MAZMUR 95 - Allah Wene Fano Wene Hupla Inane

Fogerati logolik agarek awuni

¹ Yago, niren Tuhan obaget wuni wasuogen we'ni o, nit ninagap telninaferek mene a'nogo obaget ninagaiyek esuok!

² Niren wuni hai watu awuni warik-warik At were'ma louwogen we'ni o, wuni At fogeratu awuni ikhi logolik hinagaiyege'ni.

³ At Tuhan andi re, Allah mondok andungdang werek mene hilingi'mo re, At ebere it dewa omanogo sebelek werek kwelek, At he Raja mondok lego mene werek.

⁴ Nen kweang elonggoma walek ma'lima mondogat he At enggim welagarek, nen o tom unggul-unggul andoma mondogat he At mene nek werek.

⁵ I laut yenggelek mene andi ogore Arenat walhogo fesikhe andi nen he andoma Arenek sagarek werek, nen kweang ambuema andoma mondogat he At enggi nenat elalhikhe mene werek.

⁶ Andi nen he At elokhoma ninelokhe sogoum fogerasuogen we'ni o, Nineisena pogot kweang yi mene ti mene mondogat elalhikhe mene andi nineindep awi yagaisogo fogerasuogo.

⁷ Andi re, we At amu nit nineisena Allah were'ma, nit he At mene anggo domba hakhogo At againafuri mene welagoma re Aren halninafu werek. Hinombawi nen o Meriba inom, o Masa leimo inom andoma nen,

⁸ inungguloak haro logolik Allah ane ninabit iluk, Allah obaharo asuageluk hundik-handik obabut palhi lagaukwa hak he, yogondak Allah nen wene yagahisugunem laga logolik he: ”Ninabit iluk hinendawinggen omame aguba.”

⁹ An nen yi wene ti wene elalin mene omanogo hilingitunem ineilenggen niikhi lagaikhasigenat he, Iren andoma nen An nobabut palugun mene nek hilingiti lagaukwa.

¹⁰ A'nogo hilingitu were'ma 40 tahun huli logolik he, An nen it inobaget hebak naferogo kumurisikhi lagagisik, An nen ikhi logolik he: ”Ibi eberogo nen afuni inunggulenu yi inap he inendawinggen An noba tibet fuluk hilingiri'lagwi lek! An nen yi'nogo hilingiti logoino ti'nogo hilingiti logoino iluk yagaisikhi lagi mene a'nogo sagal fuluk enek hilingiri'lagwi.

¹¹ Andiba re An nen ikhi logolik, ”An set waralagain oba andoma, hit ninom set waralogoin mondok lego iluk, na'mageba kwe palfesigi andi,” iluk isikhe.