NEHEMIA 12 - Allah Wene Fano Wene Hupla Inane

It afuni imam mene inom, Lewi mene inom inenu palek a'nogo

¹ It ap imam mene inom, Lewi mene inom hele warogo huginabi lagaukwama nen at Zerubabel hun Sealtiel amlogo a'nogo inom, Imam Agung Yesua inom seberogo inambotkwe inaiba wagaukwa mene inenu palek he yi:

^2-7 It imam mene re: Seraya, Yeremia, Ezra, Amarya, Malukh, Hatus, Sekhanya, Rehum, Meremot, Ido, Ginetoi, Abia, Minyamin, Maaja, Bilga, Semaya, Yoyarim, Yedaya, Salu, Amok, Hilkia, Yedaya inom andem. It andem he at Yesua werek oba andem imam mene inogogwi welagaukwa inap.

⁸ It Lewi inap he: wuni Allah fogeratarek awuni yanggulinafi lagaukwa inap he hun Yesua inom, Binui inom, Katmiel inom, Serebya inom, Matanya inom andem kepala hakhogo welagaukwa.

⁹ It afuni wuni inane seberogo ikhi logolik onggo lakfigik wakfigik ugu inap he Bakbukya, Uni, inom it inagaila'lak inunggulenu misik mene andemen ikhi lagaukwa.

It ap hun Imam Agung Yesua a'nogo ambisangma mene a'nogo

¹⁰ At Imam Agung Yesua a'nogo ambisangma nen ta'larik lagaukwa mene re yi: Yesua, Yoyakim, Elyasib, Yoyada,

¹¹ Yonatan, Yadua, inom andem.

It imam mene inogogwi welagaukwa mene inenu re yi:

^12-21 At Yoyakim ebe Imam Agung logolik oba it ap imam inogogwi kepala welagaukwa mene it inunggulenu mene et he yi: Imam ebe Unggulenu Meraya Seraya mene Hananya Yeremia mene Mesulam Ezra mene Yohanan Amarya mene Yonatan Melikhu mene Yusuf Sebanya mene Adna Harim mene Helkai Merayot mene Zakharia Ido mene Mesulam Gineton mene Zikhri Abia mene inom, Minyamin mene inom, Piltai Moaja mene, Samua Bilga mene Yonatan Semaya mene Matnai Yoyarib mene Uzi Yedaya mene Kalai Salai mene Heber Amok mene Hasabya Hilkia mene Netaneel Yedaya mene.

It imam mene inom Lewi mene inom ineisok erokwe faget lisu pelek welagaikhe mene a'nogo re yi:

²² It ap Lewi mene ineisok erokwe faget inom, imam mene ineisok erokwe faget inom inogogwi welagaukwa mene inenu palogo fesukwa mene re it ap Imam Agung inenu re yi: Elyasib inom, Yoyada inom, Yohanan inom, Yadua inom, it andem werek oba palogo fesukwa. A'nogo palogo fesukwama welagaikheba nen he at Darius afuni Persia mene faget raja menlagaikhesik welagaikhe andem huli lek asi lagaikhe.

²³ Oba nen he, it afuni inunggulenu Lewi mene faget inogogwi welagaukwa mene andoma inenu palek he wene at Yonatan hun Elyasib omba andi welagaikhe huli andem enek palek welagaikhe.

O TUHAN Awi wuri'mo a'nogo yabu hilingiti logogun mene faget sumbutukwa wene

²⁴ It ap inogogwi melalinafu mene hun Hasabya inom, Serebya inom, Yesua inom, Binui inom, Kadmiel inom, andem en melalinafu kwelek he it ap Lewi inap a'nogo inebe sumburogo kabok-kabok fisasukwa. A'nogo fisilik lagaukwama logolik, linggene hundik-hundik at raja Daud Allah amingmingengge a'nogo nen wene melalek fesikhe higithogo it andi inebe kabok pire mene hilingfuluk he TUHAN fageratik, wuniba onggo lak figik, wak figik, hilingiti lagaukwa.

²⁵ It ap o TUHAN Awi wuri'mo a'nogoba nen o senggelek yi mene ti mene nunggu mene kabokhogo fuguba, o TUHAN Awi wuri'mo kwe kwi laguba kagalek logouwageluk fisasukwa mene re: Hun Matanya inom, Bakbukya inom Obaja inom, Mesulam inom, Talmon inom, Akub inom andem.

