenggen tagalogo fotfisigik, nen kwe ambe palek kwe mondogat endu fesukwama felelenghogo ninggik, isikhemo, wene nit ninoba were'ma, yi enggin ti enggin hugu mondok welagorek andi hikhi lageba? Afuni nen inendawimo seramet ninobagaluk weaget ninafarek andi lek asuagen he, o kota Yerusalem ebe inom, leget pa'leget wurik welagaikhe mene inom, meisalhukwa a'nogo hobuk ambotkwe legeisogo wusuogo,” iluk yagaisasigi.

¹⁸ A'nogo yagaisasigisik, Allah nen an lebetneasikhemo, ap raja Artahsasta nen yaganetikhe mene omanogo yagaisasigi. A'nogo yagaisasigimo, iren he, ”Fano, wusuogen he, ero fakfouwogo,” iluk isukwasik yabu ebe fakfouwogeluk yi mene ti mene mondok tik-tukhogo fesukwa.

¹⁹ A'nogo fesukwama, it Sanbalat inom, Tobia inom, Kesyem aiba Arab mene a'nogo inom, inesanggo holhukwasik, wagaukwasik endo ya'ninafik, inane asegen wo'nisigik, ikhi logolik, ”Hit ninggi'nogo hilingisuogeluk hilingiti lagep? Ap raja andi ninabit, iluk folim hibisuogeluk hilingiti lageba?” iluk yaganisasukwa.

²⁰ A'nogo yaganisasukwama, an nen he, mel yagaisasigi: ”Allah pogoroba lego mondok welagarek mene nen yabu andi eil hondologo katokhogo wusuageluk hilingninobagagin werego. Nit ninebe At Allah amingmingengge mene welago yi nen he, nit arat wusuogeluk ero fakhogoin aro. A'nogo meneat he, o Yerusalem yi hit eise fuk, hit mene legaro. Andi nen he, afuni nen o Yerusalem yi faget abok ikhi logolik, hit hinenu ikhi logogun mondok lego,” iluk yagaisasigi.