MAZMUR 96 - Allah Wene Fano Wene Hupla Inane

At Allah re Raja andungdang welagarek wene

¹ At Tuhan obaget wuni ket mene wulak fuluk ikhi logoni, hit afuni o kweangma mondogaren he At Tuhan obaget awuni wati logoni.

² At Tuhan obaget wuni wulagaisogo wati logolik he At enek fogerati logoni. Aren nit ninagap telninafe iluk linggene hundik-hundik wene inagaiyek mene andi wialhi logoni.

³ It afuni inunggulenu lombok andoma inoba At ebe andungdang welagarek mene a'nogo faget tindelhi logoni, Aren afuni inoba wesa polanhogo hilingiri'lago mene andoma faget pilingiti logoni.

⁴ At Tuhan ebe hokho agun werek andi nen he At enu legeisogo fagarek. Ma re dewa omanogo sebelek hak hilingik kwelek, At enek he hokhorogo inailoti logogun.

⁵ It afuni amu mene inandugwi kembu andoma re we fogeratarek mene faget werek, Oba nen At Tuhan enek he o pogot kweang talek mene ari elalhikhe agun werek.

⁶ At ebe re andungdang oba inom ombak-bak oba inom huli'lipsek, At ailoba re omame nen inom alilingge nen inom lik loukhogo hilingik.

⁷ Yago, hit afuni mondogaren he At Tuhan enek fogerati logoni, At omame werek mene faget inom, andungdang werek mene faget inom fogerati logoni!

⁸ At enu mondok horek welagarek mene andi nek fogerati logoni, At obaget yi mene ti mene wogotu mene waluk we'luk At awi wuri'mo fei waga logoni.

⁹ Hit hinebe mondogaren Tuhan awe a'ma hineindep awi yagaisogo hinasu Tuhan obaget hilingisuogeluk labetarek mene laberogo At faget fogerati logoni! Hit afuni o kweangma yoma welagep mene re At elokhoma nen hinoak leigeti logoni!

¹⁰ Hiren afuni inunggulenu amu mene inoba yagaisikhi logolik he, Tuhan andi re ebe Raja werego! Kweang he mondok ningmanibere'ma re abolok u lek hak, Aren afuni kweangma werek mene katokhogo nek inawene pilingisogo ayo wurinafarek, iluk yagaisikhi logoni.

¹¹ Hit pogot inom kweang inomen he hinagaiyegeti logoni! I laut inom elonggoma weregengge andoma mondogat inomen he hinami'mit suphogo hinanggilugeti logoni!

¹² O lei inom engga enggakwe wilibik mene mondogaren inom hinagaiyegeti logoni! E enggama wilibik mene nen ogore inagaiyekhogo inanggilugeti logouwak.

¹³ At Tuhan ebe o kweangma melalinabigiluk wagunem, Aren he afuni kweangma werek mene katokhogo nek endawi fanoba inawene pilinget fuluk higithogo ayo wurinabigin o, isikhe.