²⁶ It andem he at Yoyakim hun Yesua amlogo Yozadak omba a'nogo inom, nen at Nehemia ebe gubernur werek oba inom, nen Ezra ebe imam logolik, Wene melalek elu-pelurek agun a'nogo inom were'ma andem welagaukwa inap.

Ap Nehemia nen leget pak leget legeisogo wanhikhe mene a'nogo faget seni isatukwa wene

²⁷ O Yerusalem oba leget pak leget legeisogo wanhukwa mene a'nogo faget seni isasuogeluk he it ap Lewi inap inawi lombok werek kwe omanogo nen we'luk andi hilingitunem wuni Allah hai warogo wilafik, musik enu gambus inom kecapi inom kong etik, hilingisuageluk inayonggo fesugu.

²⁸ A'nogo hilingfisasugumo re it ap Lewi inap ineisok erokwe mene a'nogo re it inawi o Yerusalem horok-horokwe andoma welagaukwa mene inom, nen o kota Netofa horokhogo andoma welagaukwa mene inom,

²⁹ o Bet-Gilgal nen inom, Geba nen inom Asmawet mene inom, kabogesi wagaukwa.

³⁰ A'nogo kabogesi wagaukwasik he, it ap Lewi inap inom, it imam andoma inomen he it inonggwarek inebe enogo logogun iluk horigik, afuni inobaget horinafik, kwe kugu kwe omanogo horatik nen leget pak leget a'nogo horatik, hilingitukwa.

³¹ A'nogo hilingitukwama re an nen afuni Yehuda mene malalinafu mene omanogo inoba re it inebe leget fak waganek mene a'nogo esialeba lagaluk, inebe esa hokho mene pire logalfuluk he inebe erarogo lakfuluk wuni Allah fogeratu awuni ikhi logolik o kota andi mase lakfouwageluk yagaisasigi. A'nogo yagaisasigimo re esa attak mene re pa'leget a'nogo esialeba eratukwasik he, inebe inenggi hare fikhit kwe ambe ekhe enu Gerbang Sampah agarek fikhit andoma lagaukwa.

³² A'nogo lagunem at Hosaya re it ap wuni ilik lagu mene omanogo inambotma laga lagaikhe, nen at ombo'ne re it afuni Yehuda mene melalinafarek mene omanogo lagaukwa.

^33-35 A'nogo lagunem it ap imam yi nen it inambot ma trompet furik laga lagaukwa mene re: Hun Azarya, Ezra, Mesulam, Yehuda, Benyamin, Semaya, Yeremia, inom andem. It andi inombo'ne re, at Zakharia hun Yonatan amlogo at Semaya omba andi laga lagaikhe. At andi ombawi mene fena re: Hun Matanya, Mikha, Zakur, unggulenu Asaf agun andi inom.

³⁶ At ombo'ne re afuni at unggulenu mene: Semaya, Azareel, Milalai, Gilalai, Maai, Netaneel, Yehuda, Hanani, inom andem esa fologo laga lagaukwa. It andem inebe mondogaren he pinggong ane misik mene inebe seberogo anet hagarek mene raja Daud Allah amingmingengge a'nogo nen wati lagaikhe omanogo hak mene nek waluk lagaukwa. Nen, at Ezra Allah Wene palek elu agun a'nogo re it esa a'nogoba nen elokhoma laga lagaikhe.

³⁷ A'nogo lagaukwasik it inebe Pintu Gerbang Air Mancur were'ma andem lagaukwasik he, it inebe kwanirogo re kwe pela enu Daud awi kota andi bene lagaukwasik he, at Daud awi silikwe nen he, nekhengge lagokhogore pa'leget wagane'ma o mo lagai wagarek fikhiren kwe ambe Pintu Gerbang Air ikhi lagaukwaba andem asi wagaukwa.

³⁸ It wuni ugu inap esa pirenek mene re pak leget ambol kwe inafe hare fikhit eratukwama an he it afuni holhu mene ninom seberogo lagagu. Lagagusik he nit he ninebe Menara Perapian werek kwe andi nen Tembok Lebar were'ma omanogo logalhugu.

