MIKHA 7 - Allah Wene Fano Wene Hupla Inane

Israel mene inebeba inom inobabut oba inom mondogat nonghong isikhe wene

¹ An nebeba hilingik welagi re o hibi lagagunem e enggen itu mene omanogo andogosi lagaikharek hak inom, nen anggur enggen attak mene paliluk hobuk mene pali lagaikharek hak inom, hilingik logolik he, alomat lasigiluk welagi o. Nen e anggur enggen nunggu mene inom, ara enggen an namolo mene inom ekhe werek lek.

² Afuni inobabut higithogo nek hilingitarek mene re o kweangma yoma nen lek agaikha. Nen, ap Allahba tiphogo hilingitarek mene re ekhe were'ma isikhi lagi lek. Afuni inebe lombogen he it ekhe mene inoasugun iluk nenangorinafu mondok werek. A'nogo hilingiti logolik it inebe seberogo re inagaila'lak ekhe ke'nok uageluk yebet fisili'lagwi.

³ It inebe mondogaren he weak hilingitu mene faget enek inobabut mondok hibil-hebelhogo hilingitu welagaikharek. It ap ineabu legoma welaikharek mene nen inom, nen it hakim wene tegetarek mene nen inom ogore, wene tegesuogeluk he onggo tak wo'nisani iluk kinotarek. Nen, it ap inogogwi kaindegen ogore, it inendawimo anggagarek mene nek hilingisuageluk miminginafarek. A'nogo nek hilingiti logolik it inebe mondogarenat hilingirik lagaikharek andi.

⁴ Ap it inanggele'ma andoma mene ekhe mondok fanorogo hilingiterek mene welagik, nen ekhe mondok higithogo hilingiterek mene welagik, agarek oba nen ogore, e alok weak mene andoma hak enek hilingik. A'nogo hilingitunem At Allah nen amingmingengge nabi bene nen afuni inelurogo yagaisoageluk yagaisikhi lagaikhe mene omanogo higithogo Allah nen At againafuri mene inoba wene fagain mene a'nogo arat horogasi waga. Nen, yogondak he it inebe inanggelekwe andoma mondogat nonghong ikhe.

⁵ Hit he, hinarugwi mene nen ugun mene faget eberogo iluk angga fuk, nen, hinagaila'lak inoba himbirik logou fugat. Nen hit hinane ugunem inesanggo holek mene re hinonggwarek hinagagwi meneba nen ogore hinane uogeluk he hinendawinggen fanorogo wenggel halugen ugunogo.

⁶ O yogondak ya ha'ma re, it misik mene ineisok erokwe meneba nen ogore, inom minggilik logolik he, amlogo nen eisena abok palhik, a'logo nen agaisa ane sagalogo figik, eamalhe tugum mene inom he eamalhe eisena agwe inom wene palhik, hilingiri'lagwi ambisangma hilingi'mo re.

⁷ Ariginik oba nen, nit he nineisena Tuhan nenangorogo logouwok. A'nogo logolik, ninendawimo nen eberogo anggaluk nineisena Allah yerogo logogun. Nen, Aren he, nit ninane holfuluk telninabigin.

Tuhan nen telninabigin iluk isikhe wene.

⁸ O Yogondak he, nit o mum oba welagoba nen, nineisena Tuhan nen seleget ninabigin. Nen peikhogo warogoin oba nen, ninambotkwe menlasugun. Andi nen he ninaselei mene nen nit hilingik welago mene ineilenggen nisaluk inagaiyek asugun mene ekhe werek lek.

⁹ Niren Tuhan oba weak mondok hilingitugumo re, yogondak nit hilingitugu onggo At anini ninoba fugunem ikhi lago. Oba nen he, aninurogo welagi'legat Aren nit ninebikhit asimbik ninili wanhik, ninobaget higithogo hilingninobagagik, Aren nit ninebe wo'ninarek o selek oba wilibi wagik igin. Aren telninabigin mene andi hilingitunem he nit ninebe lombogen hogoin enek.

