MAZMUR 98 - Allah Wene Fano Wene Hupla Inane

At Allah re o kweangma yi awi ti awi sagarek welagarek wene

¹ Wuni. At Tuhan nen elalin hilingisu elo'lek mene hilingiterek andi nen he At obaget wuni ket mene wulagaisogo wati logoni! At onggwarek esin logolik omame werek andiba re, telinaferek mene a'nogo At ebikhit hilinglagama werek.

² At Tuhan nen telinafe mene a'nogo faget fageri'lago, Nen katokhogo hilingite mene a'nogo faget yi afuni ti afuni inunggulenu lombok welagaikharekwe omanogo inoba inelu asuageluk weinameri'lago.

³ At againafuri Israel mene inoba endawi hundik hilinginafik, tiphogo hilinginafik, hilingiti laga mene a'nogo faget eberek werek. Nit nineisena Allah omame aga lagaikhe mene omanogo re yi afuni ti afuni o kweangma welagaikharek mene mondogaren, ineil arat haga.

⁴ Yago, hit afuni o kweangma yoma welagep mene mondogaren he At Tuhan obaget a'mit suphogo hinagaiyegeti logo'ni! Hiren hinagaiyegeti logolik wuniba Tuhan ebe fogerati logoni.

⁵ Hiren hinambinggong kecapi kongeti logolik, At Tuhan obaget wuni fogeratarek awuni wati logoni.

⁶ Hiren trompet furatik, pinggong kongetik, ikhi logolik nit nineisena Raja Tuhan a'nogo faget hinagaiyege'ni.

⁷ I laut inom elonggoma welagarek engge andoma inom ane mondogat uak, nen kweang inom it kweang amboloba welagarek engge andoma inom ogo inabolok uak enek.

⁸ I lagu agai andoma ogore inenggi abolok tabeti logouwak, nen tom-tom andoma re At Tuhan elokhoma nen inagaiyegesuak.

⁹ At Tuhan ebere afuni o kweangma werek mene inawene pilinginabigiluk wesigin. Aren he afuni inunggulenu lombok o kweangma ekhema-ekhema welagaikharek mene mondogat inawene higithogo ayo wurinafik, heirogo tegetik, eberogo weneba hilingisigiluk wesigin.