NEHEMIA 11 - Allah Wene Fano Wene Hupla Inane

Afuni o Yerusalem oba andoma welagaukwa mene a'nogo

¹ A'nogo isukwasik he, it afuni inogogwi melalinafu mene omanogo re o Yerusalem femhogo werek kwelek he, it afuni omanogo nen it ineisok erokwe lombok inebe wenagaisogo 10 nen oba hilingik mene omanogo nen oak engge walhugunemen higit agu mene re inebe misikdek higik o kota Yerusalem horek meneba a'nogo logogun nen iluk eninafukwa. Nen, it oak engge walhugunemen higit agu lek mene re o kota amukwe andoma logogun mene eninafukwa.

² Nen, it ekhe fena inanggele'ma omanogo nen he, nit he o Yerusalem femhogo logogun fano iluk isukwama, iren a'nogo isukwa mene a'nogo faget he it afuni omanogo nen fogerinafukwa.

³ Nen o kota amu-amukwe andomaba re it afuni Israel mene inom, imam inap inom, Lewi inap inom, it ap TUHAN Aiba yabu hilingiti lagaukwa inap omanogo inom, nen it hun Salomo obaget yabu hilingiti lagaukwa mene omanogo inambisangma mene inom, it inawi kota lombok he inanggweang inonggwaregen meneba nek welagaukwa.

^4-6 Nen it afuni inunggulenu Benyamin mene inom, Yehuda mene inom, en wenagaisogo fenakwe re o Yerusalem welagaukwa. Nen, it andem mene o andoma welagaukwa mene inenu lisu palek he yi: It inunggulenu Yehuda mene inebe welagaukwa mene re yi: Hun Ataya Uzia amlogo hun Zakharia omba andi welagaikhe. Nen, it at andi ombawi mene fena inom welagaukwa mene inenu re yi: Hun Amarya, Sefaca, Mahalaleel, Peres, Yehuda. Nen, it inunggulenu mene andi nen inebe mondok lambulogo re 468 nen welagaukwa, nen ap inebe re mondok inalong-pinalong inap enek logolik hibilik hebelek inap enek welagaukwa. Maaseya hun Barukh amlogo hun Kolhoze omba andi welagaikhe. Nen, at andi ombawi nen fenakwe re yi: Hazaya, Adaya, Yoyarib, Zakharia, Syela, Yehuda inom welagaukwa.

^7-8 It inunggulenu Benyamin mene welagaukwa mene inebe re yi: Salu hun Mesulam amlogo hun Yoed omba welageikhe. At andi inom he ombawi fena re yi: Penaya, Kolaya, Maaseya, Itiel, inom Yesaya inom andem. Gabai inom, Salai inom ogo. It andem he at Salu erugwi agaila'lak horokhogo mene. It inebe mondok lambukhogo re 928 nen were'ma re at Yoed,

⁹ hun Zikhri amlogo a'nogo inom, at a'ma werek mene a'nogo inom, nen at Yehuda hun Hasenua amlogo a'nogo inomen melalinafu welagaukwa.

^10-11 It imam inap a'nogo mene welagaukwa mene re yi: Hun Yeyada Yoarib amlogo hun Yokhin omba andi ekhe welagaikhe. Nen, at Seraya hun Hilkia amlogo at Mesulam omba andi ekhe welagaikhe. At andi nen ombawi inebe fena re: Zadok, Merayot, Ahitub, it inebe Imam Agung welagaukwa inap andem.

¹² It inebe mondogat lambulogo re 822 nen logolik iren TUHAN Awi wuri'mo andoma yabu imam mene hilingiti lagaukwa. Ekhe re at Adaya hun Yeroham amlogo at Pelalya omba andi welagaikhe. At andi mene nen ombawi fena re: Amzi, Zakharia, Pasyur, Malkia, inom andem.

¹³ It inunggulenu andi mene nen ap mene nek ineisok erokwe lombok faget welagaukwa mene inom lambulogo re 242 nen. Ekhe re Amasai hun Asareel amlogo at Ahzai omba andi welagaikhe. Nen it andi mene inambu-inomba fenare Mesilemot inom he Imer inom andem welagaukwa.

¹⁴ It inunggulenu andi mene oba nen ap inogogwi hibilik-hebelek mene nek welagaukwa mene inebe re 128 nen. It andi melalinafi lagaikhe mene re at Zabdiel hun Gedolim amlogo andi welagaikhe.

