NEHEMIA 13 - Allah Wene Fano Wene Hupla Inane

Afuni Israel mene inebe ap pok meneba nen enogo fakhasukwa wene

¹ Wene melalek Musa nen yagaisasikhe mene a'nogo pilingitunemen he wene ekhe yi'nogo palek were'ma hasugu,” Afuni Israel mene o Mesir en wulibi wagaukwasik ebekhalem lagunem it ap inunggulenu pire andem en sumburu inom i inom noageluk wogisasukwa lek.

² Nen, andem enek fuk oba nen ekhe re iren anggikhi logolik he at Bileam en afuni Israel mene homan ikfisoageluk onggo palhukwa, oba nen he, nit nineisena Allah nen he homan ugu awene a'nogo agam hogore fanoabet ninobagakhi lagaikhe. Arigini'mo re, it afuni inunggulenu andem mene re it Allah againafuri inom sebesugun he mondok lek,” iluk palek welaga.

³ A'nogo palek were'ma enu salhunem he it afuni Israel mene a'nogo inesanggo holhukwasik he, it afuni pok mene omanogo afuni Israel mene inanggele'ma nen folhigik inale'ma fisasukwa.

At Nehemia nen yi wene ti wene afe halik lagaikhe wene

⁴ Nen, wene andi oan agi'lek kwelek he, at imam Elyasib o TUHAN Awi elonggoma senggele'ma andoma nunggungge kabogesi kugu mene omanogo halhi logouwageluk menfesukwangge a'nogo re, at Tobia inom hundik welagaukwa.

⁵ Inom hundik were'ma re at Elyasib en he o a'nogo senggelek hokho mene misik ekhe yi mene ti mene gandum inom, kemenyan inom o TUHAN Awi wuri'mo andoma nen hilingitarek engge inom, it imam wogisugu mene inobaget fuguba iluk inom, gandum inom, anggur amusu inom, zaitun amusu inom, nomolongge mene fuguba iluk inom, nen it ap Lewi mene inom, musik watu mene inom, o TUHAN Awi wuri'mo kwe kwi laguba a'nogo kagalek werek inap inobaget fuguba faget iluk inom, foukhogo fesugumo nen he at Tobia a'nogoba wogete.

⁶ Wene andi re an nebe lek kwelek o Yerusalem oba andoma hilinglaga. Andem sambul he an he at Artahsasta ebe raja afuni Babel mene inobaget menlagaikhesik ferinarek werek kwelek enek he 32 tahun hilinglagaikhemo, tahun andem oba agaikhe mene omanogo faget elurogo yagasigin iluk o Babel lagagimo nen hilinglaga. A'nogo lagarik eil misik ekhe welagarigen he hambotkwe

⁷ o Yerusalem lanogen iluk yaganetama nen wagagi. An nebe o yoma asi wagagisik hilingitunemen he at Elyasib en hun Tobia ba o TUHAN Awi wuri'mo omanogo senggelek ekhe wogete mene a'nogo hasigisik he youk lagagi.

⁸ A'nogo hilingitigisik he an na'mage mondok het-perisigisik he at Tobia asungge omanogo wokhigik hugisa wulibi wagagi.

⁹ A'nogo hilingfigirik he an nen o senggelek a'nogo puguneti logolik he hinane sali palini iluk yagaisasigi. A'nogo yagaisasigi mo hilingitunem he an nen yi mene ti mene Allah obaget fuluk wogetungge kemenyan inom, o TUHAN Awi wuri'mo andi nen hilingitungge omanogo mondogat obali'mo kwelafigi.

¹⁰ A'nogo hilingitigisik were'ma nen he, it ap Lewi inap inom, it musik hilingitarek inap inom, afuni nen it nunggu mene faget wogisa wagu legen he, o Yerusalem herakfuluk it ineabu lombok lagaukwasik andoma were'ma isasigi.

¹¹ A'nogo isasigisik he an nen it ap inogogwi kaindek omanogo inoba re, ”O TUHAN Awi yi hesanggema leisarek oma nenahalok,” iluk wenagisasigi. A'nogo wenagisasigisik an nen he it ap Lewi inap inom, it musik hilingitarek inap inom, omanogo wolinafigisik he, nekhengge yabu hilingiti logoni iluk yagaisasigi.

