MAZMUR 97 - Allah Wene Fano Wene Hupla Inane

Pogot kweang enggi fisogo mene re At Allah amuat welagarek wene

¹ At Tuhan andi re ebe Raja hilingi'mo re kweang en agaiyegetik, i alonggen kwe andoma nen inanggilugetik, ikhi logouwak.

² Ohena inom, o mum inomen he At ebe maserogo kwelabek werek, At ebe lego logolik melalinaferek mene andi ero re Aren wene katokhogo hilingiterek mene andi inom Awene melalek werek mene andi inom oba werek.

³ At elokhoma nen he endu amulok kulunghogo lagakhi logolik he, it Aselei mene At eralukwe maserogo werek mene omanogo mondogat endu nolinabi'lago.

⁴ At ombakbagen he o kweangma mondogat selegeri'lago, At ebe haluk he kweang legeri'lago.

⁵ At Tuhan o kweangma mondogat sagarek werek mene a'nogo elokhoma andoma nen he tom-tom omanogo hendali hakhogo ubun-ubun lek ari'lago.

⁶ Pogoren he Aren katokhogo hilingiterek mene a'nogo faget fagetunem he, At Aselek welagarek mene a'nogo it afuni kweangma mene mondogaren ineilenggen hagarek.

⁷ Afuni mondogaren kembu fogeratarek mene andoma re it inenggali wasigin, yi wene ti wene ero legengge faget a'nogoba inendawinggen tibet fuluk hilingiri'lagwi mene andoma ogore inenggali asugunat, nen tugwi kembu dewa mondogat ogore At Tuhan a'ma nek sebe uluk fogerati logogun.

⁸ At Tuhan nen wene tekhogo ikherek mene a'nogo it afuni Sion oba werek mene nen inom, it afuni o kota Yehuda ba andoma werek mene nen inom, inesanggo holhambik he inagaiyek hogoin.

⁹ Nineisena Tuhan, Hat he pogot kweang henggi fisogo mene welagen andi nen he, Hat hebere handungdang logolik it kembu dewa omanogo sebelek hak werek kwelek Harenek he lego mondok welagen.

¹⁰ At Tuhan nen he it afuni At againafuri mene omanogo At awea'ma ferinarek logolik werek, nen Aren he it andi afuni wene melalek sagalogo fuluk hilingitarek mene inenggimo nen lologo wulak fisikherek. Ariginik enggere, hit afuni Tuhan hinendawirogo welagep mene nen he, weak hilingitarek mene andi faget hinabiret fisikhi logoni o.

¹¹ It afuni inendawimo eberogo anggili'lagwi mene inoba re selek meneba liarinafi logogin, nen it afuni higithogo hilingiri'lagwi mene inoba re inagaiyek mene hilingfikhi logogin.

¹² Yago, hit afuni hinendawimo higithogo hilingiti lagep mene re, At Tuhan nen hilingiterek mene andi faget hinagaiyegeti logoni o, nen At Allah horek mondok welagarek mene andiba hai wati logoni.