^15-18 Ap Lewi inap en welagaukwa mene: Hun Semaya Hasub amlogo hun Azrikam omba andi welagaikhe. At ambu-ombalak fena inenu re: hun Hasabya inom Buni inom andem. It hun Sabetai inom Yozabad inom andem he ap Lewi inaben ap lego inap Yabu o TUHAN Awi wuri'mo nen endakwe fikhit hilingitu mene faget senek welagaukwa inap. Ekhere at Matanya hun Mikha amlogo at Zabdi omba, hun Asaf ambisangma mene andi welagaikhe. At andi re afuni nen wuni watunem melalinafik, Allah hai warogo samban inoba igik ikhi lagaikhe agun. At Bakbukya andi re at Matanya andi a'ma logolik yabu hilingiti lagaikhe. Ekhere Abda hun Samual amlogo at Galal omba Yedutun ambisangma nen tagongge mene andi ekhe welagaikhe. It ap andoma nen inebe abirengge re 284 en welagaukwa.

¹⁹ Ap kwe kwi laguba omanogo kagalek welagaukwa mene omanogo nen he: Akub inom, Talmon inom, it inagaila'lak inom andem welagaukwa. It andi inebe lambulogo re 172 nen welagaukwa.

²⁰ Afuni Israel mene inom, it imam inom, it Lewi inap fenakwe alonghogo re, o Yehuda kweang oba andoma nen it inawi kota lombok ekhe kwe ekhe kwe welagaukwa.

²¹ It ap TUHAN Awi wuri'mo yabu hilingiti lagaukwa mene andoma re o kota Yerusalem oba nen o sili ekhe enu Ofel andiba andoma welagaukwa. A'nogo logolik, it inebe re hun Ziha inom Gispa inomen melalinafu kwelek yabu hilingiti lagaukwa.

²² It ap Lewi inap o Yerusalem welagaukwa mene omanogo nen yabu hilingitunem ineilenggen welagaukwa mene re hun Uzi at Bani amlogo hun Hasabya omba andi welagaikhe. At mene nen ombawi fena re Matanya inom Mikha inom. At andi re it inunggulenu Asaf inap o TUHAN Awi wuri'mo wene kabogesuogeluk logolik musik halhi lagaukwa mene inom hundik welagaikhe.

²³ It ap musik o TUHAN Awi wuri'mo omanogo linggene hundik-hundik hilingisi kugu mene faget he wene melalek at raja nen fesikhemo welagaikhe mene higithogo ekhe kwigik, ekhe kwigik, hilingiti lagaukwa.

²⁴ Hun Petahya at Mesezabeel unggulenu Yehuda mene nen unggulenu akhogo Zera mene andi re it afuni Israel mene inobaget o Persia ba andoma at raja ebe were'ma welagaukwa.

Afuni o kota amu kwe welagaukwa mene inenu palek yi

^25-30 Afuni hokhorogo re o kota it ineabu werek kwe omanogo horokhogo welagaukwa. It afuni inunggulenu Yehuda mene fenakwe re inebe o Bersyeba abel a'ma fikhit andoma inom he o Lembah Hinom abel ambolkwe fikhit andoma inom welagaukwa. It a'nogo logolik, inebe welagaukwa kwe o kota re yi: Kiryat-Araba, Dibon, Yekabzeel, Yesua, Molada, Bet-Pelet, Hazar-Zual, Bersyeba, Ziklag, Mekhona, En-Rimon, Zora, Yarmut, Zanoah, Adulam, Azeka, Lakhis inom oba andoma welagaukwa.

³¹ Nen, it ap inunggulenu Benyamin mene fena re o kota fenakwe welagaukwa mene re yi: O Geba, Mikhmas, Ai, Betel, inom o sili endep kwe horok-horokwe andoma inom welagaukwa,

³² andi nen o Anadot, Nob, Ananya,

³³ Hazor, Rama, Gitaim,

³⁴ Hadid, Zeboim, Nebalat,

³⁵ Lod, Ono, andi nen o Lembah Tukang kwe andoma inom welagaukwa.

³⁶ It ap Lewi inap esa fena it Yehuda mene inebene welagaukwa mene omanogo ap Benyamin mene inom logouwageluk yagaisasukwa.