¹² A'nogo hilingitigimo nek he it afuni Israel mene nen he gandum inom, anggur inom zaitun amusu inom, nomolo mene fugu mene omanogo fugu aple eroratukwasik he yi mene ti mene nunggu mene foukhogo fuguba omanogo waluk fei waga lagukwa.

¹³ A'nogo waluk wagunem an nen he it o senggelek yi mene ti mene fuguba andoma halhi logouwageluk he, hun imam Selemya inom, hun Zadok Wene melalek elu agun a'nogo inom, ap Lewi mene Penaya a'nogo inom, fisasigi. Nen, at Hanan Zakur amlogo hun Matanya omba a'nogo re it leberinafi logouwageluk yagatigi. It ap andem he yabu misik seberogo hilingiti logolik higithogo hilingitarek mene inom, inagaila'lak yi mene ti mene andoma higithogo sumburogo wogisugu mene inom, andi re higit iluk andi an nelure'ma re it andi yagaisasigi.

¹⁴ Neisena Allah, an nen Hat Hawi ari faget inom, nen o andiba yabu hilingitu mene faget inom hilingiti mene andoma faget fut nobagain, iluk yagatigi.

¹⁵ Lingge andem oba an neil isasigi re afuni Yehuda mene nen linggene Sabat a'nogoba afuni fenakwe anggur agai perelhigik keralhi lagaukwa. Nen, it ekhe amu mene nen ogo gandum inom anggur inom anggur enggen inom, e ara enggen inom yi mene ti mene amu mene re it inangge keledai amboloba liak fuluk he o Yerusalem waluk waga lagaukwa. A'nogo hilingitunem isigirik an nen nane menfikhi logolik he, ”O Yerusalem oba yoma hiren onggo palhi logogun lego,” iluk wene palhigi.

¹⁶ Nen, it ap Tirus inap fenakwe o Yerusalem werek mene omanogo nen he ikan inom, Yi mene ti mene amu mene inom linggene Sabat sambul afuni Yehudi mene inoba onggo wanugun nen iluk waluk waga lagaukwaat.

¹⁷ A'nogo hilingiti lagaukwa ma re an nen it ap Yehuda mene melalinafi lagaukwa mene omanogo wenagisikhi logolik he yi'nogo isigi, ”Yago, hiren linggene Sabat sambul a'nogo emetfegepsik hilingiti lagep ari re hinonggoragepsiga, hit hinendawimo nen weak hilingiti lago lek iluk anggegepsigen inafe morue a'luk welageba?

¹⁸ Weak ariginik mene oma hilingitunem At Allah nen ninombawi unggum inoba fuluk o kota yi wolelenggan hogo fesikhe andi. Oba nen he hiren nekhengge Allah a'mage ekhe inom lagau hak hilingiti logolik linggene Sabat andi emeti lagep andi re!” iluk wene palhigi.

¹⁹ Andi nen he an nen yi'nogo hilingiti logogun iluk wene lenggalhigi, ”Linggene Sabat a'nogo meneba hup fuabengge andiba re, o hu'mokwe re kwe sou o kota kwi weri'lagwi mene andoma mondogat yagarik lagu nogo. Nen linggene Sabat andi mondogat lek asi lagi'le'ma re, linggene Sabat andi hubanggo andoma re kwe husu fuk,” iluk yagaisasigi. A'nogo yagaisaluk he it andoma kwi wesinogo iluk kagalek logouwageluk o kwe kwilagukwe omanogo fisilik lagagi.

²⁰ Oba nen he it ap onggo palhu inap inom, onggo hunitu inap inom omanogo inenggi ekhe sambul he, o linggene fuab sambul a'nogo hup ekheba re leget pa' leget a'nogo endakwe fikhit andoma nogokhi lagaukwa.