³⁹ Andoma logalhugusik he, nit he Pintu Gerbang Efraim agarek kwe andi nen he kwe ekhe enu Pintu Gerbang Lama agarek oba a'nogo lagosik, kwe ekhe Pintu Gerbang Ikan agarek kwe andi nen Menara Hananeel oba andoma lagosik he Menara Seratus oba nen he pikhit Pintu Gerbang Domba ba andoma huli logali lagagu. A'nogo logalhugusik he esa niren mene a'nogo re Gerbang Penjagaan were'ma agarek oba nen o TUHAN Awi wuri'mo horokhogo andoma ninabolok lek asi lagagu.

⁴⁰ A'nogo asi lagagumo re ap wuni ugu inap esa pire aremnogo re hilingirik-hilingirik o TUHAN Awi wuri'mo horokhogo omanogo asi lagaukwa. Esa an ninom laga lagagu mene a'nogoba it melalinafu mene omanogo werek kwelek oba nen he,

⁴¹ it ap imam trompet futi lagaukwa mene omanogo ogore nit ninom lagaguat. It ninom lagagu mene andem inenu re: Elyakim, Maaseya, Minyamin, Mikha, Elyoenai, Zakharia, Hananya, inom andem;

⁴² It inombo'ne re hun Maaseya inom, Semaya, Eleazar, Uzi, Yohanan, Malkia, Elam, Ezer, inom, laga lagaukwa. It ap wuni ugu inap andem he at Yizrahya nen yanggulinafu kwelek ikhi lagaukwa.

⁴³ Linggene andi sambul he wam hokhorogo warogo TUHAN wogetukwa. A'nogo hilingitukwasik he it afuni omanogo nen At Allah agaiyek it inoba fikhemo iluk inagaiyek hokhorogo hilingiti lagaukwa. Nen, andi hilingitunem it yenggerugwi magendek mene inom hemi inom ogo inom seberogo hilingitukwasik he, iren inane mondok inagaiyek oba ugu mene andoma re yatma nen ogo holhi lagaukwaat.

O TUHAN Awi wuri'mo omanogo wene kabogeti logolik hilingit u mene faget hundik-hundik kabogeti logolik enek welagaukwa mene a'nogo.

⁴⁴ Andem huli re it ap fenakwe re o senggelek yi mene ti mene foukhogo logouwageluk fei laga lagaukwaba, o TUHAN Awi wuri'mo nen senggelek TUHAN obaget woge'luk fikhi lagaukwa mene inom, nomolo mene fikhi lagaukwa mene inom, tahun hundik-hundik oba yabukwe enggen ugu mene attak paluk fikhi lagukwa mene inom, halhi logouwageluk ap menfisasugu. A'nogo menfisasugumo re it ap kagalek welagaukwa mene andi nen he o kota horok-horokwe andoma nen yabukwe enggen ugu palhu mene omanogo kabogeti logolik enek logouwageluk menfisasugu. A'nogo kaboge'luk he, iren kabogetungge a'nogo re wene melalek oba hilingiti logogun aple iluk werek hakhogo it imam mene inom, it ap Lewi inap inom inoba wogisikhi lagaukwa.

⁴⁵ It ap Lewi mene inom, it imam inom andi re afuni inom yi mene ti mene inom faget enek logouwageluk horatik, nen amu mene Allah nen hilingiti logogun iluk isikhe mene hilingisuogeluk hilingitik, hilingiti lagaukwa andiba re it afuni Yehuda mene nen inalong anggaluk hilingiti lagaukwa. Nen, it ap musik hilingitu mene ogo, it o TUHAN Awi wuri'mo solombonma kagalek werek mene ogore yabu hilingitu mene faget wene melalek raja Daud inom at amlogo Salomo inomen fesukwa aple higithogo nek hilingiti lagaukwa.

⁴⁶ At Raja Daud welagaikheba nen, at wuni ugu mene faget elu-pelurek agun Asaf a'nogo welagaikheba nen enggere it wuni ikhi lagaukwa inap andoma re wuni Allah hai wati logolik hilingiti lagaukwa.

⁴⁷ Nen, at Zerubabel welagaikheba ogore afuni Israel mene nen he it ap wuni ugu inap inom, nen o TUHAN Awi wuri'mo kwi laguba ebekhalem kagalek welagaukwa inap faget ogo yi mene ti mene kaboge'luk it inenggi ekhe sambul-ekhe sambul nunggu mene faget wogisikhi lagaukwa. It afuni holhu mene nen he ap Lewi mene yi mene ti mene enogo fuluk wogisugunem he it ap Lewi inaben ogore it ap imam omanogo it wogisikhi logogun iluk werek mene higithogo nek wogisikhi lagaukwa.