MIKHA 5 - Allah Wene Fano Wene Hupla Inane

Allah nen At againafuri mene inoe kain ekhe o Betlehem mene wogisagain iluk abok yagaisasikhe wene

¹ Tuhan nen ikhi logolik, ”Hit afuni Betlehem Efrata mene yi, o Yehuda ba yoma yi awi ti awi o kota sili werek mene yoma nen he, hit hinawi kota Betlehem yi nek he kota we endep mene werek oba nen, An nen it hinombawi inunggulenu attak welagaukwa andi mene, afuni Israel mene ferinaferek logolik yagaisikhi logouwageluk menfagain o,” iluk isikhe.

² Tuhan nen hobuk a'nogo hilinginabigin iluk, yogondak we elama ya it ninaselei mene nen fetninarek logolik yaganisikhi logouwageluk ninobagaikhemo logogun andi. A'nogo fetninarek logolik werek kwelek at raja andi agaisa nen tasigin iluk Allah nen anggasikhe higithogo ta'lagu halok, afuni at unggulenu mene hele warogo woginarek lagaukwa mene andoma re hobuk it inunggulenu Israel mene inom sebesi wesugun.

³ Ap enupogot omame hokho mene andi hobuk arat waga halok he Aren nineisena Tuhan Allah a'nogo omameba At againafuri ferinarek logogin. A'nogo ferinarek were'ma afuni yi awi ti awi welagaikharek mene re At omame mondok hokho mene werek iluk fok tiarogo liafunem he, Aren againafuri mondok fano liokhogo were'ma ferinarek logogin.

^4-5 Nen, Aren he afuni fano liokhogo logouwageluk hilinginabigin. Ap tentara Asyur mene nen ninoasuogeluk o himbirengge leget pa'leget waganek mene omanogo langgukhogo filik kwi wagunem, nit ninogogwi kaindek inomame werek mene re it inoasuageluk inebe higithogo penogo menfisogoin. A'nogo menfisamo iren he nit ninebe ap Asyur mene inenggimo nen telninabimbik he it inasikhe inom, inarige kabelek inom oba re ap Asyur mene inaiba andoma sebelugun.

Afuni Israel mene inoba unggum wogisigik, telinafik, hilingisigin wene

⁶ Tuhan nen he yi mene ti mene yago meneba lilengge ebene figik, meiso pelabi wagik, ugunem fano agarek andi hak, afuni Israel mene fena ekhe ineluk werek mene andi afuni inunggulenu lombok inanggelekwe logolik, afuni mene inoba himbirik welagi'lek Allah oba himbirik were'ma, Aren fanorinabigin.

⁷ Afuni Israel mene fena ineluk werek mene andoma, afuni inunggulenu lombok inanggelekwe andoma werek mene re enggama mene singa nen paik watik, nen oloba nen he wam domba senggelhik ikherek hak hilingiti logogun. Mene singa nen he wam domba omanogo eisogen tandamerisaluk he, aigen libik-labakhogo ninggik, ugunem afuni nen ambemangge telu elo'lek andi hak hilingik logogin.

⁸ Hobuk it Israel mene nen he it inaselei mene mabenet fisaluk inebe mondogat legetfisogoin.

⁹ Tuhan nen ikhi logolik, ”Andi sambul he An nen hinanggo kuda mondogat legetfisambik he kereta amboloba lagaluk weim yabi lagaikharek mene andoma leget fisigik, igin.

¹⁰ A'nogo legetfisikhi logolik hinawi kota ekhema-ekhema wurik mene andoma mondok meisak langgukhogo lakfisagain. Nen hinaselei mene kwi wesinogo iluk leget pa'leget waganek mene andoma meisalogo potfisagain.

¹¹ It hareise mene nen inanggembuba amurogo hilingitarek mene andoma legetfisigik, it heinogengge mene nen yi'nogo asigin iluk ili'lagwi mene andoma inebe hit hinanggele'ma nen wulakfisigik, igin.

¹² An nen hobuk he hiren tugwi kembu alik waganogo pugunet fuluk fogeratik, nen amu-amu mene andoma nen lebetninabigin iluk fogeratik, ikhi lagep kwe andoma wolelenggenhogo legetfisagain. A'nogo legetfoumo re hiren hinenggiba agauwak halfuluk fogerati lagep mene andi re ekhe fogerati logogun lego.

¹³ Hiren hinanggembu hinagaisa Dewi Asyera iluk fogerati lagep mene andi meisalogo lakfisigik, hinawi kota leget pa'leget omamerogo waganek mene andoma meisalogo lakfisigik, igin.

¹⁴ An na'mage lagaikhemo nendawimo het-pet igirik he afuni inunggulenu lombogen An nane hologo hilingiti'legengge weak enek hilingiri'lagwi mene andoma re mondok legetfisagain o,” iluk ikhe.