MAZMUR 99 - Allah Wene Fano Wene Hupla Inane

Allah andi re Raja lego mene werek isikhe wene

¹ Tuhan andi re Raja werek. Yi afuni ti afuni inunggulenu lombogen inoak leik etarek. At ebere kerub amboloba hurek were'ma, kweang yelandit-kwelandit hili'lago.

² At Tuhan ebere o Sion oba andoma andungdang hokho agun werek, nen yi afuni ti afuni inunggulenu lombok omanogo inoba nen Arenek he lego mondok werek.

³ Iren he At enu mondok fano hore'ma, andungdang hokho welagarek mene andi nek wuniba fogerati logouwak. At Ebere fano horek mene werek!

⁴ Hat he Raja homame hokho mene welagen, higithogo hilingitarek mene andi nek hendawirogo welagen. Haren enek eberogo wene a'nogo omamet fikhi lagen, Harenat he it afuni Israel mene were'ma andoma higithogo hilingfisigik, wene melalek omanogo menfigik hilingiti lagen.

⁵ Nit nineisena Tuhan Allah andi nek legeisogo fikhi logoni, At ebe hurek welagarek oba andoma hineindep awi yagaisogo fogerati logoni. At ebere horek mene werek!

⁶ At againafuri imam he Musa inom, Harun inom, nen at Samuel he Tuhan oba samban ikhi lagaikhe mene. It andem en he Tuhan enu hombuk palhunem, Aren ane onggo yagaisikhi lagaikhe.

⁷ O hena anggulok oba nen Aren it inoba ane yagaisikhi lagaikhe, iren he Aren wene melalek ikherek mene a'nogo inom nen yi'nogo hilingi'no ti'nogo hilingi'no iluk yagaisikhi lagaikhe mene a'nogo inom hologo nek hilingiti lagaukwa.

⁸ Nit nineisena Tuhan Allah, Hat hagainafuri inobaget hane onggo yagaisikhi lagen mene welagen. It inaweak hilingituba Haren wene inoba fou oba nen he, Hat Allah re it inaweak sagalogo leget fugu mene hamolo welagen andi nen he iren weak hilingitu mene omanogo honggoret fisugu mene welagen.

⁹ Nit nineisena Tuhan Allah ebe horek mondok werek andi nen he, At enek legeisogo fikhi logoni! Nen At andom horek meneba andoma nen hineindep awi yagaisogo fogerati logoni.