²¹ A'nogo nogogunem an nen it inoba yagaisikhi logolik,” Hit he we elalin an oma nenangotu werek kwelek hinoba nen o wei ili'lago yoma ri! Hinelurogo hiren ekhe inom a'nogo hilingituat logogun halok he at nen hilinghinabigin mene ekhe werek!” iluk isigi. A'nogo isigi andiba re iren linggene Sabat sambul a'nogo re waga lagaukwa mondok lek.

²² A'nogo hilingi'luk he an nen it ap Lewi mene omanogo it inebene pugunhogo sali paluk he, afuni linggene Sabat sambul andi enogo fuluk hilingiti logogun nen he ap kwe bene kagalek logouwageluk yagaisasigi. A'nogo yagaisaluk an nen samban ikhi logolik he, ”Neisena Allah, an nen ekhe andi hilingiti mene andi faget ebethan. Nen, Haren hendawi hundik hokho mene a'nogoba hendawit nabin, neisena,” iluk samban isigi.

²³ Inenggi welagagu andem huli an nen ekhe isasigi re afuni Yehudi mene inebe hokhorogo inagagwi inunggulenu Asdod mene inom, Amon mene inom, Moab mene inom, woginafukwama isasigi.

²⁴ A'nogo hilingitukwa ma re it inagainafuri mene fena re Yahudi mene inane fut figi'legenggere inunggulenu Asdod mene inane inom, afuni amu mene inane inom ikhi lagaikha.

²⁵ A'nogo ikhi lagaikhama re an nen it wenagisasigisik he homan ikfisigiat. Nen it fenare inebe yei inoatirik inesinggen kwanirogo lirisigi. A'nogo hilinginafirik an nen it inoba ikhi logolik he, ”Nit ninebe inom, nit ninagainafuri inom, afuni amu mene inom, yugunat woginafi logogun mondok lek, iluk Allah enu palogo humbuk palini,” iluk yagaisigi.

²⁶ An nen ikhi logolik he, ”At raja Salomo nen weak he yi mene hilingite lek nogo a? Hilingitikhe at. O kweang ma yoma ap raja werek mene re at Salomo lego welagaikhe mene andi hakhogo ekhe werek lek. We Allah nen he at oba endawi hundik hilingiti lagaikhe, A'nogo hilingiti logolik he at ebe afuni Israel mene inobaget raja logouwageluk menfesikhe. Oba nen he at ebe hemi inunggulenu amu mene nen endawinggen wanhi lagukwaba weak hilingitikhe.

²⁷ Hit he hinailo lekhogo Allah ane sagalhigipsik hemi inunggulenu amu mene woginafigip. Andi re mondok weak hokho mene hilingitep andi!” iluk yagaisigi.

²⁸ At Yoyada andi re hun Imam Agung Elyasib a'nogo amlogo, oba nen he at Yoyada andi amlogo misik ekhere at Sanbalat awi kota Bet-Horon mene a'nogo eyamal agaikhe. Andiba re at Yoyada a'nogo o Yerusalem logogin lek iluk mugusogo wilakfisasigi.

²⁹ A'nogo hilingitigisik an nen samban ikhi logolik he, ”Neisena Allah, afuni andoma nen yabu inunggulenu imam mene a'nogo seramet figik, nen Haren it imam mene inom ap Lewi mene inom wene warek mene a'nogo weagerogo figik, hilingigu mene andi faget wenggel han, neisena,” iluk samban igi.

³⁰ A'nogo igirik an nen afuni inunggulenu pok mene a'nogo mondogat horogo wulaginafi. An nen he it ap imam inap inom, Lewi inap inom, en hilingiti logogun mene iluk melalogo fisasigi mo re, it inamu lombok he ineabu werek higit-higit hilingiti lagaukwa.

³¹ Nen, ekhe an nen he e mezbah wurogo fei waga logouwageluk melalfisigik, nen afuni nen kweang oba nen enggen ugu attak-attak palhu mene waluk fei waga logouwageluk yagaisigik, hilingiti. A'nogo hilingitirik an nen kofokhogo samban ikhi logolik he, ”Neisena Allah, abirengge oma faget ebet haluk he Haren fanoabet nobagain o, neisena,” iluk samban igi.