MIKHA 4 - Allah Wene Fano Wene Hupla Inane

T uhan nen afuni kweangma welagaikharek mene mondok fano liokhogo ferinarek logolik yagaisikhi logogin wene

¹ O hobuk logogun oba andoma re, punu amu-amukwe andoma sebelek hak werek kwelek, punu Tuhan awi wuri'mo andi nek he, mondok mitmorengge andom wolonghogo liabek logogin. A'nogo wolongse'ma re afuni inunggulenu lombok he, andoma uluk-uluk waga logogun.

² A'nogo we'luk iren ikhi logolik, ”Nit he, afuni Israel mene ineisena Tuhan Allah aiba lagauwogen we'ni o. Lagaumo re, At ebe o Sion kota Yerusalem oba logolik, ane At againafuri yagaisigik, komorinafik, hilingiti logogin andiba re, Aren nit wene hilingiti logogun mene yaganisugunem, higithogo hilingiti logogun nen he, lagauwogen we'ni o,” iluk ikhi logogun.

³ Aren a'nogo yagaisikhi logolik he, afuni inunggulenu lombok, inawene unggum katokhogo palhi logolik, inunggulenu inomame werek mene, inaiba yatma mene inom, horokhogo mene inom unggum inoba werek mene pilingisogo legetfikhi logogin. A'nogo hilingitunem he, karok weim yafu mene re, yabu wanhu mene hilinglagik, sige posiemanggen mene re engga palhu mene hilingfigik, ikhi logogun. A'nogo hilingiti logolik, afuni inunggulenu lombok, weim kagali laluk yafik, nen, yabuogeluk fik-foukhogo hilingitik, ikhi logogun mondok lek.

⁴ Afuni inebe lombok he, it inangge anggur yabumo inom, inagayo ara erokwe inom fano liole'ma logogun. A'nogo logolik he afuni ekhe nen inailot fisogoin iluk hilingiti logogun lek, iluk At Tuhan Omame Mondok Hokho mene a'nogo nen wene wate andi.

⁵ Afuni inunggulenu lombok o kweangma welagaikharek mene nen he, inanggembu dewa omanogoba himbirik logolik apne helikhi logouwak, oba nen nit enek he nineisena Tuhan Allah oba lomborogo logolik, ninenggi hundik-handik andomaba At enek fogeratu mondok logogun.

It afuni Israel mene inenggi hele warogo lakfisasukwaba omanogo nen hobuk inambotkwe sugulogo wesugun o, iluk isikhe wene

⁶ Tuhan nen ikhi logolik, ”Afuni An nen wene inoba fisasigimo hele warinarek lagaukwama yi enggin ti enggin hugu welagaikharek mene andoma hobuk An nen andogorogo fisa wesigin sambul werego.

⁷ It afuni andoma re, ineisok endenek mene hakhogo hilingfisaluk it inawi eroma nen he, yatma woginarek fisa lagagi mene andomaba nen, it fena ineluk werek mene andoma re An nen inunggulenu ket mene salogo fisamo, inunggulenu hokho mene hilinglagik, inomame hokho agik, ugun o. A'nogo hilingfisambik An nebe Tuhan At logolik Tom Sion oba andoma melalinafu mondok logogin,” iluk ikhe.

⁸ Hit afuni Yerusalem mene yi. Wam domba konhu welagaikharek andi hak, Allah nen againafuri o yoma werek mene halinafu were'ma re, o kota yoma attak enu lego welagaikhe andi hak, a'nogo hilingisogo fagain o.

⁹ Hit hinane hokhorogo le aga lagep andoma re, nenahalok? Hemi inomalik takhouwogeluk heinet watarek hak, yi enggin ti enggin ikhi lagep andoma re ninggi'nogoluk nogo? Andi re, hit hinoe raja legen a? Athe, it ap wene komo wene yagahisagarek mene omanogo re mondogat wa'lagaikhama a?

¹⁰ Hit hinebe hinawi kota herakfisaluk o leimo laluk logogun enggere, hemi inomalik taginafi logolik heinet watharek hak hirogo heinet wati logoni o. Hit he hinebe o Babel logoin oba nen o andoma nen he hineisena Tuhan nen it hinaselei mene inenggimo nen fikhalogo wulak hinobagagin o.

¹¹ Hit afuni Yerusalem mene yi. Afuni inunggulenu lombogen he, hit Yerusalem mene hinoasuogeluk inebe arat logalhasik werego. A'nogo logalhasik he iren weim abok ikhi logolik, ”Afuni o Yerusalem mene andi re mondok alperelogo legetfisogoin o. O kota andi re, meisak lambukhogo hilingi'mo nineilenggen hogoin!” iluk ili'lagwi.

¹² A'nogo ili'lagwiba nen he nineisena Tuhan nen it inoba hilingfisagain mene faget wene mondogat ebethesik he inebe re gandum enggen lolugun iluk palogo kabogetarek a'nogo hak, wene inoba fagain iluk foukhogo fikheba nen iren futfigi'legengge logolik ili'lagwi andi.

¹³ Tuhan nen ikhi logolik, ”Hit afuni o Yerusalem welagep mene yi. It hinaselei mene andoma hineisogen alperelogo fisobagaigen he lani o. An nen wam sapi andimuk besi meneba inom, eisok a'lip tembaga meneba inom hilingik hak hilingisogo hinobagagin. Nen, hiren he afuni inunggulenu lombok inebe hokhorogo alperelogo inoatik, inangge yi mene ti mene onggo hokho mene hugul helasukwa mene andoma hiren wanimbik he, An hineisena Tuhan o kweangma yi awi ti awi mondogat faget welagirek mene a'nogo nobaget feino o,” iluk yagaisikhe.

¹⁴ A'nogo yagaisikhemo, an nen he, ”Yago, hit afuni Yerusalem welagep mene yi, yogondak he nit ninaselei mene nen Israel mene ninoe melalninaferek mene a'nogo elokhonggen lambukhogo wasuogeluk haningisogo kwela'ninabi wagaikhasik werek enggere, weim yabugun mene fik-foukhogo logoni o,” iluk yagaisigi, isikhe.