¹⁰ Attak he, it inaselei mene nen nit pilipninafi logolik yi'nogo ikhi lagaukwa, ”Hit hineisena Tuhan Allah andi re ebe koma werek nogo?” iluk ikhi lagaukwa. Oba nen yogondak he, nit nineisena Tuhan nen nit ninobaget hilingninaferek mene andoma nisambik he iren inenggali asugun. Nen, it ninaselei mene andoma re fesi ebekhe kwe were'ma sebelharek andi hakhogo sebelisamo nineilenggen isogoin.

¹¹ Yago, hit afuni Yerusalem mene yi sani! Yogondak he, hit hinawi kota leget pa'leget waganek mene a'nogo nekhengge obalik kwe wusugun oba arat horogasi waga. Nen, linggene andi sambul he, o hit logogun kwe wilayah re mondogat wogolarik lagain.

¹² Afuni hit mene omanogo re, o mo ero fikhit mene Asyur oba andoma nen inom, abel a'ma fikhit Mesir oba andoma nen inom, i Efrat imakwe andoma nen inom, i laut fena fikhit werek mene andoma nen inom, tom-tom yat-yatkwe werek mene inom, andoma hit hinebikhit asi wesugun o.

¹³ Oba nen he, afuni nen weak kwanirek mene nek hilingiti logogun andiba re, kweang he amusu le'ma ungguloak enek hilingi'mo asigin.

Hagainafuri Israel mene hendawirinabin o iluk samban isikhe wene

¹⁴ Tuhan neisena. Hat hagainafuri haren wenaginafigin mene omanogo re, it inebe yat-yatkwe werek mene inom, solikwe werek mene inom, kweang heiselekwe werek mene inom were'ma, Haren halinafi logoin o. Neisena, it he o attak welagaukwa hakhogo inangge nunggu mene re o Basan engga wilibikwe andoma nen inom o Gilead kwe andoma nen inom helaluk ninggi logouwago.

¹⁵ Tuhan neisena, Haren attak nit o Mesir en wo'ninarek wulibi waga logolik elalin mene hilingiti lagagin hakhogo yogondak ogo elalinhogoat hilingninobagakhi logoin o.

¹⁶ A'nogo hilingitunem it afuni inunggulenu amu mene andoma nen ineilenggen healuk he, iren ninomame werek iluk anggili'lagwi mene andoma re, hilingisu lek hak iluk futfuluk inenggali asuak. Nen, iren inelouk-pineloukhogo hilingitarek mene andoma mondogat longgo ugunem he, inane igi'legat inesanggo holhi'legat logouwak.

¹⁷ A'nogo logolik, it inebe kisu hak a'luk kweanggwe pololangerik lagik, nen inalaburen seragap warik lagik ikhi logouwak. Nen, it inebe inailo nen inoak leigetik, inebe werek oba omanogo nen wulibi we'luk nineisena Tuhan Allah hambit waga logogun o, neisena.

¹⁸ Nineisena Allah, Hat hemberek higit mene ekhe werek lek, it hagainafuri fena werek mene inaweak hilingiri'lagwi mene omanogo haren sagalogo leget fisikhi lagen. Nen Hat he wene ninoba fuluk aninurogo welagen lek, oba nen hebekhogo re hendawi hundik hilingninafi lagen mene huli warek lek mene andiba hagaiyek ninoba fugu welagen.

¹⁹ Nineisena, hobugen ogo nit hendawi hundik hilingninafik, ninaweak sebelogo legetfisigik ninobagagik, ikhi logoino o. A'nogo hilingninafi logolik niren ninaweak hilingiti lago mene andoma, Hat heisogen sibil sebelisaluk he i laut yenggele'ma ma'lima hugisa pino o.

²⁰ Hagainafuri Abraham inom, Yakub inomen tagomangge mene andoma, ninombawi attak welagaukwaba honggwaregen henu hombuk palogo wene warisasigin andi nen he, Hat hebe it inoba hendawi hundik logolik he tiphogo hilingfisikhi logoino o, neisena.