NAHUM 3 - Allah Wene Fano Wene Hupla Inane

¹ O kota afuni inoatik, ineranhogo wene lalinafik, nen afuni inangge hugul helaluk hoporogo fetaluk welagik, agarek awi andi re weagerinabigin o.

² Ap inangge kuda weak-weak loageluk fetnenggeba lambisogengge warik weri'lagwi mene inom, eisok maserek mene pirimeti logolik abolok kilit samogerik weri'lago mene inom andoma hinesanggo holini o! Kuda uarek lagunem inom kereta eisok pirimerik lagunem inom abolok lelok-lelogenggerik lili'lago mene andi holini o!

³ It ap kuda ba lagaluk weim yabi kwili'lagwi mene re inagaiyekhogo mondok lagunem, inenggarok he amulit mondok yabelanget higik, nen inarige re amulok kulung higik, hilingiri'lago. A'nogo hilingiti logolik, inoasi kugunem he inoatu mene andoma re wenasu mondok elo'lek, ap warek enek kabok pulong lagagunem, afuni lagu mene re inoba nen peikhogo warili'lagwi.

⁴ Niniwe pailak enek hilingiri'lago mene a'nogo re wene oba fugu werek. At elokhe re mondok fano eil alili pugunsek logolik afuni inendawinggen wanherek. A'nogo hilingiterek andi nen he, aren ap inunggulenu hokhorogo omanogo weagerinafik, ane amusu tepsek oba inendawinggen wanhik, ikherek andi.

⁵ Tuhan Omame Mondok Hokho mene a'nogo nen ikhi logolik, ”Hat Niniwe yi re, An nen hat hoba enggin-fenggin mondogat hilinghobagagin o! An nen afuni inunggulenu ekhe mene ekhe mene inelokhoma nen hasu laberek welagen mene ari nonggol heamo re, afuni nen hat henggalimongge ineilenggen heogoin o.

⁶ Hat hebe re An nen yi mene ti mene mondogat hebak nafe mene hakhogo hilinghobagambik he, An nen hat hebe ologoilong engge inom huk heagain. A'nogo hukheambik he afuni nen kumuthafi logouwageluk hilinghobagagin,

⁷ a'nogo hilinghobagaumo re, afuni hat hebe ineilenggen hiikhi logogun mene nen he, hagaiserogo laga logolik, yi'nogo ikhi logogun, ”Niniwe a'nogo re, o meisalek enek kabogikhe o! Ap sa nen at obaget fong wasigin nogo? Afuni at endawimo konu mene re ekhe werek lego,” ikhi logogun isikhe.

⁸ Hit Niniwe mene yi sani, hiren he, o Tebe it Mesir mene inawi eroma ibu kota andi re sebelek kwelek nit enek he lego welago iluk ikhi lageba? O Tebe andi re, i aikmo were'ma, i andi nen it inebe faget leget fak waganek hakhogo ferinarek hilingi'mo re, eberogo nen he i Nil andi re it inendawi hambugengge werek.

⁹ It afuni Tebe inaben he, o Sudan inom Mesir inom sebelinarek were'ma re iren sebelinarek werekwe andoma re huli-huli warek legengge logolik, it Libia inap inom Put inap inom he yi wene ti wene hilingisuogeluk inebe misik sebe iluk hilingitarek.

¹⁰ A'nogo hilingitarek oba nen he afuni o Tebe werek mene re hele warinarek fisa lagaikharek oba andoma fisa lagaikhama werek. Kwe esanggokwe omanogo nen he it inagainafuri mondogat yei warogo inebe pinggi inoata. It inogogwi kaindek he posiemanggen meneba hele warinafasik he it ap hele warinafa mene omanogo inebe lombok sumbut lagaikha.

¹¹ Hat Niniwe yi. Hat ogore, hebe lugulugwi palimbik hafe mosigin. Nen, haren ogore, it haselei mene inoba nen polokhogo wulibigin iluk hilingisigin aro.

¹² Haren haleget pa'leget waganek welagen kwe andoma mondogat he e ara enggen igisogo mondogat yugula'luk welagarek hak hilingi'mo re, enggen ugu mene a'nogo elel hugunem, ap enggen taganigin iluk lagu mene a'nogo ambelema pikhit pi waga logogin.

¹³ Hat hagoromi sikhe fisogo mene re hemi inomame lek welagaikharek andi hak hilingik logogun. Nen hat hanggweang oba andoma nen he, it hinaselei mene wagunem welerogo fangeti logogun lek. Endu nen he hit hinawi kwe ambe palek oba e nunggulik wengik mene andoma mondogat nagain.

¹⁴ A'nogo hilingik enggere hit hinebe hukhinabi wesugun sambul andoma faget he hinagai nunggu mene hinagaisogo fakhambik logoino. Nen, hinawi oak liabek mene andoma omameratik, Kweang tangge mene hineisogen puselfuluk, helep hakhogo weragaisogo fougeratik, ino.

¹⁵ Haren a'nogo hilingisigin oba nen he hat hebe endu ninggik, weim oba nen wa'lagik, igin enggere yi'nogo ti'nogo hilingisigin mene andoma re we alomarogo nek hilingisigin. Nen, hat hebe yi mene ti mene yago mene pulue nen ninggerek hak legasigin. Nen, hat hebe re pulue esa hokhorogo welagarek hak hilingik welagen oba nen wilibu re elo'lego!

¹⁶ Afuni hit mene yi mene ti mene onggo palhik hunitik agarek mene andoma inebe hilingik mene re hesagalenggen pogoroba werek andoma re endep hak oba nen it enek he mondok hokho-pokhorogo werek. Oba nen yogondak he it inebe no pulue nen ogolabi langhogo tarogo longgo ilagarek hak longgo ugun.

¹⁷ Nen, it inogogwi kaindek mene inom ap inenu werek mene inom he pulue sogoi en leget pa'leget waganek ebene hina'lagarek oba nen mo lakfei wagunem it inebe tathigik lagunem he, aben ogo koma lagaikha iluk futfisagarek lek andi hakhogo asugun.

¹⁸ Hat raja Asyur yi! Hat hagoromi gubernur he mondogat wa'lagaikha, nen hagoromi bupati re inenggi mondok-mondok faget nogoi lagaikha. hat hagainafuri afuni holhu mene re tom ebene andoma linggi-longgo agama re ap misigen iluk ogo ekhe woginarek sugulogo wesugun lego.

¹⁹ Hat hebeba hilingik welagen mene afuni nen holhaluk inagaiyegen inenggi taberi'lagwi andi erore, haren mondok weak mene palfigi'lek afuni inoba hilingfisugunem enggin-fenggin hikhi lagaikha andiba o. Hat hebeba yei warek welagen mene andoma obat foumo re elo'lego, nen hebene houmo werek mene andoma fano hilinghobagagunem hagamburasu re elo'lek andi o,” iluk isikhe.