MIKHA 3 - Allah Wene Fano Wene Hupla Inane

At Mikha nen hit mondok weak hilingiti lagebo, iluk it afuni Israel mene inogogwi kaindek omanogo wenagisasikhe wene

¹ Hit afuni Israel mene hinogogwi kaindek yi, An nen wene igin andi hinesanggo fanorogo holini o. Hiren he afuni wene fanorogo halinabu hinelu logoligenat he,

² wene higithogo hilingisu mene hinabit logolik weak hilingisugun mene nek hinamolorogo hilingiti lagep andi. Hiren he afuni an nunggulenu mene omanogo ineluk werek kwelek inagap nonggolinapluk, inoak oba nen ineino sabelhigik fisikhi lagep.

³ Hiren he it inagap sapuk-sapakhogo heligik, inoak wolelenggen tagalogo fisigik, nen wam palogo belanga elema kwelafarek hak it inebe kirigi-kurogo liakfuluk, afuni an nunggulenu mene andoma inebe ninggi lagep.

⁴ Hiren Tuhan oba yagati logolik, ”Lebetnisan o,” iluk hinane kwesugun oba nen Aren hit hinane onggo yagahisagain lego. Nen, hiren mondok kwanirek mene hilingiti lagep andiba re, hiren samban ugun mene ogore Aren esanggo holigin legaro.

⁵ Afuni an nunggulenu mene ap nabi heaba lalinafi logolik he, it ekhe nen ambi uang wogisagarek mene inoba re, ”Hobuk fanorogo logogun,” iluk yagaisigik, nen it ekhe wogisugu lek mene omanogo inoba re inendawimo seramet fisaluk he inom weim palek hak welagik, hilingiri'lagwi andi. Nen it ap inebe nabi heaba logolik a'nogo hilingitarek inap andoma faget Tuhan nen ikhi logolik he,

⁶ ”Hiren a'nogo hilingiti lagep andi nen he, hit hinobaget mo yaterek mene andi re mondogat ubuk igin o. Nen, a'nogo ubuk ugunem he o mum agik, nen An nendawimo anggigirek mene omanogo inabikanggo wokhagarek hak oba higi'legat welagik, nen hit hinafe nonghong umo hiren yi'nogo ti'nogo iluk ekhe ugun mondok lego,” iluk ikhe isikhe.

⁷ It ap ekhe wene hobuk hilinglasigin mene iluk yagaisagarek mene andoma inom, nen it ekhe inendawinggen wenggelasuageluk ekhe mene-ekhe mene hiligitarek mene andoma inom he, hobuk Allah nen it inoba ane onggo yagaisagain mondok lek andi nen he, inenggali asimbik inelha pigin o.

⁸ A'nogo hilingisugun oba nen, an enek he neisena Tuhan nen omame wo'netik, nen Areagun wo'netik ikhemo welagi o. A'nogo wo'netesik, wene futfuluk higithogo hilingitu mene faget inom, nen afuni Israel mene nen weak hilingiri'lagwi mene andoma faget nailo lekhogo inenggali warogo yagaisoageluk inom wo'netemo welagi o.

⁹ Yago, hit ap kaindek afuni Israel mene inobaget welagep hinap yi sani, an nen nane igin mene andi re furogo holini o. Hiren he afuni inawene katokhogo palinafi'legengge hilingfisikhi logolik, agaumhogo re weak mene nek hilingfisikhi lagep.

¹⁰ Hiren he, o kota Yerusalem Allah onggwarek aiba a'nogo wuti logolik he, afuni inoatik, wene higithogo hilingitu aweneba hilingiti'legengge logolik wuti lagep.

¹¹ Hit ap o kota ba hinebe kaindek logolik hinalonghogo welagep mene nen ogore, wene yaganisani iluk onggo palogo ugu halok enek he Tuhan nen awene melalek a'nogo yagaisigik, hilingiti lagep andi. Nen, hit ap nabi nen ogore, Allah nen yi'nogo hilingisugun iluk ikherek mene yagaisouwogeluk he uang wokhisugu halok enek he inawene palhik, nen hit ap imam en ogore, wene yaganisani iluk onggo palogo ugu halok enek he Tuhan nen awene melalek a'nogo yagaisigik, ikhi lagep andi. A'nogo hilingiti logolik, hit mondogaren he, ”Nit nineisena Tuhan ninom hundik welago, nen At ebe nit ninanggele'ma were'ma re, nit ninoba wene weak mene ekhe aga logogin lego,” iluk anggikhi lagep andi.

¹² Nen, hiren weak mondok hilingiti lagep andiba, o Sion oba yoma re, yabu wanharek andi hak hilingitik, nen o Yerusalem oba mondok meisak langgukhogo figik, nen punu o Tuhan awi wuri'mo yoma re, e alok-alok agayo ogoi hilingisogo figik, igin o.