MIKHA 2 - Allah Wene Fano Wene Hupla Inane

It afuni inenggi lek mene inoba enggin-fenggin hilingfisagarek inap a'nogo inoba asigin mene faget yagaisasikhe wene

¹ It afuni ekhe nen it ekhe weagerinabugun iluk o hubanggo inebe nogo agarek oba wengik logolik inendawimo wene weak mene ebetaresik, o wei ilik lagunem hilingirik lagaikharek mene andoma re weagerinabigin o.

² Iren inendawimo ebeti logolik, afuni nen yabu helagarek mene faget ebe'luk halok he, yabu a'nogoat teligik, nen o wurik faget inendawimo inamolo anggaluk halok he, o a'nogo tolulurogo kwi lagik, hilingitaresik he, o a'nogoba yi mene ti mene werek mene omanogo inom, afuni inebe inom, mondogat inenggi abisak helagarek andi.

³ A'nogo hilingiri'lagwi andiba re Tuhan nen ikhi logolik, ”An nen weak mene hinoba fei wesigin iluk nendawimo wenggelhimo re, hinoba asi wagu halok he, hiren polokhogo wulibu re elo'lek asigin o. Nen, a'nogo asi wesigin sambul andi re, hit hinunggul uan a'luk laga logogun lek.

⁴ Andem sambul afuni nen li'norinafi logolik kelem wuni yagaisagarek hak, wuni fong warogo logolik agarek awuni yi'nogo ikhi logogun: Tuhan nen he, nit ninawi eroma yinogo ogo re wanhesik, Aren ap nit sebelninabi wagaikha mene inoba wogisikhe. Andiba re, nit ninebe mondogat wolelenggenhogo ninobagaikhe o,” iluk ikhi logogun, ikhe.

⁵ A'nogo hilingiti lagep andi nen he Tuhan nen o andoma nekhengge At againafuri wogisagain oba asi wesumo re, o andoma hat eise ame iluk hit ekhe yagahisogoin mondok lego.

⁶ A'nogo yagahisamo afuni ekhe nen an noba ikhi logolik he, ”Haren nit wene yaganisugu lego. Wene mondogat andoma asigin mene faget nit yaganisa fuk, nit he ninenggali asigin lego.

⁷ Nit afuni Israel mene re Tuhan nen homan ninoba fikhemo welago nogo a? At Tuhan nen a'nogo hilingninabu hak nogo? Lego. At obabut he, afuni inobabut fanorogo hilingitarek mene inoba ane sakhorogo yagaisikherek lek iluk a? Yagaisikherek enego,” iluk yaganeri'lagwi.

⁸ A'nogo ugunem Tuhan nen ikhi logolik, ”Hirenat An nagainafuri inebe hinaselei mene hangge hilingfisaluk inoasugun iluk hilingiti lagep. An nagainafuri mene hit hinagaila'lak mene weim yabi laluk, inaiba waga logolik, inawilokwe fanorogo were'ma, logoin iluk wagunem en he, omanogo hiren telogoin iluk nenangorinafunem weri'lagwi.

⁹ Hiren he hemi An nagainafuri mene hinanggelekwe inawi inendawinggen hundik meneba were'ma mugusogo wulakfisigik, nen it inagainafuri inoba An nen inangge yi mene ti mene fano mene wogisikhi lagi mene omanogo mondogat telogo heligik, hilingiti lagep andi.

¹⁰ O yoma re, hit hinebe fanorogo logou lek hago. Hit hinaweak mondok hokhorogo hilingiti lagep andi nen he o hit hinebe welagep oba yi enggin-fenggin mondok weak mene lakfei wesiginmo re, hinebe menla'luk heise lani o.

¹¹ Hit hinobabut he, ap nabi mene healuk ineranhogo wene lalhinafi logolik, hobuk anggur agai inom, i amusu ekhe nunggunem lugulugwirinaferek mene inom, hokho-pokhorogo ninggi logogun iluk yagahisugu mene andoma hinamolo nen ikhi lagep andi,” iluk yagaisasikhe.

Telhinabigin iluk wene warisasikhe wene

¹² A'nogo yagaisasikhesik At Tuhan nen ekhe inom yagaisikhi logolik, ”Hit afuni Israel mene fena hineluk welagep mene ya re. Wam domba ambotkwe sugulogo inailoba wagaikharek andi hak, An nen hit hinebe misi'mo andogorogo hinobagaumo re, o leimo wam domba hokhorogo welagarek andi hak hit hinaiba andoma hinebe hokhorogo logogun o.

¹³ An nen hit hinanggwe huthisigik, hele warogo wokhinarek lagaukwama welagep oba andoma nen wokhinarek wilibi wagik, igin o. A'nogo wokhinarek wilibi waga logolik hiren leget pa'leget ambe palek mene andoma langgukhogo lakfisaluk wilibi wesugun. An hineisena Tuhan nebe Raja welagimo re, An nenat hit hinebe wokhinarek wilibi wesigin o,” iluk yagaisasikhe.