MAZMUR 94 - Allah Wene Fano Wene Hupla Inane

At Allah nen afuni mondogat inawene pilingisogo ayo wuterek wene

¹ Tuhan Allah nineisena, Haren he afuni nen hilingitu onggo tiphogo nek hilingfisikhi lagen, Haren onggo higithogo nek hilingfisikhi lagen mene andi inuknisan, neisena Allah.

² Hat hebe menla'luk he afuni mondogat o kweangma werek mene yoma nen, it foget fakhaluk hilingitarek mene andi iren hilingiri'lagwi higithogoat ambisangma wene inoba fein o.

³ Tuhan neisena, afuni inobabut weak mene andoma re ki huli nen inagaiyek hikhi logolik logogun nogo? Tuhan neisena, ki huli nen logogun abi?

⁴ Iren he inaneba mondok weak mene nek wulabi wagik, nen iren weak hilingiri'lagwi mene a'nogo faget foget fakhigik hilingitu werek.

⁵ Tuhan neisena, iren he afuni Hat hagainafuri mene omanogo inomameba sebelinarek welagik, nen ap Haren wenagaisogo menfisegen mene omanogo sebelfisigik, ili'lagwi.

⁶ Iren he hemi sogwe mene inom, yenggerugwi suarek mene inom pinggi inoatik, nen ap pok mene o kweang yiba werek mene omanogo inoatik ikhi logolik werek.

⁷ Iren ikhi logolik,” Tuhan nen eilenggen nisili'lago lek, At Yakub eisena Allah a'nogo nen he fut ninobagali'lago lek,” Iluk ikhi logolik hilingiri'lagwi andi.

⁸ Yago hit afuni an nunggulenu mene nen he mondok kembu ariginik mene andi re hilingisu fuk, hinungguloa'ma nen fanorogo wenggelhugu mene andiat yanggulhi logoni!

⁹ At Allah nenat ninesanggo elalogo fesikhemo re, At esanggo holherek lek nogo a? Holheregaro. Arenat nineilenggen walhogo fikhemo re, At eil nisili'lago lega? Eilenggen nisikherek enego.

¹⁰ Yi afuni ti afuni inunggulenu lombok Aren enek yagaisikherek hilingi'mo re, Aren unggum wogisa lek hak nogo? Wogisa hagaro. Afuni mondogat faget At ebe guru welagarek hilingi'mo re, At ungguloa'ma wenggelhu mene werek lek nogo a? Weregaro.

¹¹ Nit afuni nen wenggelhi lago mene andi re At Tuhan nen nisikherek enek hilingi'mo re, andoma mondogat he we alomarogo hagenek hilingik.

¹² Tuhan neisena, afuni Haren yanggulinafi lagen mene andoma inom, Haren hawene melalek yagaisikhi lagen mene andoma inom he, inagaiyek hikhi logouwago.

¹³ Enggin mene oba asi wagunem, ap weak hilingiterek mene senesuogeluk kweang habulogo fougeratu sambul andoma re, Haren at a'nogo endawimo hambuget fikhi lagen.

¹⁴ At Tuhan nen he At againafuri oboget isaluk lagain he mondok lek, nen At onggwarek alolegengge mene hilingi'mo re inoba onggoret fuluk hilinginafi logogin mondok legat.

¹⁵ Andiba re wene melalek a'nogo o wene katokhogo palharek oba omanogo nen ekhe inom omamet fugunem, it afuni inobabut higithogo hilingitarek mene nen he ane legeisogo fikhi logogun.

¹⁶ It afuni Allah ane taganhogo hilingitarek mene andoma inoba nen he ap sa nen an nili wo'nabu hak nogo? It ap weak mene nek hiligitarek mene andoma inoba nen he ap sa nen an nebikhit asu hak nogo?

¹⁷ At Tuhan nen an lebetniikhi logoilep le'ma nen he, an nebe afuni wa'la'luk lagaikharek oba omanogo asi lele logou hago.

¹⁸ An nendawimo nen wenggelhi logolik he, an nebe warogo taik igin higi, iluk ebetunemen he, Hat Tuhan nen hendawi hundik hilingnafi lagen mene a'nogoba an nebe nomareogo mendek logouwageluk hilingnobagakhi lagen o.

¹⁹ An nendawi fit la'luk nafe wonghogo werek sambul he, Harenat konnafik nagaiyek mene hilingnobagagik, ikhi lagen.

²⁰ Hat he it ap hakim ina'mage weak inap andoma inom mangoti lagen lek, It ap wene melalek oba higithogo iluk weak mene faget enek hilingitarek inap andoma hinom sebeti lagen legat.

²¹ Iren inane misik seberogo makfuluk ap higithogo hilingiri'lagwi mene omanogo inom eil eri'lagwi, nen iren he afuni weak hilingiri'lagwi lek mene we tulem mene omanogo pinggi inoari'lagwi

²² Oba nen he an nili waganogo nebikhit agu mene re we Hat Tuhan amu nek werek, nen an nebe awea'ma nobagaluk fetnarek werek menere we At Allah amunek werek

²³ Aren he ap weak hilingiterek mene re it inaweak hilingitarek mene higithogo unggum wogisikherek. Nen it inaweak andiba re Aren enek it inebe weagerinaferek. Nen nineisena Tuhan Allah andi nenat it inebe leget fisagain.