NEHEMIA 1 - Allah Wene Fano Wene Hupla Inane

¹ Ap Hakhalya amlogo Nehemia nen, ”An yi'nogo hilingiti lagarik,” iluk pilingisogo lisu palhikhe re, yi'nogo. Ap Artahsasta ebe afuni Persia mene inoe raja logolik 20 tahun ferinarek welagaikhesik, tahun andiba werek kwelek, tugi iren wenatarek higithogo enu Kislew oba re, an nebe o at Artahsasta nen ferinarek welagaikheba o kota Susan welagagi.

Ap Nehemia nen afuni Israel mene faget samban oba Allah ayonggo fesikhe wene

² Andem sambul, an nagailak Hanani re o Yehuda nen ap ekhe inebe pire, henagan mene inom lagaukwa. A'nogo lagaukwama, an nen heinok wokhikhi logolik he, ”Afuni Yahudi mene o Babel huginabi lagaukwama inambotkwe wagaukwa mene omanogo o Yerusalem logolik he ninggi'nogo hilingiri'lagwi?” iluk heinok wogisasigi.

³ Heinok a'nogo wogisasigimo, iren he, mel yaganetukwa: ”Afuni Yahudi mene o Babel wo'ninarek wagaukwa mene hobuk inambotkwe inawi eroma lagaukwa mene omanogo re, yogondak ap pok mene inanggelekwe werek mene omanogo nen yi enggin ti enggin inoba figik, inendawimo wiik-weakhogo hilingfisigik, ugunem mondok weakhogo werego. Nen, endamat o kota Yerusalem leget pa'leget wurik welagaikhe mene meisak lambukhogo lakfisigik, kwe ebekwe leget pa'leget ambe palek mene endu nolhik, isukwa mene omanogo hobuk agauak hilingiti'lek mondok meisalegat werego, noe,” iluk yaganetukwa.

⁴ Wene a'nogo yaganetukwama nesanggo holhigisik he, nebe hu'lagagisik, le agagi. A'nogo le agagisik, o nenggi pire henagan hangge nendawimo mondok weagat logolik, sumburu ninggi'lek samban at Allah ayonggo fugu mondok logolik,

⁵ mel ikhi lagagi: ”Neisena TUHAN Allah, Hebe Pogoroba Lego Mondok welagen mene. Hat Allah hebe mondok hokho hagun hilingi'mo re, nit hat hebe ninailo logoligat hawe a'ma kogorek andi neisena. Hat hebe ninendawirogo logolik wene komotninafigin mene omanogo hologo higithogo hilingiti lago mene nek he, haren, hit An nagainafuri, iluk wene warogo wo'ninafigin mene andi hendawit ninapluk ninoba lombokhogo mondok welagendek andi, neisena.

⁶ An nen hagainafuri Israel mene faget o hup hundik, lingge hundik, nane hoba liakfei waga lagi andi, heilenggen neambik he, nane hesanggo holino o, neisena. Nit afuni Israel mene weak hilingitugu andi. Nen an nebe inom, nombalak inom, weak hilingituguat andi o, neisena.

⁷ Wene haren komorogo, yi'nogo hilingi'no ti'nogo hilingi'no, iluk hamingmingengge Musa nen yaganisoagaluk yagatiginmo yaganisasikhe wene andi higithogo hilingiti'lek sagalogo mondok weak hilingito andi, neisena.

⁸ Haren wene mel iluk Musa yagatiginmo yaganisasikhe mene andi hendawimo ebesin o, neisena. Haren he, hit An nagainafuri Israel mene re wene An nen komothinafigi mene andi hologo noba lomborogo logogun lek halok he, afuni inunggulenu hunogo mene inawi sili kwe andoma pugulogo lakhinobagagin o.

⁹ A'nogo meneat he, hobuk hinafe hebelasimbik hinambotkwe noba wesimbik noba lomborogo logolik, nane hologo hilingisugun halok he, hit hinebe pugulogo o pogot ero-ero lakhinobagambik hobuk andogorogo an nobaget hilingiti logogun oba nonggwaregen wenagaisogo fakhasigiba andoma logobagaik iluk hinobagai wesigin o, iluk isigin mene andi hendawimo ebesin o, neisena.

¹⁰ TUHAN. Nit yi re, honggwarek hagainafuri mene o, Hat honggwarek hamingmingengge logouwagaluk homame hokho a'nogoba homamerogo telninafigin mene o, neisena.

¹¹ An nen ogo, hamlogomi fenakwe inebe mondogaren ogo, ninebe mondogen hat agaukhogo fogethafi logouwogeluk samban hayonggo fikhi lago mene andi, ninane hesanggo holin o, neisena. O yogondak he, an hamingmingengge nebe ninoe raja oba lagain enggere, aren endawit nabuageluk endawimo kagalin o, neisena,” iluk samban oba Allah ayonggo fikhi lagagi. Andem oba re, an nebe raja agai nunggu mene faget yi'nogo hilingisugun ti'nogo hilingisugun, iluk lenggalhu logolik, Allah ayonggo a'nogo fikhi lagagi andi.