MAZMUR 91 - Allah Wene Fano Wene Hupla Inane

At Allah awea'ma fetninarek were'ma welagorek wene

¹ It afuni At Lego Mondok welagarek mene a'nogo awe a'ma werek mene inom, At Omame Mondok Hokho mene a'nogo nen sebelinarek were'ma werek mene inomen,

² Tuhan oba ikhi logolik he, ”An neisena Allah nebikhit a'luk nili wo'nafik, nebe telogo nobagagik, ikhi lagen mene re, we Hat amunek welagen o. Nen, an nen he we Hat hoba nek nendawinggenma nen eberogo anggikhi lagi o,” iluk ikhi logogun fano.

³ Aren he, it ekhe nen linglongengge hoasugun iluk hilingitunem andoma nen inom, nen ou hebe heiloak legasu mene hinoba asi wagunem andoma nen inom, telogo hobagakhi logogin.

⁴ Aren he sue nen eak ogolabi a'ma fuluk sebelek welagarek andi hak, hat hebe At a'ma hobagaluk fetharek were'ma, hat hebe fano logogin. Hebe hoasinogo iluk sing itarek andi hak, aren tiphogo nek hilingiterek mene andiba, ma'murogo fetharek logogin o.

⁵ Ma re, hat o hubanggo weak inailo mene nen weaget habuogeluk wesugun halok inom, nen o linggene wene hoba fouwogeluk ferekhogo wesugun halok inom,

⁶ o hubanggo enggin-fenggin hoba asu mene wagu halok inom, o linggene werek kwelek hat hebe weaget hafu mene wagu halok inom ogore, hailo asu fuk.

⁷ A'nogo weak aga logolik, hat hera'lu andoma afuni inebe 1.000 nen wa'lagik, henggi ebekwe higit he inebe 10.000 nen wa'lagik, hilingitu kwelek oba nen he, hat enek he yi'nogo ti'nogo iluk ekhe hoba asigin lego.

⁸ A'nogo hilinglagunem hera'lu heilenggen kwelagisagain he, Allah nen afuni weak hilingitarek mene inobabut oba onggo weagerinafunem heilenggen hagain o.

⁹ Nen haren he neisena Tuhan nen nebikhit aga logouwageluk oba tibet fuluk welagik, nen At Lego Mondok welagarek mene a'nogo nen awe a'ma fetnarek logogin iluk welagik, ikhi logogin andi nen he,

¹⁰ weak mene wesigin andi hat hoba asigin mondok lego, nen weak mene andi hat haiba andoma ogo wesigin legaro.

¹¹ At Allah nen he, hat hebe komakwe lagain halok setharek logouwagaluk agoromi malaikat mene inayonggo fuluk hoba lakfisa waga logogin.

¹² Ma re, it we'luk hat heisok helep oba temukhogo waranogo iluk, iren hat hebe it inenggi agut talek oba hobagagun o.

¹³ Haren kisu inebe inoaterek mene inom, mene olomene aigen palinaferek mene inom, afane soganogo lagik, heisogen sebelogo figik, igin werego.

¹⁴ Nineisena Tuhan nen ikhi logolik he, ”Ap ekhe an noba endawinggen himbirik logolik logogun mene re, hobuk An nen telinabigin o. Nen, ap ekhe ambeba nen Neisena Tuhan he At andi aro, iluk fakhogo ugun mene re, An nen nawe a'ma fisambik ferinarek logogin o.

¹⁵ Aren ane hokhorogo An nayonggo fugu halok he, An nen at ane igin mene onggo yagasigin aro. At weak logolik, ninggi'nogo hilingisu he were'ma, An nen lebetikhi logogin o. An nen at ebe telimbik he, enu werek hilingisogo fagain o.

¹⁶ An nen at ebe umur uanhogo wogotunem, at eluk ekhe inomat welagik, nen ebe telogo figik, ugunem ikhi logogin o,” iluk isikhe.