NEHEMIA 10 - Allah Wene Fano Wene Hupla Inane

¹ A'nogo agama it ap andem inenggi amusu faga mene attak he Gubernur Nehemia hun Hakhalya amlogo a'nogo tak fikhe. Nen at ombo'ne re hun Zedekia, It andem inombo'ne inenggi amusu fesukwa mene a'nogo inenu re yi:

^2-8 It imam mene nen he: Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniel, Ginedon, Barukh, Mesulam, Abia, Miyamin, Maazya, Bilgai, Semaya, inom andem en fesukwa.

^9-13 Nen it Lewi mene nen he: Yesua hun Azarya amlogo a'nogo inom, Binui it inunggulenu Henadad mene inambisangma mene a'nogo inom, Kadmiel inom, Sebanya inom, Hodia, Kelita, Pelaya, Hanan, Mikha, Rehob, Hasabya, Zakhur, Serebya, Sebanya, Hodia, Bani, Beninu inom andem en fesukwa.

^14-27 It ap inunggulenu andi mene melalinafi lagaukwa mene andi nen fesukwa mene re: Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anator, Bebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim, Baana, inom andemen fesukwa.

Allah wene melalek higithogo nek hilingiti logogun iluk isukwasik lisu palogo fesukwa wene.

²⁸ A'nogo hilingitosik it afuni omanogo nen hilingiti logogun mene iluk isukwasik he yi'nogo hombuk palhukwa, ”Nit afuni Israel mene inom, it ap imam inom, ap Lewi inap inom, o TUHAN Aiba faget ebekhalem kagalek werek mene inom, it ap pinggong kongetarek mene inom, o TUHAN ailoba andoma yabu hilingitarek inap inom, nit ninagagwi inom, nit ninagainafuri inebe yi wene ti wene elok futfou higit mene inom, nen it afuni fena Allah nen awene melalek hologo nek hilingiti logogun iluk inebe afuni pok mene nit ninanggelekwe werek mene omanogo inanggele'ma nen enogo fakhaga mene inom,

²⁹ ”Ninebe mondogat ninogogwi kaindek ninom lambukhogo logolik Allah enu hombuk palogo mel ogo: Allah nen komotninafikhe wene, at amingmingengge Musa yagatikhemo aren yaganisasikhe wene andi hologo higithogo hilingiti logogun. ”Yi'nogo hilingiti logogun,” iluk Allah enu hombuk palogo ogo andi hilingiti'lek halok, Allah nen homan ninobagauwago. Nineisena Allah nen, yi'nogo hilingi'no ti'nogo hilingi'no, iluk komotninafikhe wene andi mondogat hologo higithogo hilingiti logogun, iluk at enu hombuk palogo ogo andi,” iluk isukwa.

³⁰ Andi nen niren hombuk palhi logolik, ”it afuni pok mene nit ninaiba ninanggelekwe werek mene andoma ninom wok-wok aga logogun mondok lek.

³¹ Nen it ap pok mene andoma nen it inangge gandum inom athe, inangge ekhe mene inom, ninenggi sabat oba ogo inenggi wesa ekhe hokho meneba ogo, onggo wilik wagu halok he niren it inangge andoma onggo wanhi logogun mondok lek. Tahun falfaligen wela'luk sabit meneba re niren yabu wanhi logogun mondok lek, nen ninombalegengge werek mene ogore obali'mo feni iluk yagaisikhi logogun mondok lek.

³² Tahun hundik-hundik andomaba re o TUHAN aiba andoma hilingitu mene faget onggo palhi logouwageluk nit ninebe lombogen ninangge perak 5 kilogram en higik kabogeti logogun.

³³ Niren o TUHAN aiba omanogo kabogeti logolik hilingiti logogun mene faget he: roti TUHAN obaget weragaisogo meja ba fikhi logogun mene faget inom, gandum inenggi hundik-hundik fugu mene faget inom, wam TUHAN endawimo agaiyek hoageluk linggene hundik-hundik warogo noletu mene faget inom, yi mene ti mene wene enogo werek mene faget hilingitu mene faget inom, wam afuni Israel mene ninaweak legaphogo fouwageluk warogo wogetu mene faget inom, nen o TUHAN awi wurik oba andoma yi mene ti mene hilingitu mene faget inom, fougerati logogun.

³⁴ Nit afuni holhu mene inom, ap imam inom, it Lewi inap inom, en he wene melalek werek mene higithogo re, nit nineisena TUHAN Allah Awi wuri'mo andoma nen wam yi mene ti mene warogo nolhu mene faget it inunggulenu ki mene nen e wurogo fikhi logogun iluk tahun hundik-hundik andomaba enek asuageluk he helep enggen waleti logogun.

³⁵ Tahun hundik-hundik oba re niren gandum enggen attak-attak palhu mene inom, nit ninagayo enggen itu mene erobaga nen attak-attak yugulagu mene inom he TUHAN Awi wurimo nek waluk waga logogun.

³⁶ Nen, wene melalek werek mene higithogo re, nit ninagainafuri ap manggusa tago mene re it ap imam en Allah wogosuageluk TUHAN Awi wuri'mo waluk waga logogun. Andi nen nit ninanggo sapi eak ogo, domba eak ogo, athe, kambing eak ogo, attak-attak talasigin mene andoma re waluk waga logogun.

³⁷ Niren he it ap imam inambit o TUHAN Aiba elonggoma andoma gandum enggen fem attak-attak mene perelek engge tahun ebe lombok oba palhu mene inom, andi nen ekhe e anggur amusu hangge mene inom, zaitun amusu hangge inom, nen yi agayo-ti agayo enggen andoma re waluk waga logogun. Nen nit nineabumo nen enggen paliluk nomolo mene fikhi logogun mene andoma re, it ap Lewi mene o kota andiba yabu hilingitu lombok werek mene niren fugu mene halhi logogun mene andoma inambit wogisa waga logogun.

³⁸ Oba nen he it ap imam hun Harun ambisangma mene nen niren nomolo mene iluk fugu mene omanogo andogotu halok he it ap Lewi mene ekhe ineisomarogo kabogesi laga logogun. A'nogo kabogeluk he it imam omanogo nen nomolo mene fugu mene omanogo re yi mene ti mene fuguba senggelekwe omanogo fei lagunem it ap Lewi inaben waluk he o TUHAN aiba omanogo fei laga logogun.

³⁹ Afuni Israel mene inom it ap Lewi inaben inom he o TUHAN Awi wurik oba yi mene ti mene fugu mene werek oba omanogo iren hundik-hundik fikhi logogun mene re: gandum inom, anggur inom, Zaitun amusu inom, senggele'ma andoma fei laga logogun. Nen iren fei laga logogun oba andoma re it ap imam yabu hilingiti logolik werek mene inom, o TUHAN aiba kwi laguba kagalek werek mene inom, wuni watu mene inom, werek oba andoma fikhi logogun. Nit he o nit nineisena TUHAN Aiba andi fi-furogo hilingiti logogun, niren ekhe taganet fikhi logogun mondok lek,” iluk hombuk palhukwa.